Студентите до Филе: Ние сме Македонци, не тргуваме со нашите чувства и традиција
Писмо од македонските студенти потпишано од Иван Живковски, претседател на Студентскиот парламент при УКИМ, Александар Митревски, претседател на Студентскиот парламент при универзитетот Св. Климент Охридски и Трајче Здравков, претседател на Студентскиот парламент при Универзитетот Гоце Делчев денеска беше испратено до еврокомесарот за приширување на ЕУ, Штефан Филе.
Во продолжение интегрално ви го пренесуваме писмото од македонските студенти.
На почетокот, од името на македонските студенти, би сакале да ги изразиме нашите длабоки верувања во европските вредности, во демократијата, толеранцијата, почитување на културната разноликост и уважувањето на можностите за непречен развој на поединецот и нацијата.
Сакаме да Ве известиме дека македонската студентска јавност со длабоко разочарување и горко чувство на разочараност ја прими веста за непостоење на терминот “македонски” како лингвистичко средство за идентификација на нашиот јазик и нашата националност во последниот Извештај за напредокот на Република Македонија. Уште повеќе не вознемири информацијата дека и на неколку настани кои следат по врачувањето на Извештајот, претставници на Европската комисија и на Европската унија, во своите јавни и затворени настапи не го користат терминот македонски и го заменуваат со определени супститути кои уште повеќе го засилуваат чувството на сеопшта девалвација на нашиот народ и нашите атрибути.
Иако може да ги претпоставиме мотивите, никако не можеме да разбереме која е оправданоста на ваквото однесување од страна на претставници на европската заедница која во своите темели ја има вградено разноликоста и културниот и национален диверзитет како темелни вредности. Не можеме да сфатиме како мислите заеднички да ја шириме и промовираме европската максима за еднаквост во различностите, а од друга страна дрско и брутално да ни ускратувате да бидеме Македонци, кои говорат македонски јазик и имаат македонска националност.
Нашата младост и нашиот ентузијазам не мотивираат и ни дозволуваат остро да протестираме против ваквиот тип на непринципиелно и крајно некоректно однесување. Оваа деградација која ја правите врз нашиот идентитет е удар врз нашите чувства, кој е суштински и кој може да остави длабоки последици во нашата реалност, и пред се да создаде недоверба на македонскиот млад човек кон принципите на Европската Унија и кон вредностите кои таа ги прокламира. Неискрениот однос на едно место или во една пригода, како што е оваа кон нас, може да биде протолкуван како општа неискреност, а тоа не е добро во ниту еден случај. Вие, ни го ускратувате правото на еднакви вредности, и на еднакви можности, Вие не ставате во нерамноправен третман со нашите врсници ширум Европа во културниот натпревар за нови вредности, дела и достигнувања.
Ние, како млади луѓе, кои цивилизациски и вредносно, а и природно припаѓаат на Европа сакаме и веруваме во идејата за сеевроспка интеграција и со целиот наш потенцијал, капацитет и кадровност работиме, веруваме и придонесуваме за интеграција на Република Македонија во Европската Унија.
Сепак, би сакале да Ви биде кристално јасно, дека во Европската Унија сакаме да влеземе и да продолжиме да придонесуваме кон нови заеднички вредности како Македонци и никако поинаку. Тука нема дилеми, и нема размислувања. Не очекувајте од нас да прифатиме да тргуваме со нашите чувства, со нашата традиција, со нашата генетска и културолошка определеност како Македонци, за било што, или за било каква придобивка. Во животот има приоритети, генерациите се одбележуваат по почитувањето на принципите, и ние немаме намера да потклекнеме на било каков притисок, или било каква непринципиелност, или пак да бидеме залажани од некакви блескави понуди кои немаат суштина. Го немаме тоа право, затоа што тоа зависи и од нашите предци, и од нашите наследници, но и да го имавме, ќе го отфрлевме со индигнација.
Македонските студенти, со почит Ви порачуваат и Ве замолуваат, сериозно да ги преиспитате Вашите поенти и Вашето однесување, и со сиот Ваш авторитет да ја прекинете оваа неубава појава која ја практикува Европската Унија во која што сеуште веруваме, и да се однесувате согласно меѓународното право кое е прифатено и верифицирано со принципите и документите на Организацијата на обединетите нации, каде што јасно и прецизно, нашиот јазик е означен како македонски, а нашата националност како македонска.
Почитуван г-дин Филе,
Европската унија е наш врвен приоритет, но ние нејзе ја замислуваме како Унија на вредности и принципи, а не на илузии, непринципиелност и трговија со души и ситни интереси заради солидарност.
Тврдењата, кои ги читаме во нашите медиуми дека Комисијата не е институција која признава јазици е потценувачка и навредувачка. Зошто тогаш Комисијата кога веќе не е таа која признава, не го употребува нашиот јазик, кој патем кажано е потврден во формуларот на Обединетите нации. Зошто директно се вмешувате во спорот со Грција во врска со нашето уставно име? Зошто тогаш се сите оние Ваши изјави дека спорот е за името, а не за јазикот, нацијата, односно идентитетот? Зошто завземате страна и како сметате понатаму да течат разговорите во спорот кога вие на Грција и давате таква комотна позиција, со која Грција сега може да чека колку сака, и нема никаква мотивација за решение?
Овие и многу други прашања заслужуваат одговор. Македонија заслужува одговор. Вредностите и принципите на Унијата за кои се бореа Моне, Шуман, Аденауер и другите, заслужуваат одговор.
Да живее Европската унија! Да живеат слободата, правдата и еднаквоста!
Конечно едно добро нешто од нашиве ни таканаречени студентски лидери.Освен претпоследната реченица во писмото.
