Чорбаџија, нешто што ме интересирало а не сум нашол конкретно по нетов. Знам кои се обичаите на православните, нешто помалку знам (но имам кого да прашам директно) за римокатолиците. Ме интересира дали во вашата деноминација (не познавам никого лично) постојат некои усталени обичаи, посебно околу Велигден, дали постојат 40-дневни пости, дарување, кршење и симболика на јајца или друг обичај зао Великиот Ден, дали има богослужби како и во другите христијански религии.
Протестанско-евангелските цркви, наспроти традиционалните (католичка, православна, некои англикански), немаат некои стрикни или облигативни обичаи поврзани со празници или сл..
Тоа не значи дека протестантите не ги слават Божиќ и Велигден, туку дека немаат никакви обичаи од типот дека нешто мора да се прави вака или онака, да се вапцаат јајца во четврток наутро, или во петок, да се меси лепче со паричка, да се врти три пати лево, два пати десно, да се палат огништа, да се врти околу храмот со свеќа во раката, да се јаде ваква храна, а не таква, кумот вака, невестана онака итн. Вакви обичаи нема меѓу протестантите. Како што кажав, тие се држат до Светото Писмо и само до Светото Писмо и го вредуваат истото како Божји Збор. Штом во Библијата нема заповеди или правила за празнувањето на Божиќ или Велигден, тоа значи дека ни протестантите немаат одредени регулативи кои мораат/требаат да ги прават околу овие празници. Тоа не значи дека никој не смее да бојадиса некое јајце и дека е грев ако го стори тоа. Едноставно тоа нема никакво верско значење за протестантот, туку чисто уметничка работа. Сепак ретки се тие го прават тоа и најчесто тоа се од оние фамилии каде што дел од нив се протестанти, а дел православни.
Еве на пример кај мене дома, моите се православни, а јас не. Мајка ми вапцаше јајца пред Велигден (според обичајот кој таа го следи). Јас си ја правев омилената салата (Мимоза) и сакав во неа да си ставам белки од варени јајца. Без никакво чувство на вина си земав од вапцаните јајца, си искршив (иако сеуште не беше Велигден) и си ставив во салатата. Православниот верник кој го следи обичајот дека кршењето на велигденските јајца мора да биде после полноќ (кога настапува неделата) тоа не би го направил, а доколку го направи, ќе го гризе совест дека направил нешто што не е Богоугодно. Но протестантот нема проблем со совеста затоа што, според Неговото убедување, Бог не поставил такви заповеди/регулативи во Неговата објава - Библијата, туку тоа се само обични народни обичаи - меѓу кои, како што и самата забележа, има и некои пагански. Паганските обичаи, особено со оние кои се косат со Библијата, строго им се забранети на протестантите и тие со такви работи не прават компромиси по никоја цена следејќи ја премисата дека првенствено треба да Му се послушни на Бог, наспроти луѓето. Јас неколку пати сум се нашол во незгодна ситуација (на пример да одбијам да бацам рака на поп, или да одбијам да се поклонам пред икона), но искрената вера во Бог ми дава сила да преминам преку тие незгодни ситуации.
Околу празнувањето на Божиќ или Велигден, бидејќи нема правила, регулативи, обичаи, секоја локална протестантска црква си ја прави прославата онака како што ќе си се договорат, по сопствен мекар. Бидејќи е празник, најчесто е попратен со пригодна музичка програма, со молитви на благодарност, со некоја пригодна Божиќна или Велигденска порака (проповед), потоа евентуално со частење (сокче, благо), ако е сончево можеби заеднички излет со верниците од заедницата (бидејќи е неработен ден) и сл. Значи суштината е Христовото раѓање и воскресение и голем акцент се става на тоа, на придобиквите од овие настани, на славање за тоа што Бог го направил за нас. А формата, начинот на кој што ќе се направи тоа, си го одредуваат самите верници, зависно од тоа како се расположени, колку финансии имаат и сл.
