http://www.mkd.mk/makedonija/politika/albanskite-politichari-i-pejachi-vo-makedonija-vo-hor-go-pozdravija
ПРВИ РЕАКЦИИ ПО ВЧЕРАШНИОТ НАТПРЕВАР СРБИЈА-АЛБАНИЈА
Албанските политичари и пејачи во Македонија во хор го поздравија хулиганството во Белград
Нема официјални реакции од партиите на Албанците во Македонија во однос на вчерашната провокација со веењето знаме со карта на „Голема Албанија“ среде Белград. На таа карта е „одземен“ и дел од Македонија. Нема ни официјални реакции за синоќешните немири во неколку македонски града и за штетите што се направени притоа.
Меѓутоа, пратениците на ДУИ, партија што е дел од владината коалиција, Артан Груби и Ермира Мехмети, потрчаа со изјави по медиуми и преку социјалните мрежи да ги поддржат инцидентите и во Србија и на Косово и во Македонија.
Груби и како шеф на кабинетот на лидерот на ДУИ, Али Ахмети, откако присуствувал на синоќешниот натпревар меѓу Србија и Албанија во Белград за српските медиуми, ја даде следнава изјава: „Српските власти ја сносат целата одговорност за сè што се случи на стадионот во Белград. Самата атмосфера беше многу тензична, неспоредлива дури ни со натпреварот Србија-Хрватска, според она што ми го изјавија некои од српските навивачи“.
Тој на прашањето како го коментира веењето знаме на „Голема Албанија“ на фудбалски натпревар одговара: „Знамињата не сеат омраза, туку луѓето. За Албанците знамето е свето, затоа што не е државно, туку национално знаме. Јас сум шокиран од омраза што ја видов на стадионот Партизан во Белград, која не се опишува“, вели Груби во изјавата за НОВА ТВ.
Груби се чини заборавил да спомене дека над гледачите на стадионот во Белград не се вееше националното албанско знаме, туку знаме на кое беше картата на „Голема Албанија“. На таа мапа има додаден дел од Србија, од Македонија, од Црна Гора и од Грција. Како поинаку да се нарече ова освен хулиганство, па и според стандардите на самата УЕФА, која
се колеба кого треба казни.
И за пратеничката Ермира Мехмети нема ништо спорно во тоа знаме. Таа, заедно со пејачките Аделина Тахири и Туна Сејдиу, секогаш
спремни за националистички восклици и поддршка за хулиганството, го поздрави веењето на знамето на „Голема Албанија“ над стадионот во Белград.
Ермира Мехмети на фан-страницата на Лорик Цана, капитен на репрезентацијата на Албанија, напишала коментар: „Најубавото знаме во светот“.
Пејачката Аделина Тахири на својот профил на Инстаграм напиша дека посакува таа да стоела зад делото во кое се виореше знамето на „Голема Албанија“.
„Не се задевајте со нас“, напиша Туна, која со „браво“ го поздрави потегот на капитенот на албанските репрезентативци кога удира навивач на Србија.
Никој од нив не кажа ни збор за чувството на Србите, на Македонците, на Грците, на Црногорците по еуфоријата со подметнувањето една ваква карта под носот на Србите. Никој ништо не кажа за синоќешното дивеење по улиците на Скопје, Тетово и Струга по натпреварот. Никој не праша што славеа вчера овие луѓе? Зошто чкрипки по Тетово? „Голема Албанија“ среде Македонија?
Никој не кажа ни збор осуда за обидот за линч во Косовска Митровица кога толпа народ од јужната страна (албанската) тргнала преку мостот на Ибар кон северната страна (српската) на градот. Сите заборавија на свиркањата при интонирањето на албанската химна на натпреварот. Што значат скандирањата „Голема Албанија“ или „етничка Албанија“?
И додека нашите политичари и естрадни уметнички се пенават во хорот што го поддржува ваквото хулиганство, една новинарка од Приштина на својот фејсбук-профил ја осуди провокацијата со албанското знаме за време на фудбалскиот натпревар меѓу Србија и Албанија во Белград и додаде дека вчера, сите луѓе насобрани во центарот на Приштина го славеле чинот со летањето на дронот со етничкоалбанското знаме и сите биле пресреќни и се пенавеле.
Во Приштина овие денови ќе биде неиздржливо поради вжештената националистичка атмосфера по овој инцидент во Белград, вели таа.
Мора да се согласиме, вистинско освежување во хорот.