ДУИ подготвила две верзии на закон за употреба на знамињата кои ќе ги стави на маса на идната лидерска средба, која најверојатно ќе се одржи на 11 февруари. Првиот предлог на интегративците е идентичен со оној од кој Уставниот суд пред извесно време укина дел од одредбите.
Вториот предлог пак предвидува одредби според кои албанското знаме, заедно со Македонското, ќе може да се вее пред Владата, Собранието, на граничните премини.
-Ако Уставниот суд ги укина одредбите од претходниот закон за употреба на знамињата на етничките заедници бидејќи се маргинализирале тоа значи дека Албанците се над 20 проценти на територијата на цела Македонија и Албанското знаме може да се вее заедно со Македонското пред Владата,Собранието,на граничните премини и пред градското Собрание,а на останатите заедници пред органите на локалната самоуправа,велат во ДУИ.
Освен оваа тема, ДУИ и ДПА се очекува повторно да се обидат на маса да ги стават и прашањата за употреба на јазиците и за жртвите од конфликтот во 2001 година.
Ќе се дискутира и за предложените измени на Изборниот законик откако ВМРО-ДПМНЕ до Собранието веќе доставија предлози за гласање на дијаспората и загарантирани квоти за малите етнички заедници.
Лидерката на СДСМ Радмила Шекеринска вчера изјави дека социјал-демократите на оваа лидерска средба ќе се обидат да наметнат дискусија и за економски теми.
-Треба што поскоро да продолжиме со лидерски средби, но тие да бидат продуктивни. Ако во Собранието се отвара прашањето на Изборен законик или други партии лицитираат со закон за Уставен суд мислам дека е пет до 12 за одржување на лидерската средба.Мојот став е, треба да се спречи, а не да се лечи.
Најпрвин треба да ги завршиме темите кои ги започнавме. Ние како СДСМ ќе ја номинираме нашата тема, а тоа е законот за минимална плата, изјави Шекеринска.
Вечер
