ЗА МАКЕДОНСКО ПОМИРУВАЊЕ И ОБЕДИНУВАЊЕ
Светскиот Македонски Конгрес побара договор меѓу ВМРО-ДПМНЕ и СДСМ
Претседателот на Светскиот Македонски Конгрес, Тодор Петров денеска во штабот на ВМРО-ДПМНЕ и СДСМ предаде присмени дописи со нацрт договор за македонско обединување и одбрана на државата, нација и националните интереси, информираат од СМК.
Обраќајќи им се на претседателите на партиите, Петров во писмото наведува дека државата и нацијата веќе подолго време транзитираат низ политичка криза, која прераснува во омраза и одмазда.
- Општеството предолго е во агонија и под стрес поради суети и лични интереси. Не смееме никогаш да заборавиме дека, македонската цивилизација е цивилизација на мирот и љубовта наспроти омразата и војната, македонската цивилизација е цивилизација на толеранцијата и коегзистенцијата наспроти дискриминацијата и сегрегацијата, македонската цивилизација е цивилизација на културниот глобализам што подразбира интеграција со афирмација на помесните етноси јазици религии и култури, наспроти корпоративниот глобализам кој врз основа на профитните интереси на мултинациионалните корпорации врши интеграција со асимилација на помесните етноси јазици религии и култури се до нивна физичка ликвидација од земјината топка – стои во писмото.
Тој истакнува дека во контекст на најновите случувања, СМК смета дека албанска платформа подготвена во Тирана под покровителство на албанскиот премиер Еди Рама со лидерите на ДУИ, Беса, Алијансата за Албанците и ДПА, Али Ахмети, Билал Kасами, Зијадин Села и Мендух Тачи како услов пред македонскиот партнер за избор на нова влада после вонредните парламентарни избори, претставува грубо мешање во внатрешните работи на Република Македонија.
- Повторувајќи дека Македонија е единствениот заеднички именител и содржател на сите Македонци, на сите македонски државјани независно од етничкото потекло, верското уверување, социјалната положба и политичката припадност, Светскиот Македонски Конгрес апелира до ВМРО-ДПМНЕ и СДСМ и покрај сите разлики, да покажат државничка зрелост и мудрост и безусловно да ги отфрлат ултимативните барања на партиите на Албанците за состав на Влада – стои во писмото.
Понатаму се наведени точките за договор, а тоа се:
(1) Безусловен крај на разговорите за разликата по државното име со Владата во Атина, со поднесување на Резолуција до Генералното собрание на есенското заседание за продолжување на членството на државата Македонија во Обединетите Нации и во сите меѓународни организации со нејзиното име, без латинична транскрипција на македонскиот јазик (Republika Makedonija), туку на англиски јазик (Republic of Macedonia), со можност за употреба на уставната додавка “Република“ како јасна разлика од истоимената северна провинција на Грција и југо-западна провинција на Бугарија, со меѓународниот код МК односно МКД и нотификација на Македонскиот народ и Македонскиот јазик, независно од историските хипотеки од Балканските војни 1912-1913 година - окупацијата врз Македонија и геноцидот врз Македонскиот народ.
Горното:
(1.1) Потсетувајќи дека прашањето за името на државата е затворено со референдумот од 8 септември 1991 година, кога Македонскиот народ, односно македонските државјани во апсолутно мнозинство гласаа „ЗА СУВЕРЕНА И САМОСТОЈНА ДРЖАВА МАКЕДОНИЈА“ без додавки и без придавки, одлуката на референдумот е задолжителна за сите!
(1.2) Имајќи предвид дека правото на државното име Македонија е неотуѓиво, неотстапно и неприкосновено веќе апсолвирано право на самоопределување и самоидентификација на Македонскиот народ, а не малцинско прашање!
