Блиц вести

[asterix_m]

КОЛУМНА НА РАДМИЛА ШЕКЕРИНСКА ЗА „ДНЕВНИК“

За целта

Без генерална цел функционирањето на Унијата ќе станува се поотежнато. И како што честопати се забележува, дури и кога ЕУ ќе се договори за целите, комплексните институционални односи спречуваат одлучна акција. Тоа ги фрустрира европските политичари, нивните колеги од неевропскиот свет, но најмногу европските граѓани


Многу редови од овие колумни и голем дел од вашето внимание ги „потрошив“ на прашањето што редовно си го поставуваме оваа деценија - што треба да направи Македонија за да заслужи европско членство? Не дека по изборите ќе го занемарам прашањето, ама летнава атмосфера ме тера да „избегам“ од него, поставувајќи едно потешко - во каква Унија ќе влезе Македонија?

Зошто тврдам дека ова е потешко прашање? Многу едноставно: ако за првото ни дале илјадници одговори (и директни и индиректни; и куси и многу долги; и воопштени и ептен конкретни) и барем петнаесетина примери (што требала да направи Шпанија или Грција, а што требале да докажат Словенија или Полска), за ова второто - нема „готов рецепт“, нема паралела, нема twinning, нема дури ни консензус за желбите и амбициите.

Унијата често дебатира на оваа тема. Ги собира првите луѓе на своите земји-членки, организира министерски конференции посветени на ова прашање. Бара помош од своите „мозоци“. Финасира многу think-tank-ови, истражувачки центри и невладини за да размислуваат и да пишуваат за темата... И? Резултат на сето тоа е - дека Унијата се' уште НЕМА официјален став, заедничка позиција за тоа каде е крајот на овој процес. Нема одговор на прашањето - кој е посакуваниот финален продукт на европската интеграција? Поточно речено: нема ЕДИНСТВЕН одговор на тоа прашање, а има „многу кандидати за тој статус“.

Неслучајно, еден од советниците на Вацлав Хавел ја анализираше ЕУ како хибрид од „конфедерација, федерација, супранационална институција и меѓувладина организација“. Се' појасно е дека во моментов е невозможен единствен одговор, бидејќи нема единствено прашање. Ги има многу. Врзани се за прашањето на суверенитет (односно за различните концепти на суверенитет), одбрана, пазар, носење одлуки, демократски капацитет, влијание на граѓанинот и слично. За жал, сите се како врзани садови. Кога ни се чини дека на една тема сме го нашле вистинското решение, тоа изгледа сосема несоодветно за останатите прашања. Ако употребам математички жаргон, сликата е доволно комплексна дури и кога ја анализираме само како „ред“, а станува невозможна „матрица“ кога вметнуваме и втора димензија - интереси на секоја од членките за секое од тие прашања.

Дали ваквата дефинициска, па некогаш и политичка нејасност е добра или лоша вест - не знам, ама знам дека е очекувана. Таа била видлива и во „малата ЕУ“ од 1957 година која и во својот Римски договор не можела да отиде подалеку од општата (и необврзувачка) формулација за „што поблиска унија“. Сигурна формула која никого не алармира, а амбициозните ги задоволува (барем на одредено време). Минаа повеќе децении, а формулата не стана поконкретна и се' уште се споменува во „големите“ декларации за иднината на ЕУ.

Отсуството на „финална цел“ им е разбирливо и прифатливо на оние на кои не им „легнуваат“ тезите за „крајот на историјата“. За нив, Унијата успева да остане отворена, флексибилна и „на купче“ токму поради тоа.

Но, се' погласни се критиките дека без генерална цел функционирањето на Унијата ќе станува се' поотежнато. Потребата од консензус меѓу членките се претвора во постојани преговори и размена на услуги. И, како што честопати се забележува, дури и кога ЕУ ќе се договори за целите, комплексните институционални односи спречуваат одлучна акција. Тоа ги фрустрира европските политичари, нивните колеги од неевропскиот свет, но најмногу европските граѓани.

Тие се всушност најголемите критичари на Брисел. Сметаат дека комплексниот-до-неразбирливост систем на носење одлуки во Унијата го редуцирал нивното политичко влијание и довел до критикуваниот „демократски дефицит“. Реакцијата на Унијата и земјите-членки беше да се почне широк дијалог со невладиниот свет, партиите, медиумите, граѓаните... Модерниот Черчил би рекол - ако проблемот не сакаш да го решиш, почни ПР-кампања.

Шегата настрана, она што во Европа се „чита“ како сериозна опасност по демократијата и граѓанската партиципација (а се огледа во се пониски одѕиви на изборите и генерален цинизам кон политиката и политичарите, особено оние во Брисел), на другата (академска додуша) страна на Атлантикот се третира сосем поинаку. Имено, познатиот Фареен Закариа, загрижен за иднината на либералната демократија, спасот го гледа токму во структури налик на европските. Сметајќи дека во модерните демократии, со се' поизразени популистички тенденции, токму институциите (налик на оние во ЕУ) заштитени од изборни притисоци можат да бидат заштитници на демократијата - нормално, доколку ја добиле делегираната моќ на демократски начин.

Дебатата е далеку од завршена. И многу далеку од само академска. Ние не смееме да ја забораваме, ниту одбегнуваме. Нашата „финална цел“ е јасна, ама и таа е подвижна. Keep walking. Ама, не на слепо.

