Очајно ми треба вашиот совет. Имам двегодишна врска. Го сакам , ме сака, многу ми е убаво со него, но има само еден проблем. Фејсбук ми ја уништува врската. Пред да почнете да ме осудувате, да ви ја раскажам целата приказна. Бевме заедно 3-4 месеци кога за првпат дечко ми ме седна на компјутер и ми рече да го отворам фб. Бидејки немав што да кријам, го сторив тоа. Кога дојде неговиот ред, да го стори истото, имав што да видам. Мислејки дека ги избришал - тој само ги архивирал - безброј пораки пишувани на различни девојки. Девојките беа непознати, а ги имаше во главно од оние разголените, провокативните, имаше и стари и млади, и мажени со деца, а пораките - флертувачки, и со комплименти. Станав од компјутер и си тргнав да си одам. Ме стигна, ме молеше, ме преколнуваше, немало веќе така да прави, тоа за него било само забава. Му простив, а уште од истиот момент станав болно љубоморна. Врската ни функционираше одлично, ама во глава сеуште го носев сомнежот дека го прави истото. После некое време му побарав јас пред мене да отвори фб - несакаше. Беше повеќе од јасно дека таму имаше работи што јас не требаше да ги видам. Пак се скаравме, и пак се простивме. Еден период имав и негова лозинка, и тој имаше моја. И како во добро познатата „ако нешто се случило двапати ќе има и трет пат“, тоа се повтори уште неколку пати. Ќе прочитав некој разговор што заборавил да го избрише, ќе додадеше некои што не ги знае... Кавгите беа неизбежни. Еден ден си ја смени лозинката и рече дека подобро било да ја немам. Немало да се караме, а тоа за него било минато немало да прави така и сл. Јас се согласив ама тој незнаејки дека јас имав активирано на мобилен да ми стасуваат пораки од неговиот фејсбук - продолжи со тоа. Прочитав порака од некоја девојка, и добив известувања за неколку боцкања. Не можев да издржам и му кажав дека знам се. Пак кавга, му раскинувам, ама не можам да издржам и се враќав назад. Еве две години како одиме, а приказната е иста.
Барам совет за тоа што да направам. Дали да сум уште со него? (веќе два дена како му раскинав, не кревам на телефон ни ништо). Инаку врската без фејсбук ни е прекрасна. Можам и раката во оган да ја ставам дека ме сака. Ама зошто прави такви работи. Пораките што сум ги прочитала во ниеден момент не наговестуваат дека тој имал нешто со тие девојки. Тие се некои непознати, ама ете тој им пишува. Им симнува ѕвезди. Се боцка со разголени типки. Јас тоа веќе не можам да го издржам, ама и не сакам да го загубам. Сакам совет како да го вразумам да не го прави тоа?
Врската без Фејсбук ви е супер... А со Фејсбук не ви чини... Зошто сè уште го консултираш Фејсбук?
Затоа што тој ти го покажал? Па супер, тоа е негова забава, таму им пишува секакви умилкувања на разни девојки. Зошто тоа тебе те интересира, ако го сакаш? Зошто, ако тоа придонесува вашата врска да е убава, да ти претставува тебе проблем? Исто така, зошто неговата забава мора да биде и твоја? Зарем немаш твој сопствен начин на поминување на времето?
Додека е со тебе, врската ви е супер. Кога е на ФБ, тој си се забавува со кого стаса и си ги вентилира фрустрациите или што и да е, за кога следниот пат ќе бидете заедно пак да ви биде супер. Зошто имаш против тоа?
Според мене, решението е да си најдеш твое сопствено хоби или начин да си го поминуваш времето без него. Запиши се на курс за јазик, оди на фитнес да вежбаш, најди ново друштво кадешто не е тој... Најди нешто да правиш што не го вклучува него, за да видиш што е тоа што всушност те држи покрај него. Можеби има и други луѓе таму некаде, а ти не ги знаеш.