(1.3) Знаејќи дека Македонија во членство на Обединетите Нации е примена на Генералното Собрание со Резолуција 47/225 од 8 април 1993 година, а по препорака на Советот за безбедност со Резолуција 817(1993) од 7 април 1993 година, во коишто не се прејудицира промена туку разговор за разликата по државното име Македонија со Владата во Атина, со напомена, додека траат разговорите, само за системот на ООН, и времено, на Македонија да и’ се обраќаат како “поранешна Југословенска Република Македонија“,
(1.4) Повторувајќи дека “поранешна Југословенска Република Македонија“ не е меѓународно име чијашто замена се договара со ново меѓународно име, туку времено обраќање само за системот на ООН додека траат разговорите за разликата за државното име Македонија меѓу владите во Скопје и Атина, и дека Македонија нема сложено или композитно име што се состои од два и повеќе збора, ниту име за внатрешна употреба и име за надворешна употреба, ниту име за дома и меѓународно име за светот, туку името на државата се состои само од еден единствен збор - зборот Македонија.
(1.5) Имајќи предвид дека барањето за прием во членство на Обединетите Нации е поднесено под државното име Македонија, содржано во документот А/47/876-S/25147 и
(1.6) Тргнувајќи од пресудата на Меѓународниот суд во Хаг од 5 декември 2011 година по тужба од Македонија против Грција во 2008 година, со која се суспендира суспензивното право на Грција во меѓуародните организации, и се потврдува правото на Македонија да поднесува барање за членство и да членува во меѓународни оранизации под државното име, со право Грција само “да приговара доколку во овие меѓународни организации ни се обраќаат под државното име, различно од временото обраќање во ООН додека траат разговорите“ и ништо повеќе од тоа.
(2) Организација на попис на населението и донесување на Уставна декларација во Собранието со гаранции за правата и слободите на малцинските етнички заедници утврдени во Уставот, независно од пописните резултати.
(3) Склучување на Договор за траен мир и добрососедство меѓу Република Македонија и Република Албанија и Договор за положбата и правата на Македонците во Република Албанија и положбата и правата на Албанците во Република Македонија, со реципроцитет во македонско-албанските односи - што за Албанците во Република Македонија, тоа за Македонците во Република Албанија во согласност со меѓународното право.
(4) Почитување на унитарноста и непроменливост на етничката и верската карта на државата, бидејќи етничките прашања немаат територијални решенија и отфрлање на барањата за територијална или функционална федерализација и кантонизација на Република Македонија.
(5) Почитување на Македонскиот јазик и неговото кирилско писмо како службен јазик на целата територија на Република Македонија и во нејзините меѓународните односи и употреба на јазиците и писмата на малцинските етнички заедници во согласност со членот 7 од Уставот на Република Македонија.
(6) Процесуирање на сите пријави во кои има основано сомневање за сторени кривична дела пред Јавното обвинителство избрано од новото Собрание на Република Македонија и почитување на уставните гаранции за слободата и неповредливоста на сите облици на комуникација, со препорака до сите кои располагаат со докази да ги предадат на надлежните органи, имајќи предвид дека и прикривањето на докази е кривично дело соучество.
(7) Обезбедување на рамномерен економски развој на целата територија на Република Македонија и најбрз развој на недоволно развиените подрачја.
(8) Отфрлање на агресијата и насилството заради остварување на политички цели и заштита на имотите, животите и приватноста како неприкосновени, како и отфрлање на меѓународна арбитража за решавање на внатрешно-политичките прашања и мешање во внатрешните работи на Република Македонија.
(9) Грижа за положбата и правата на припадниците на Македонскиот народ во соседните земји и за иселениците од Македонија, помагајќи го нивниот културен развој и унапредувајќи ги врските со нив, како и грижа за културните, економските и социјалните права на македонските државјани во странство.
(10) За евро-атлантските интеграции на Република Македонија ќе решаваат македонските државјани на референдум, кога ќе бидат исполнети условите за тоа, а Собранието и Владата да ги преземат сите мерки за заштита на мирот и безбедноста, и суверенитетот и територијалниот интегритет на државата поради илегалната емиграција.