 

[asterix_m]

„Газпром“ ги зголемува цените на гасот за Европа

Руската државна компанија за снабдување со природен гас, „Газпром“ планира ново зголемување на цените на природниот гас за Европа до крајот на годинава, пренесува Макфакс повикувајќи се на информации објавени во рускиот весник „Комерсант“.

Според најавите, цената на илјада кубни метри природен гас, ќе достигне 300 долари.

Оваа цена е за повеќе од 50 долари поголема од досегашната цена, која на пример ја плаќаат Полска и Германија.

Македонија го набавува природниот гас од Русија по цена од 150 долари колку што плаќа и Бугарија.

Транспортните трошоци на природниот гас низ Македонија изнесуваат 42,5 долари, за илјада метри кубни гас на сто километри.

За споредба, транспортните трошоци за природниот гас во Бугарија изнесуваат околу 12,5 долари на сто килиметри.

 

[asterix_m]

Одбележана петгодишнината од нападот на армискиот конвој кај Карпалак

На автопатот Тетово-Скопје, кај месноста Карпалак, денеска се одржа панихида во чест на десетте припадници на резервниот состав на АРМ од гарнизонот во Прилеп кои беа убиени во конфликтот во 2001 година. Венци и букети со свежо цвеќе сем членовите од потесните семејствата на загинатите, положија и премиерот и министерот за одбрана во заминување, Владо Бучковски и Јован Манасијевски, Здружението на резервните воени обврзници од Прилеп, делегација од Здружението на армиски и полициски ветерани, како и претставници на политичките партии и дијаспората.

На парастосот чиноначалствуваше митрополитот на полошко-кумановската епархија, г. Кирил кој истакна дека МПЦ размислува синовите и ќерките кои го дале животот за Македонија пред народот да ги издигне на пиедесталот маченици.

Според информации од Министерството за одбрана идејниот проект за изградба на спомен обележје на загинатите бранители кај Карпалак се наоѓа пред собраниска Комисија за култура која треба да ја одбори изградбата на споменикот.

 

[asterix_m]

Работнички К. преку Лил може до ѕвездите

Македонскиот фудбалски шампион Работнички Кометал денеска во Лил на стадионот „Метропол” со почетокот во 18 ч. (пренос на МТВ) ќе се обиде во третото квалификациско коло во Лигата на шампиони да го направи најголемиот успех во нашиот клупски фудбал и да се пласира во групната фаза од најпрестижното натпреварување.

„Романтичарите” знаат дека противникот ја има улогата на фаворит и искуството во настапите на ЛШ, но тие се свесни дека немаат што да загубат, а можат да добијат многу. Затоа, сите ветуваат максимална ангажираност и концентрација, со која би можеле да извлечат активен резултат за реваншот во Скопје на 23 август.

- Пласман во ЛШ е рамен на сензација, но тоа не значи дека ќе го прецениме Лил. Нема што да загубиме и ни останува да одиграме храбро. Треба да се искористи секоја шанса што ќе ни се укаже, но ќе мора да одиграме малку позатворено. Нивниот тренер има добар увид во тоа што се случуваше во Скопје минатата недела, и не верувам дека ќе не потценат - вели крилниот напаѓач Иван Пејчиќ.

Лил е квалитетен состав, но предноста на Работнички К. е фактот што противникот се наоѓа на стартот од сезоната и се уште ја темпира формата за претстојната сезона. Тим-менаџерот на дебармаалци Ѓоре Јовановски против францускиот тим нема да може да смета на суспендираниот дефанзивец Драгољуб Јеремиќ и на повредените напаѓачи Крсте Велковски и Ардијан Нихији.

- Треба да се игра компактно и да се „гине” на теренот. Ако ја повториме пожртвуваноста од Дебрецен, можеме да направиме нешто позначајно. Имаме квалитетни играчи во одбраната, која ќе знае да излезе на крај со брзите напаѓачи на Лил. Тие се одлични индивидуалци и ќе мораме да ги удвојуваме - вели засилувањето во нападот, Горан Станковски.

Тренерот на Лил, Клод Пуел, за овој дуел на располагање ќе ги нема суспендираниот Метју Бодмер и Словенецот Миленко Ачимович.

- Тие ќе допатуваат за да не изненадат. Многу е тешко да се игра против непознат противник и кон него мора да имаш сериозен пристап. Го гледав натпреварот против Дебрецен на касета и морам да кажам дека се типични припадници на југословенската фудбалска школа, која изобилува со техника. Победникот ќе се решава низ двете средби, а наша цел е победа од два или три гола разлика без примен гол - истакнува Пуел.

Натпреварот ќе го суди судиска тројка од Словачка, на чело со Владимир Хиранек. Помошници се Роман Слиско и Владимир Недвед.

 

[asterix_m]

ВЕСЕЛБА СПОРЕД СИТЕ НИШАНИ ВО КОЧАНСКО

Свадба од 100.000 евра
Стојче Ангелов-Џентиле од Облешево, кој работи во Италија, синот Бобан го ожени со свадба што траеше шест дена, на која свиреа три оркестри од Македонија и од Србија

Семејството на Стојче Ангелов-Џентиле направи свадба каква што Кочанско ќе ја памети и ќе ја прекажува. Тоа беше шестдневна деноноќна веселба, проследена со сите обичаи. Печени бикови, прасиња, јагниња, кокошки. Околу 400 гајби пиво и сокови, многу вино и ракија, стотина литри италијанско шампањско... Сите денови на младоженците и на кумовите им била на располагање изнајмена луксузна американска лимузина. Гостите во дворот на големата трикатна куќа на Ангелови во Облешево, која тие денови беше претворена во импровизиран ресторан, ги веселеа дувачките оркестри „Весели врањанци“, кој има 12 члена, и „Кочански мерак“ со 10 свирачи. Во неделата на вечерата во мотелот „Гратче“ крај Кочани свирел друг оркестар, а пеела пејачката Благица Павловска.

