Владата не испратила делегација, нејзини членови приватно биле во Слупчане
Владата нема донесено одлука за одбележување на настанот во Слупчане, ниту има испратено официјална владина делегација на тој настан.
Како што соопшти попладнево владината прес служба, овој настан за Владата нема никаков официјален карактер, ниту државен третман.
- Од овие причини и врз основа на законите, појавувањето на лица кои во моментов се членови на Владата на овој настан, за Владата има третман на нивна приватна посета на приватна комеморација, зашто ниту Владата ги испратила на таков настан, ниту им дала овластување на тој настан да ја претставуваат, ниту да зборуваат во име на Владата, ниту настанот има официјален државен карактер, се наведува во соопштението.
Владата не може да преземе мерки кон лица кои во свое слободно приватно време и во приватен ангажман се појавиле или зборувале на некој настан.
- Појавувањето на определени лица на тој настан и она што било истакнато од определени лица на тој настан во поглед на појавувањето или за друг аспект, не ги одразува политиките и позициите на Владата, и не може да се става во корелација со официјални ставови и погледи на Владата, стои во владината информација.
Владата го поддржува развојот на мултиетничкото општество и работи во таа насока, но и истовремено цени дека градењето доверба меѓу заедниците не може да се остварува ефективно со изолирани настани кои немаат широка поддршка во јавноста, како и со ставање определени настани во функција на политичко-партиска агенда. Напротив, може да се остварува со широко прифатени активности кои нема да ги повредат или злоупотребат чувствата на граѓаните или основите на државно правниот развој.
Владата, се додава, не ги прифаќа обидите за политизација на овој изолиран настан кој не ја одразува владината политика во партиски пресметки. Воедно информира дека функциите на државата во општествениот, политичкиот, економскиот и безбедносниот систем се исполнуваат соодветно и единствено и нема никаква потреба од загриженост на граѓаните од овој аспект.
--- надополнето: 15 август 2012 во 22:21 ---
Иванов не се согласува со Бесими за поклонувањето на УЧК
Потписот на рамковниот договор од Инстутицијата Претседател на државата значи одобрување на чествување на паднатите припадници на ОНА, Вака Министерот за одбрана Фатмир Бесими го образложи својот чекор во Слупчане.
- Институцијата Претседател на Република Македонија го дава своето „за“ со самиот потпис на Охридскиот договор, што е составен дел од Уставот на Република Македонија, одговори Бесими.
Според Бесими и присуството на двајца припадници на АРМ во униформа е во согласност со законите и уставот на Република Македонија.
- Пред вас сум како министер за одбрана на сите граѓани на Република Македонија било да се Македонци, Албанци, Турци, Власи, Срби, Роми...Убеден сум дека најголем дел од граѓаните сакаат во Република Македонија ги поддржуваат насоките за градење заеднички живот и меѓусебно почитување како најсигурен гарант за иднината на државата, рече министерот за одбрана Фатмир Бесими.
Но од кабинетот на Претседателот Иванов не сметаат така. Во писмена реакција испратена до медиумите се вели дека не биле испочитувани институционалните правила и процедури. Иванов побара од надлежните расветлување на случајот и утврдување на постоење на злоупотреба на службената должност од страна на Бесими.
Униформираните лица во придружба на Министерот за одбрана, не се во формацискиот состав на Армијата на Република Македонија, туку членови на Кабинетот на министерот.
Присутните воени лица со чинови, не го испочитувале Законот за Воена служба и врз основа на истиот ќе се бара нивна одговорност.
Министерот не даде одговор за негова евентуална оставка. Негираше и дека овој случај создал тензија во владеачката коалиција.
Во текот на вчерашниот ден владејачката ДПМНЕ се огради од постапката на Бесими во Слупчане. Истото го направи и началникот на Генералштабот Котевски, кој информираше дека не бил запознаен со оваа активност на министерот за одбрана.
Антонио Крстевски
.