Пророчанствата се исполнуваат се' повеќе и повеќе со секој холокаос (духовен и практичен) кој се спрема, со цел да се истреби ВИСТИНАТА
Тогаш ќе ве предадат на мачење и ќе ве убијат; и ќе бидете мразени од сите народи, заради Моето име.(Мат.24:9)
НЕ ! ВИСТИНАТА СИ ОСТАНУВА НЕ МОЖЕ ДА СЕ ИСТРЕБИ !
.
.
.
Кеш? Ваистина кеш!
Денешниот верски живот во Македонија е полош од атеизмот во комунизмот. Ако чистотата на верата тогаш ја гарантирал нејзиниот силен противник, денес верата ја бербатат токму нејзините безбожни поклоници и лажни проповедници, на кои кешот им е единствената религија
Неодамна една анкета на „Галуп“ покажа дека Македонците најмногу и' веруваат на Црквата. Но, кога Македонците мислат на „црква“, ни случајно не мислат на храмовите како објекти, а уште помалку на нејзините земски посредници со Бога. Тоа само значи дека Македонците се молат на севишниот да ги избави од невработеност, од сиромаштија, од зло и од лажни проповедници. Во тој корпус спаѓаат и дел од владиците на Светиот архијерејски синод, бидејќи токму тие станаа антипод на се' што е синоним за вера и духовност. Напротив, тие се клерот кој сведочи за бескрајна љубов кон материјалното и за високосвештенство паднато на најниски морални гранки. Нив нема да ги препознаете по љубовта кон ближниот, туку по среброљубието, по претприемаштвото, по луксузниот возен парк, по рентирањето билборди пред храмови, по љубовта кон хотелиерството, по „духовновото“ пилјарство, по осветувањето дупки, курбани и камен-темелници, како доказ за еден материјализиран пагански бизнис.
Тие, речиси никогаш не можат да им помогнат на сиромашните, на гладните и на страдалните, но секогаш дебело наплаќаат за испраќање на починато Божјо чедо, за крштевка, венчавка...Неодамна воведоа и црковен развод. Експресно ќе ве разведат пред Бога само ако им дадете пари колку што налага нивната такса. Колку пониско им паѓа моралот, толку повисоко им растат акциите на берзата, куќите, имотите...
Овие експерти за финансиски обрт на народниот денар, единствено не штедат на земски страсти. Салоните за масажа веќе подолго се нивни параклиси, масерките - светици, а приградски куќарки на црвените фенери - манастири за осама и пост. Кога не би имало вакви свештеници, што едно проповедаат, а друго прават, Бог сигурно би бил прогласен за технолошки вишок. Но, на кого тој ќе им ги простува гревовите, ако не прво на своите грешни синови.
На тие „богоугодни чеда“ кои утре надмено ќе ви подадат рака за да ја бакнете понизно, задутре од лакомост ќе им се тресат и двете раце додека ги бројат парите што од неукост ги оставате за здравје врз иконите. Ним не им пречат парите залепени на челото на Богородица, ниту на градите на кои таа го држи своето чедо. Тие знаат дека богохулници така им лепат пари на евтини кафеански пејачки и на стриптизети, ама не им пречи и тие да се однесуваат како верски макроа и тоа на најголемиот христијански празник. Така е затоа што се одзиваат само на зборот Кеш. Кешот е нивната вистинска и единствена религија. Дозволија срамот да биде поголем од храмот. Може слободно да се каже дека денешниот верски живот во Македонија е полош од атеизмот во комунизмот. Ако чистотата на верата тогаш ја гарантирал нејзиниот силен противник, денеска верата ја бербатат нејзините безбожни поклоници и лажни проповедници.
Токму такви лицемери денес ламентираат над укинувањето на предметот веронаука. Ако немаме чесна практика, смешно е да се повикуваме на чиста теорија. Овде не е проблем што е укината веронауката, туку што етиката е срамнета со земја. И етиката ги учи младите да не лажат, да не крадат, да ги почитуваат блиските, да им помагаат на другите, ама не е воведена во наставната програма. Токму поради лакомоста на верските профитери што сакаат да чиноначалствуваат и со програмите на министерствата и со издавачката дејност и со профитите од учебниците и со авторското право врз етиката...
Утре е Велигден. Запалете ги кандилата во вашите срца, оти тие најсилно горат. Црковните свеќи и онака предвреме ви ги гасат или ви ги одземаат од рацете за да ги топат одново. Во прашање е профит, маржа, месечна заработка. Додека мрморат нешто што звучи како „Изгрев воскресе, навистина воскресе“, реплицирајте им најгласно: „Христос воскресе. Навистина воскресе.“ И не се поклонувајте напразно пред сечија мантија. Само таму каде што се љубовта, почитта и вистината, таму е и Бог.
Катерина Блажевска
http://www.dnevnik.com.mk/default.asp?ItemID=FE592C8EE9D34743843DFDD25BB56C6C