- Свиревме речиси деноноќно. Само в зори газда Џентиле, татко на младоженецот, ни плаќаќе такси да отидеме до Кочани и малку да дремнеме дома, а потоа таксистите пак не' враќаа во Облешево. На „Весели врањанци“ им беше платено сместување во хотелот. Досега не сме свиреле на побогата свадба и собравме рекорден бакшиш - вели трубачот Пешио, шеф на „Кочански мерак“.

Најголем бакшиш, секако, дал кумот Горан Јанев, кој е сопственик на мелницата во Облешево. Вели дека го одврзал ќесето и на свирачите им „залепил“ повеќе од 2.000 евра.

Свадбарите ги посетивме во квечернината на 7 август, претпоследниот ден од маратонската свадба. Во дворот на куќата на Ангелови во Облешево келнери ги сервираа масите за стотина гости што требаше да пристигнат секој момент. На блиската полјана се печеше бик од 350 килограми. Го печеа тројца професионалци за таа работа, специјално доведени од Србија. Во дворот гостите ги чекаа невестата Анкица Трајчева, козметичарка од Кочани, младоженецот Бобан Ангелов и неговата мајка Гордана и таткото Стојче Ангелов, познат и по прекарот Газда Џентиле.

Тој веќе 19 години е на работа во странство. Прво бил во Германија и во Холандија, а последните 13 години со семејството, сопругата Гордана и со синовите Бобан (22) и Дени (17), живее во Италија, во областа Болцано. Има своја фирма за варосување и бојадисување станбени и деловни објекти, со десетина вработени.

- Меракот ме натера за синот да направам толку голема веселба. Сакав свадбата да биде според сите народни обичаи, како што порано се правеле во нашиот крај. Во организацијата многу ни помогна и туристичката агенција „Томчаки компани“ од Кочани. Не ги жалам парите. За свадбата планирав 100.000 евра. Не знам колку досега сум потрошил, но и да ја пречекорам таа сума нема да ми биде жал за вака убав повод. Една недела се веселиме со роднините и пријателите, го развеселивме и цело Облешево, па и Кочани - истакнува Стојче Ангелов-Џентиле.

Секако меѓу облешевци и кочанци има и луѓе што сметаат дека толку големи свадбени церемонии не се соодветни за вакво бреме.

- Се омажив многу млада и синот Боби го родив на 16 години во седмиот месец од бременоста. Тежеше само 1.250 грама. Уште тогаш се зареков дека, ако дочекаме, ќе му направам голема свадба. Убава свадба заслужува и снаата Анкица, која е единица - вели младата свекрва Гордана.

Откако добро ќе се наспијат по непроспиената урнебесна свадбена недела, Стојче и Гордана со помалиот син ќе се вратат во Италија, во средината на август. Бобан и Анкица ќе им се придружат во септември бидејќи ќе одат на свадбено патување во Бугарија.

Ова го нема ни на Ивкова слава
Меѓу највеселите гости на свадбата беше Славиша Јовановиќ, пријател на газда Џентиле од Врање.

- Во животот сум бил на околу 800 свадби во Србија, Босна, Германија и во Русија, но ова ми беше најголемата и највеселата. И во Србија правиме многу убави свадби, но ова што го видов во Облешево го нема ни нашата Ивкова слава - вели Славиша.

 

[asterix_m]

ИЗМЕНИ НА ПАЗАРОТ НА НАФТЕНИТЕ ДЕРИВАТИ

Нови видови бензини по европски стандарди
Беозоловниот моторен бензин од 90 октани ќе биде заменет со беозоловно гориво од 91 октан, кој е стандарден вид бензин, кој се наоѓа во промет во европските земји. Ќе се воведе нов вид безоловен бензин од 98 октани. А, покрај постојното дизел-гориво ќе се воведе и ново со понизок процент на сулфур (до 350 милиграми на килограм).

Ова се измените на пазарот на нафтени деривати предвидени во Правилникот за изменување и дополнување за квалитет на течните горива, кој Владата го усвои на вчерашната седница. Правилникот го изработи Министерството за економија по барање на потрошувачите, увозниците на возила, еколошки здруженија, дистрибутерите на горива и на производителот на горива, рафинеријата ОКТА. Целта на измените е на пазарот да бидат присутни горива со квалитет потребен за современите автомобили и близок до квалитетот на нафтените деривати што се користат во земјите од Европската Унија.

Од Владата соопштуваат дека за евентуалните манипулации при продажбата на новиот тип дизел (да се декларира дека се продава нов, а да се продава стар тип дизел) се предвидени ригорозни казни.

 

[asterix_m]

СпреЧен ужасен терористиЧки напад во авиони на пат кон сад
Бомба во шише, Лондон во хаос
Нападот требало да биде спроведен со течен експлозив, на шест до десет авиони на пат од Британија кон САД

Британската полиција спречи обид за координирани детонирања на бомби во авиони на пат помеѓу Британија и САД, во веројатна режија на терористичката група Ал каеда, јави Ројтерс.

