ТЕЛМА РЕАЛИЗИРА УШТЕ ЕДНА ДЕБАТНА ЕМИСИЈА
Вчера вечер на програмата на Телевизија Телма се одржа уште една дебатна емисија со учество на кандидати за претседател на Македонија. За разлика од 3 март, кога на Телма се одржа првата дебатна емисија, како прво воопшто телевизиско соочување пред јавноста на сите претседателски кандидати, овојпат, учествуваа четворица од кандидатите - Љубе Бошковски, Мируше Хоџа, Нано Ружин и Љубомир Фрчкоски. Иако сите седум кандидати за функцијата претседател на 3 март ветија дека ќе земат учество на наредното соочување на Телма, не дојдоа Ѓорге Иванов, Имер Селмани и Агрон Буџаку. За своето отсуство Иванов не даде никакво објаснување, ниту каква било најава од него или од неговиот штаб; Селмани учеството го откажа на само 45 минути пред почетокот на снимањето на емисијата, додека Буџаку се јави од граничниот премин Ќафасан и се извини дека не е во можност да пристигне во закажаниот термин. Емисијата, се разбира, се одржа, а четворицата присутни кандидати за претседател на државата ги изнесоа своите видувања за повеќе актуелни прашања поврзани со надлежностите на функцијата шеф на државата. Но се разбира, најдобро е да се погледне целата емисија во видео верзија од интернет-страницата на Телма.