Во твојот случај, мислам дека си љубоморна не на тоа што тој зборува со различни девојки, туку на тоа што тој си има свој вентил што е само негов и до којшто ти немаш пристап. Можеш и ти да го правиш истото, ако сакаш, но тоа веќе ќе биде твој вентил, а не ваш заеднички. Со други зборови, тој си има начин да си ги помине времето и без тебе, а тоа тебе те фрустрира, зашто мислиш дека не си му „доволно значајна“ за да го поминува целото време со тебе.
Вие сте во врска, не сте во брак. Неговото време тој *бира* да го поминува со тебе, *не мора* да го поминува со тебе. Не си позначајна од која и да е девојка со којашто таа го поминува своето време, макар тоа било и ФБ. Ако *му значиш*, фактот што сте во врска (претпоставувам дека е целосна, со физичка т.е. сексуална блискост, како и емотивна) тој ќе го цени и ќе се обиде да ја задржи таа врска затоа што *му значиш*, како што може да се гледа од фактот дека тој и покрај твоите испади и раскинувања пак се смирува со тебе (барем до последниот твој испад). Со други зборови, ако раскинете, тој подобро ќе помине од тебе, затоа што ќе има избор од други луѓе, посебно девојки, со коишто ќе може да комуницира и од коишто ќе може да одбере следна потенцијална партнерка. Можеби ти тоа интуитивно го знаеш, па си му се враќала. Фактот што воопшто те примил назад после раскинувањето кажува дека му значиш, инаку ќе те откачел и воопшто немало да те прими назад.
Во секој случај, во таа врска вие не сте рамноправни - тој е во подобра позиција бидејќи има отстапка при раскинување. Ти немаш, бидејќи претпоставувам дека целосно си му се предала нему во врската и си престанала да се занимаваш со себе и со своите потреби. Не е тоа здрава врска - здрава врска е кога двајцата партнери се доволно способни сами да преживеат, но *сакаат* да бидат еден со друг, поради која и да е причина. Под „преживување сами“ значи дека си го пополнуваат времето со активности што им се значајни само ним, без разлика што кој и да е друг ќе каже за тоа. Со други зборови, дечко ти (сега веќе поранешен) сака да си прави муабет со други девојки на ФБ и тој тоа ќе продолжи да го прави, *без разлика на тоа што ти немаш таква забава*. Тоа е само негово и ти тука немаш право да му се мешаш.
Ти преостанува да работиш на себе. Изгради се во личност којашто нема да зависи од времето и вниманието на другите и којашто ќе има свој живот и го води самостојно. Доколку до толку многу ти пречи тоа што дечко ти (веќе поранешен) има свој вентил, а ти немаш (т.е. до толку си љубоморна), немој веќе да се смируваш со него. Најди си свој вентил и дури тогаш ќе може да го разбереш и да го прифатиш таков каков што е. Ако тој те цени, ќе го разбере тоа, а ако те сака, дури и ќе ти помогне да си најдеш свој вентил, без разлика на тоа дали вие понатаму ќе продолжите заедно.
Според мене, во дадениов момент вашата врска е подобро да ја прекинете. Не затоа што тој прави ова или она, туку затоа што постојано се карате, раскинувате и се смирувате. Дали сакаш да имаш врска базирана на кавги, прекини и смирувања? Според мене, врска којашто се базира на раскинување не е вистинска врска, туку е само продолжено раскинување. Ти не можеш да се помириш со тоа што тој е друштвено подобро позициониран од тебе и тоа е тоа. Прекини пред да се оддолжи.
А додека си сама, исполни го времето и стани поцелосен човек. Ова што ти се случува е само знак дека треба да пораснеш и да ја пополниш дупката што ти се појавила во животот. И биди среќна што си имала човек покрај себе што таа дупка ти ја воочил и направил да почувствуваш потреба да ја пополниш.
Поздрав и со лесно.