Во ноќни рации во Лондон, југозападна Англија и во Бирмингем биле приведени 21 лице, за кои се смета дека го организирале нападот со „глобални димензии“. Според непотврдени извори, меѓу уапсените имало Британци со пакистанско потекло, слично на бомбашите што го нападнаа Лондон лани на 7 јули.

- Убедени сме дека ги спречивме терористите да предизвикаат смрт и разорување од досега невидени размери. Едноставно, ова требаше да биде масовно убиство какво што не можеме да си замислиме - изјави Пол Стивенсон, заменик-комесар на Лондонската полиција.

И Британија и САД прогласија највисоки нивоа на тревога („критично“ во Британија и „црвено“ во САД), како пред непосреден терористички напад. Американскиот секретар за Домашна безбедност, Мајкл Чертоф, изјави дека првите показатели од истрагата укажуваат дека бомбашкиот план бил дело на Ал каеда.

- Центарот на терористичката операција беше во Британија, но планот беше многу софистициран. Беа вклучени многу членови и имаше меѓународни димензии. Истрагата е во тек и се' уште не можеме да дадеме конечен заклучок - изјави Чертоф.

Неофицијално се дознава дека нападот требало да биде спроведен со течен експлозив, на шест до десет авиони на пат од Британија кон САД. Поради тоа на лондонските аеродроми имаше вонредни мерки на заштита - патниците не смееја да носат личен багаж, а мораа да ги отстранат сите течности од багажот - вклучувајќи пијалаци, лосиони, дезодоранси и раствори за контактни леќи.

- Авионите се чувствителни на експлозив во течна форма. Ако успеел планот на бомбашите, тоа ќе било најстрашниот терористички напад во Британија - изјави Питер Њуман, директор на Центарот за одбранбени студии на Кралскиот колеџ во Лондон.

Тој потсети на планот од 1995 година за координирано уривање 11 авиони, користејќи нитроглицерин помешан со раствор за контактни леќи и детонатор со стандардна батерија.

Британските воздухопловни власти побараа од сите европски авиопревозници да ги откажат летовите до лондонскиот аеродром „Хитроу“. Националната компанија „Бритиш ервејз“ (БА) ги откажа сите летови од „Хитроу“ и неколку од „Гетвик“. Во Британија вчера биле закажани 3.800 лета, од кои 11 отсто биле кон аеродроми во САД. За време на летната туристичка сезона низ „Хитроу“ секој ден поминуваат по 180.000 патници.

По овие вести, акциите на „БА“ паднаа за 5 отсто, фунтата изгуби вредност во однос на доларот и еврото, но нафтата поевтини речиси за еден долар.
Сите патници со празни џебови
Патниците на лондонските аеродроми вчера добиле наредба да не носат речиси ништо со себе во авионот, како дел од напорите за спречување терористички напад.

Секторот за транспорт им наредил на патниците се' што носат со себе да пријават како обичен багаж, кој се снима во специјални машини, за да се откријат евентуални бомби или опасни предмети. Патниците морале да ја испразнат дури и содржината на своите џебови во специјални проѕирни кесиња, кои ги делеле припадниците на службите за безбедност.

Во кесињата можело да се пренесуваат само: џебни паричници заедно со содржината (пари, кредитни картички, лични карти), документи неопходни за патувањето (пасоши и билети), неопходни лекови (тие во течна форма морало специјално да бидат прегледани), очила без футрола и кутии за контактни леќи (без течниот раствор). Тие што патувале со мали деца можеле да носат и бебешка храна, шише со млеко (придружникот на детето морал пред припадник на службите за безбедност да проба од содржината на шишето!!!), како и санитарни предмети (пелени, шамичиња, кремови и кесички за валканите пелени). Жените можеле да носат со себе средства за лична хигиена, но не во кутии. Сите патници можеле со себе да носат и клучеви (без далечински електронски уред).

Сите патници морале да бидат рачно претресени и прегледани со скенер со икс-зраци. Инвалидите можеле да поминат низ контролите само со специјални аеродромски колички.

Луѓето што патувале кон САД морале да бидат прегледани двапати.

Од класичниот багаж, пак, патниците морале да ги отстранат сите предмети што содржат течност, а други рестрикции не биле неопходни.
Тревога и во тунелот под Ламанш
Освен на лондонските аеродроми, вчера беа зголемени и мерките за безбедност на железничкиот сообраќај од Лондон до Париз и до Брисел со возот „Евростар“, кој поминува низ тунел под каналот Ламанш, јави Ројтерс.

Илјадници туристи, блокирани на аеродромите, решиле со возот да се извлечат од Лондон и да продолжат кон дестинациите од Париз или од Брисел. До пладне 2.500 патници се туркале да обезбедат билети за „Евростар“.

Возовите обично пренесуваат по 23.000 патници на ден од Лондон кон Париз и Брисел. Една композиција собира 750 патници.

 

[asterix_m]

Македонија на дневен ред во октомври

Во ЕУ продолжува внатрешната борба со „истоштеноста од проширувањето“, па организацијата ќе мора да го реши прашањето на географските граници на проширувањето

Финалните извештаи од мониторингот на Бугарија и на Романија ќе бидат првата тема на ЕУ на есенската агенда за проширување на Унијата. За напредокот на двете земји кон ЕУ и нивната подготвеност да и' се приклучат на Унијата ќе се расправа на 26 септември.

