Една од жртвите на „бракот за секс“, Наушин Тобасум од Хидербад, ги разоткрила размерите на овој бизнис кога побегнала од дома откако родителите ја присилиле да стапи во брак со средовечен Суданец, кој платил околу 1.200 фунти за таа да му биде „жена“ четири недели, пренесува Би-би-си.
Наушин ѝ кажала на полицијата дека тетка ѝ ја одвела во хотелот каде таа и уште три тинејџерки му биле претставени на директор на суданска нафтена компанија. 44-годишниот Осама Ибрахим Мухамед оф Картум, кој е женет и татко на две деца, подоцна дошол во нејзината куќа каде свештеникот „квази“ го извел обредот на венчавање.
Според зборовите на инспекторот Виџеј Кумар, Осама ѝ платил 100.000 рупии (околу 1.200 фунти) на тетката, а таа од тие пари 70.000 рупии им дала на родителите на Наушин, 5.000 на свештеникот, 5.000 на преведувачот на јазикот урду и задржала 20.000 за себе. Покрај венчалниот лист се издава и „талакнама“, документ со фиксиран датум на развод, кој се совпаѓа со крајот на одморот на „младоженецот“.
„Кога дошол кај девојчето, тој побарал секс, но таа го одбила. Младоженецот е постар од нејзиниот татко“, објаснил инспекторот Кумар.
Наушин побегнала од дома, и успеала да најде полициска патрола. Биле уапсени и младоженецот,нејзината тетка и свештеникот, а бил даден и налог за апсење на нејзините родители, бидејќи Наушин е малолетна, а според индиските закони таа не може да се мажи пред да наполни 18 години.
„Морав да соберам храброст и да отидам во полиција“
Инспекторот Кумар потврдил дека се склучуваат стотици вакви краткорочни бракови. Осама во Индија дошол по препорака на пријател, бидејќи во неговата земја за секс мора да плати и до трипати повеќе, бидејќи таму понудата е многу помала, а може да земе и втора жена.
Кумар објаснува дека странците се женат со млади Индијки затоа што според исламските закони проституцијата е забранета, а сиромашните девојки на овој начин собираат пари за „вистинската“ венчавка.
„Не знаев што се случува, тие ме натераа на тоа. Го сменија датумот на моето раѓање во изводот од книгата на родени, за да изгледа дека имам 24 години. Ги експлоатираат девојките, и затоа отидов во полиција. Морав да соберам храброст и да ги пријавам родителите. Дома не се враќам бидејќи се плашам“, вели Наушин Тобасум, која денес живее во државен дом за девојки.
Според податоците на Здружението за заштита на жени и деца, само во Хидербад месечно се склопуваат околу 15 договорни бракови, а бројката постојано расте.
