Фенерот што си го купив пред некое време досега сум го употребил само мал број на пати. Го немав употребено од зимата кога имаше периоди во кои останувавме без струја, а никогаш не помислив дека нареден пат ќе го запалам за да оддадам последна чест на едно наше мало "пријателче", да не речам член на семејството. Си замина и ја однесе позитивната енергија со себе, мала утеха е што последниот пат кога излезе од дома си спиевме заедно и голем дел од времето го минавме во галење. За разлика од неговите претходници, овојпат директно не ја посведочивме неговата смрт, па некако подобро ја поднесуваме загубата од минатите пати. Може звучи чудно, луѓе губат блиски роднини, цели фамилии, партнерите, па ќе речат што се потресува и глуми овој што го загубил домашното милениче, но кој чувал мачиња, кучиња, папагалчиња итн, ќе разбере дека воопшто не е сеедно кога си останал без некој кој ти станал секојдневие, некој кој постојано си го гледал крај себе.
А ништо не навестуваше на нешто такво. Волку "див" мачор досега не сме имале, уверени бевме дека нема да има проблем да се снајде во дивиот надворешен свет. Маче не можеш да контролираш, си има свои потреби, навикнато е и да преживее само по улиците, особено кога си го вдомил од улица. Сигурно бар 1/4 од денот ќе помине надвор, можеби не далеку од куќниот двор, меѓутоа доволно е еднаш да излезе и да биде отруено или како во случајов да го прегази кола...
Ретко одеше подалеку од мојата улица и на истата не постоеше никаква опасност да му се случи нешто вакво, меѓутоа главната улица во населбата скоро секогаш е опасно место за мачиња. Пред некое време најубавата мачка на комшиите им ја прегазија скоро до дворот, а сега настрада и Боро. Така сакала судбината, немаше доволно мачки на мојата улица, па затоа се движеше малце подалеку од дома... Бар никој да не го видел безживотното тело, едноставно ќе си исчезнеше како мојот прв мачор и никогаш немаше да дознаеме. Но...
Го немаше околу 15-тина часа. Вечерта си доаѓам дома и го гледам татко ми како е видно потресен. Се јавила тетка ми да ни каже дека братучед ми сабајле видел згазено маче кое личело на нашиот Боро, но не сакале да ни кажат. За неколку минути некој го собрал телото, не ни приметиле кој. Братучед ми не бил сто посто сигурен, па остана мала надеж кај нас, иако со одминувањето на времето истата беше се помала и помала. Веднаш отидов да видам да не најдам некои траги во околината. Не најдов ништо, а и мојата потрага низ цела населба остана неуспешна. Татко ми беше за нијанса поспокоен мислејќи дека Боро никогаш не одел толку далеку, ама морав да му признаам дека јас постојано го собирав од таму...
Настана тишина прекината од плачењето на татко ми. Секогаш ми било глупо да плачам пред него, па се повлеков во двор. Двајца мажи како плачат по мало животинче, тоа е моќта на куќниот миленик. Мајка ми не беше многу приврзана за него, но за татко ми претставуваше нешто многу важно во животот. Солзите сами си течеа, колку што ми беше криво за него, толку и за татко ми...
Влегов дома после еден саат, се договоривме дека ако не дојде до вечерва, официјално ќе сметаме дека тој е прегазеното маче.
Татко ми заспа, но јас останав да чекам до 6 сабајле, со отворени врати во надеж дека ќе го видам. Си ветивме дека ако се врати никогаш нема да го пуштаме надвор, колку и да се противи на тоа. Но, не дочекавме... Секој шум во двор ме тераше да излезам и да гледам да не ровари низ бавчата во дворот. Ми се слушна дека некој јаде од храната за мачки, но одново ништо. Ме совлада сонот, но не за долго. Се разбудив после 4 часа, а татко ми веќе беше во двор. Излегувам со надеж на позитивни вести, но дочекав само едно "Боро бил"...
Не издржа и заплака во двор, а овојпат јас бев тој кој се повлече дома...
Во последниот период бевме посебно поврзани. Топлото време го совладуваше преку ден и цело време си спиеше дома. Ноќите веќе нема да бидат исти без него. Скоро секој ден читав книга во двор додека целата улица беше во длабок сон. Тој си лежеше до мојот стол и будно го следеше секое мое движење.
Нема веќе кој да ги јаде саламчињата УКА од локалната продавница. Нема кој да се брка по таван, нема кој да ја пие водата која се собира при врнежите во една саксија во двор, нема на кого да му дадам дел од копаните кои ги јадеме со ориз, нема по кого да викаме кога досаѓа, нема кого да го галиме и да го нарекуваме со 500 имиња, нема кого да го сликам и да го покажувам насекаде затоа што беше гордоста наша
Дотурка и до насловната страна на кајгана списанието, дел од кајганџиите го запознаа во живо, а го знаеше и цело маало. Остана мистерија и приказната со сапунот, сега никогаш нема да може да се октрие што се случувало. Жалосно што сите радосни и смешни вести кои ги постирав за него во темава, сега завршуваат со еден ваков тажен пост.
Му реков на татко ми дека не смее веќе да тажиме, ќе си го памтиме како што си беше во последните денови. Барем нема да се јадам долго време како кога ми исчезна првиот мачор кој иако мјаукаше надвор заборавив да го пуштам дома и се случи тоа што се случи.
Ако ништо друго го прибравме од улица и три години си живееше грофски живот. Мило ми е што ми беше домашно милениче, почивај во мир пријателче.
Четврто маче што ни умира од 2010 година, да се надеваме дека со наредното ќе имаме повеќе среќа. Нека помине малце време да се опоравиме, па ќе барам некое помаранџесто рунтаво, ново маче.