Еден месец подоцна, на 24 октомври, на дневен ред во Брисел ќе се најде и Македонија и извештајот за нејзиниот напредок како земја-кандидат, заедно со извештаите за Хрватска, Турција, Албанија, БиХ, како и за Србија и Црна Гора. Истовремено, Советот на Унијата ќе расправа и за извештајот за таканаречениот апсорпциски капацитет на ЕУ.

Според дипломатите во Брисел, преговорите со земјите-кандидати за членство во Унијата влегуваат во критична фаза. Бугарија и Романија се на работ на влегувањето во ЕУ, а Турција треба да го одржи чекорот. Во исто време, во ЕУ продолжува внатрешната борба со „истоштеноста од проширувањето“, па организацијата ќе мора да го реши прашањето на географските граници на проширувањето.

Финалните извештаи за Бугарија и за Романија се планираат за 26 септември, што е суштински момент за двете земји бидејќи тогаш ќе се носи одлука дали тие ќе влезат во елитното друштво на 1 јануари 2007 или една година подоцна, на 1 јануари 2008 година. Последните извештаи за двете земји од мај годинава го потврдија напредокот во исполнувањето на копенхашките критериуми. Но, истовремено, беше изнесено дека се' уште има некои области од политичките критериуми кои ја загрижуваа Европската комисија. Токму затоа, не е исклучено ЕУ да употреби некаква „заштитна клаузула“ која ќе овозможи одлагање на пристапот на Бугарија и на Романија до 2008 година ако Брисел забележи „сериозен ризик“ дека земјите не се способни да ги спроведат неопходните реформи.

Што се однесува до Турција, пак, финското претседателство побара од Анкара до крајот на годинава да го реши спорното прашање со Кипар околу пристапот до аеродромите и пристаништата. Кипар веќе се спротивстави на формалното отворање и затворање на првото од 35-те преговарачки поглавја меѓу Турција и ЕУ, доколку Анкара не ја исполни обврската да ги признае сите 10 нови членки на Унијата, вклучувајќи го и Кипар, па островската држава очекува да биде главна точка во извештајот на Европската комисија за Турција.

Неодамна и претседателот на Европската комисија Жозе Мануел Баросо и финскиот министер за надворешни работи Ерки Туомиоја ја предупредија Турција околу кипарското прашање и изјавија дека недоволниот напредок може да доведе до сериозни проблеми во преговорите за членство годинава. ЕУ сериозно побара од Турција да го почитува и да го спроведува царинскиот протокол и да ги отвори пристаништата и аеродромите за кипарските бродови и авиони. Дури и имаше предупредување дека пролонгирањето на проблемите меѓу Турција и Кипар ќе го отежне целокупното решение. Затоа ниту ЕУ ниту Турција не требало да размислуваат за одлагање на напорите за решавање на проблемот со Кипар.

Од друга страна, пак, Турција влегува во изборен период , па се чини дека ќе биде тешко за владејачката партија да преземе долгорочни чекори. Поддршката од јавноста за членството на Турција во ЕУ опаѓа уште од формалниот почеток на преговорите во октомври 2005 година.

Во октомври, заедно со извештајот за Турција, Европската комисија ќе презентира и специјален извештај за „апсорпцискиот капацитет“. Дебатата за овој капацитет се разви откако германските и австриските христијански демократи го употребија терминот како аргумент за ограничување на процесот на проширување на ЕУ, особено во однос на Турција. Комисијата го прифати терминот во Стратешкиот документ за проширување од 2005 година, а во годинашниот специјален извештај терминот ќе треба да се дефинира и формализира. Се очекува Европската комисија на Советот во декември да му предложи работен документ за идното проширување на Унијата и нејзиниот капацитет да прифаќа нови членки. За разлика од копенхашките критериуми, апсорпцискиот капацитет не е формален услов за членство, но, сепак, зависно од тоа како ќе се одвива дебатата, тој може и де факто да стане критериум.
Поддршка од граѓаните на ЕУ
Поголемиот дел од граѓаните на ЕУ ја поддржуваат Македонија за членство во Унијата. Во последното испитување на јавното мислење што го спроведе Европската комисија, објавено во јули годинава, на прашањето: „Дали го поддржувате членството на земјите откако ќе ги исполнат сите услови поставени од ЕУ?“, 49 отсто од испитаниците ја поддржале Македонија, додека 36 отсто биле против. Поголема поддршка од Македонија добила само Хрватска и тоа 56 отсто наспроти 30 отсто. Единствен негативен сооднос има Албанија и тоа 41 отсто за и 44 отсто против.
Клучни законите за полиција и за прислушување
Законот за полиција и законот за прислушување се главните услови за позитивен извештај од Европската комисија за Македонија во октомври годинава. Од тоа ќе зависи дали Комисијата ќе препорача почеток на преговори за членство.

- Доколку се исполнат овие два услова, Македонија има шанси да добие датум за преговори, велат извори од Брисел, додавајќи дека земјава може да се надева на одлука на самитот на ЕУ во декември.

Во ланскиот извештај за Македонија како клучни приоритети беа наведени изборите, реформа на судскиот систем, едношалтерски систем, закон за полиција и закон за прислушување. Изборите, вклучувајќи го и изборното законодавство беа оценети главно во согласност со меѓународните стандарди, а реформата на судството главно се оценува позитивно од Брисел. Оттаму се надеваат дека новата влада ќе има доволно време да ги донесе и двата клучни закона.

 

[asterix_m]

ИНДИСКИТЕ ГАЗДИ НА РУДНИКОТ ВО ПРОБИШТИП
„Злетово“ стартува за десетина дена
Во Пробиштип, по искуството со „Ксеминекс“,
со многу сомневања ги примаат ветувањата на новите газди

Флотацијата и дробилката во рудникот се пуштени во пробна работа и 400 тони руда веќе е издробена и складирана за понатамошна доработка - пишува во соопштението потпишано од Абхој Прасад Мухарџи, директорот на рудникот во Пробиштип, индиската фирма „Индо минералс метал“.

Индијците тврдат дека околу 140 поранешни вработени ќе бидат повикани на работа до крајот на месецов и порачуваат дека во наредното тромесечје, поточно до крајот на октомври, на работа ќе бидат повикани уште 300 поранешни вработени.

Во Пробиштип велат дека се изгорени од искуството со претходните газди, американската компанија „Ксменинекс“, и не им веруваат на Индијците.

- Ништо позначајно не се случува во рудникот. Нема ниту нови машини ниту пумпи, нема ништо. Рудата што е пуштена во флотација најверојатно е од старите резерви во бункерите во флотација или во поткопот од рудникот - вели Станко Миревски, поранешен генерален директор на „Злетово“.

Тој исто така вели дека и поткопот е во многу лоша состојба и не може преку ноќ да се активира.

Во реакцијата од индиската компанија исто така пишува дека во последните три месеци од кога тие станале сопственици на рудникот, а тоа е 11 мај годинава, било рексонструирано јаловиштето, а биле завршени и многу други подготвителни активности за рестартирање на рудникот. Во истото соопштение пишува дека до крајот на овој месец тој конечно ќе почне со работа.

Рудникот за олово и цинк во Пробиштип, своевремено најголемиот рудник за оловоцинкова руда не работи повеќе од 5 години. Откако во 2001 година отиде во стечај, беше продаден на меѓународен тендер. Потоа „Злетово“ за 192.000 долари го купи американската компанија „Ксеминекс“, која со рудникот стопанисуваше околу две години. Зад „Ксменинекс“ останаа само купишта долгови кон државата, кон ЕСМ за неплатена струја и кон доставувачите. Поради ваквите состојби Американците беа принудени да им го отстапат рудникот на Индијците и тоа за неплатени долгови.

 

[Попај]

На Груевски му годи да го нарекуваат технократ
Ако меѓународната заедница се реши за независно Косово, сигурно ќе обезбеди гаранции за регионот и тогаш може први да го признаеме, вели Груевски
Ми годи и се гордеам што ме нарекуваат технократ, бидејќи технократи се политичари што работата ја базираат врз образование, наука и точни стандарди и норми, кои бараат точни и прецизни со бројки резултати, изјави мандатарот Никола Груевски во интервјуто за „Дојче Веле“.Тој рече дека ВМРО-ДПМНЕ е партија со тесни врски со македонската дијаспора:

- Како опозиционер, и претходно, често патував во дијаспората и видов дека има многу Македонци кои навистина се многу способни. Ако успеале во најсилната држава на светот и во најсилните институции таму, зошто да не им се даде шанса да помогнат во развојот на Македонија.

На прашањето како ќе се постави за статусот на Косово, Груевски одговори дека со процесот на решавање на финалниот статус управува меѓународната заедница и затоа не треба да се преценуваме, туку да ги гледаме нашите можности и да не дозволиме нешто да се влоши во Македонија. Ако меѓународната заедница се определи за независно Косово, таа сигурно ќе обезбеди гаранции за регионот, да нема понатаму проблеми од кои би требало да стравуваме, и во тој случај Македонија може да е првата земја која ќе му ја признае независноста на Косово, вели Груевски.

За спорот околу името, Груевски вели дека е проблем повеќе на Грција, кој може да биде и наш ако таа почне да ја користи својата позиција во ЕУ и на други места, правејќи ни штети.

- Треба да ги развиваме односите со Грција, пред се' економските, но и политичките. Грција е наш сосед, и тоа може многу да ни помогне. Со добрососедски односи регионот ќе стане постабилен и посигурен за инвеститорите. Но, ние имаме уставно име. Нема клима за негово менување меѓу народот и ниедна влада не може да оди против волјата на граѓаните. Треба да ги продолжиме разговорите и да најдеме заедничко решение што колку-толку ќе ги задоволи нив, но нема да го загрози уставното име - истакна Груевски.

Груевски вели дека не очекува дестабилизација на Македонија поради притисокот на ДУИ да се врати во владата.

- Можеби ДУИ ќе оди кон некои чекори што се недозволени, но ќе си направат проблем пред се' за себе. Сепак, мислам дека кај нив ќе надвладее разумот, а тоа значи да се почитуваат Уставот и законите.

 

[Попај]

Фуере службено во „Службен весник“
Амбасадорот на Европската Унија во Македонија, Ерван Фуере, вчера го посети Јавното претпријатие „Службен весник на Република Македонија“, при што се запозна со неговата работа.

Директорот на Службен весник, Борис Тренески, го информира евроамбасадорот за досегашните резултати во издавањето на службеното гласило во печатена и во електронска форма.

„Пред евроамбасадорот беше презентирана Базата на прописите, во која се вградени над 9.000 важечки законски и подзаконски акти од 1945 година до денес, како и начинот на нејзиното ажурирање. Нивната систематизираност овозможува лесно пребарување и поврзување со тематските поглавја на Базата на прописите на Европската Унија. Тоа е од особено значење за сообразувањето на македонскиот правен систем со европското законодавство“, се вели во соопштението од ЈП „Службен весник“.

Раководството на претпријатието го запозна амбасадорот на ЕУ со соработката со службените весници од земјите во регионот и земјите-членки на ЕУ. Особено беше истакната соработката со „Службениот весник на Европската Унија“ со седиште во Луксембург.

 

[Попај]

Жителите на Лажани слушаат пукотници речиси секоја вечер

„Добредојдовте во Бејрут“. Вака не пречекаа дел од жителите на Лажани собрани на сред село. Потврда на нивното добредојде беа и пукотниците кои овде, велат селаните, се слушаат речиси секоја вечер.
Поводот може да биде банален, како оној синоќешниот. Расправијата меѓу семејството Хасановиќ и Раикоски, кој е во право, околу градбата на двата објекти на сред село. Но, последиците катастрофални.
Над 50% од населението се Бошњаци. Ним им припаѓаат Хасановиќи. Околу 30% се Торбеши, во нив се Раикоски, а останатите се Македонци.
Првите се со СДСМ, вторите со ДУИ, Македонците разделени уште повеќе. Политиката, хаосот во државата, борбата кој да земе повеќе од државното земјиште се искрите кои можат да пламнат.
„Не е ова прво. Еве веќе една година со овие проблеми се соочуваме, затоа што ние од нив не можеме тука повеќе да живееме“, рече Џеват Раикоски, жител на с.Лажани.
Хасановиќи имаат друга приказна за случајот. Велат, семејството Раикоски го користи ДУИ за да прави што сака во селото. Но и ним секојдневните пукотници им пречат.
„Ако го видат челниците на ДУИ ова, ќе видат за каков тип на човек се работи. Тој е буквално разбојник и тој може со ова и со неговиот имиџ само да и одмогне на партијата“, изјави Есад Хасановиќ, жител на с.Лажани.
Жителите на Лажани ги слушаат пукотниците, но не сакаат да зборуваат за нив. Пред камерите не сака ни градоначалникот на Долнени Изодин Каришиќ.
Неговата преокупација, вели, се патиштата, училиштата, водоводите. Ваквите случаи ги остава на полицијата и судот.

 

[asterix_m]

Атина бара меѓународно име за Македонија

Во Резолуцијата на ОН јасно стои дека се водат разговори за надминување на разликите меѓу двете земји околу името, а Грција сега се обидува да изгради нова позиција пред формирањето на владата на Груевски, оценуваат македонски дипломатски извори

Официјална Атина очекува новата македонска влада да покаже интерес за соработка со Грција за да се најде општоприфатливо решение за спорот со името. Под општоприфатливо, подразбира едно име за Македонија и за меѓународна употреба и за билатерална комуникација со Грција.

Грчкиот заменик-министер за надворешни работи, Јанис Валинакис, изјави оти се надева „новата влада на ФИРОМ да покаже интерес во духот на соработката да се изнајде заеднички прифатливо решение за името“.

По изјавите на мандатарот Никола Груевски и на идниот шеф на дипломатијата Антонио Милошоски, Валинакис рече дека „преговорите што се водат меѓу Атина и Скопје под покровителство на ОН се однесуваат на прашањето за меѓународниот назив на соседната држава“. Според Валинакис, тоа е тема на преговорите, а не начинот на кој Грција ќе ја нарекува. Тој уште вели дека секоја друга постапка ги става под сомневање, па дури и ги поткопува и суштината и смислата на преговарачката процедура во рамките на ОН, но и не соодветствува на европската перспектива на земјава и на нејзините ангажмани.

- Ако е прашањето како Грција ќе ја нарекува ФИРОМ, тогаш не се потребни одлуки на Советот за безбедност на ОН ниту, пак, преговори во ОН - изјавил грчкиот заменик-шеф на дипломатијата.

Македонија не отстапува од ставот дека ќе преговара за надминување на разликите околу името за да се најде решение за билатерална комуникација со Грција. Ставот на нашата земја произлегува од Резолуцијата 817 на Советот за безбедност на ОН од 1993 година, со која и е дефиниран предметот на разговори меѓу двете страни. На оваа резолуција се темели и Привремената спогодба меѓу двете земји од 1995 година.

- Во Резолуцијата јасно стои дека се водат разговори за надминување на разликите меѓу двете земји околу името и бидејќи нема друга земја во светот на која и' пречи нашето име, јасно е дека се работи за име што треба да го користи Грција - велат дипломатски извори што се инволвирани во преговорите со Атина.

Доброупатени извори во проблемот, за „Дневник“ оценуваат дека со изјавата на заменик-министер за надворешни работи на соседна Грција, Валинакис, официјална Атина всушност гради позиција пред формирањето на новата влада на Груевски.

- Изјавата на Валинакис е оценка што произлегува од нивната позиција во спорот, а не од Резолуцијата на Советот за безбедност - велат нашите извори.

Грчките медиуми ја пренесуваат изјавата на Груевски дека се залага за подобрување на економските и политичките односи со Грција, но не отстапува од ставот дека Македонија не може да го менува уставното име. Единствената отстапка е изнаоѓање прифатливо име за билатерална комуникација со Атина

 

[asterix_m]

[FONT=Arial, Helvetica, sans-serif]Бранко ја поддржа ДУИ за опозиција[/FONT]

[FONT=Arial, Helvetica, sans-serif]Завчеравечер во претседателската вила "Билјана", на коктелот што го организираше по повод годишнината од потпишувањето на Рамковниот договор, претседателот на Македонија Бранко Црвенковски ги кажа значењето и улогата на Демократската унија за имплементирањето на Договорот, а притоа ја охрабри како опозициона партија.
"Благодарение на таа посветеност денеска ДУИ е партија со најголема доверба меѓу граѓаните Албанци во Македонија, но со висока почит кај меѓународната заедница. Немојте да дозволите емоциите да Ве совладаат и набрзина да го уништите тој тешко заработен политички капитал", порача Црвенковски.
Тој од Охрид ја тешеше ДУИ со зборовите: "Често пати искрената посветеност на програмските определби и цели во поголема мера се докажува кога си во опозиција, отколку на власт[/FONT]

 

[asterix_m]

НЕМА КВАЛИФИКУВАНА РАБОТНА СИЛА ВО ЗЕМЈАВА

Македонците учат, но не знаат да работат
Од Брисел потенцираат дека во последните две децении Македонија не инвестира во образованието, поради што над половина од работната сила е со средно образование

Фирмите во земјава не можат да најдат квалификувана работна сила, а невработените не се оспособени за да можат сами да почнат свој бизнис. Ова е ставот на дел од домашните економски експерти, со што тие го делат мислењето на Европската Унија, која предупреди дека нема економски развој со застарени образовни програми и без можност за преквалификација и доквалификација на работниците.

- Иако земјава руши рекорди со стапката на невработеност, не прави ништо за да ги преквалификува невработените во кадар што му е потребен на стопанството или да ги научи сами да тераат бизнис - велат експертите.

Од Брисел потенцираат дека во последните две децении Македонија не инвестира во образованието, а резултат на тоа е што над половина од работната сила е со средно образование. Универзитетски образовани се одвај 15 отсто. За Брисел е загрижувачка и бројката на младите високообразовни лица што ја напуштаат земјата и работат во странство или, пак, таму студираат.

Кадрите бегаат надвор

Бизнисмените се жалат дека имаат големи проблеми при барањето квалификуван кадар. Велат дека младите се едуцирани теоретски, но немаат практична обука за веднаш да почнат со работа.

- Посебно е нагласен проблемот во другите градови, бидејќи младите што се школуваат во Скопје остануваат таму или, пак, гледаат како да заминат од земјава. Затоа фирмите од внатрешноста не можат да најдат дури ни високообразовани млади лица, а камоли обучени - велат тие.

Според бизнисмените, поради ваквите состојби големите компании, посебно тие со странски капитал, почнале да увезуваат менаџери. Таков е случајот со „Митал стил“, „Фени“, со телекомуникациските компании.

Но вина им се префрла и на работодавците, кои не се подготвени да дадат пари за дел од своите вработени да ги пратат на обука во некоја светска компанија или, пак, на познат светски универзитет. Експертите коментираат дека во најголем дел од македонските компании владее стариот менталитет дека парите за образование на вработените се неисплатлива и скапа инвестиција.

Стопанствениците, пак, порачуваат прво државата да си ги дообразува своите службеници за да им го олесни бизнисот.

За возрасните нема работа

Во Агенцијата за вработување сметаат дека работите се движат кон подобро откако формирале сектор за анализа на пазарот на трудот.

- Приспособување на невработените кон потребите на стопанството е процес, а не настан, и ќе трае во континуитет. Ги следиме потребите на стопанството за образован кадар, а ќе се направи и закон, кој ќе придонесе за усогласување на образованието со пазарот на трудот. Досега вршевме обука на невработени само за познат работодавец на нивно барање, а сега ќе можеме да обучуваме невработени за непознат работодавец, односно кадар што недостига - вели директорката на Агенцијата, Јасминка Делчева-Диздаревиќ.

Таа информира дека до крајот на јули годинава се потрошени 28 милиони денари за преквалификација на невработени. Според неа, Агенцијата нема програми за обука за постари невработени лица што останале без работа во транзицијата бидејќи работодавците не ги сакаат.

Според податоците на Министерството за образование, речиси половина од населението на возраст од над 15 години има неповолно образовно ниво.

Без образование се 3,85 отсто од граѓаните, со незавршено основно образование се 10,77 отсто, а со средно образование 77 проценти.

Според последните податоци на Агенцијата за вработување за јуни, од вкупно 324.695 невработени во земјава, неквалификувани се околу 143.000, полуквалификувани 12.595 , квалификувани речиси 60.000 и висококвалификувани се пет невработени лица.

Во Програмата за образование на возрасни лица, што ја подготви Министерството за образование, пишува дека во нашата земја не постојат стимулативни мерки за образование и обука на вработените.

„За нив нема финансиски бенефиции и даночни олеснувања. Газдите сметаат дека инвестицијата во образованието и обуката на вработените е неисплатлива“, пишува во Програмата.