За Црвенковски „граѓани на РМ“ било добар предлог
Посредникот на ОН покрај тројната формула за името во кирилична и англиска транскрипција, предложил во графата националност да нема Македонци, туку „граѓани на РМ“, а за јазикот неофицијално стоело македонски, иако во официјалниот документ на англиски јазик стоела нејасната кратенка МЦДС, што од тогашната влада на СДСМ било објаснето како техничка грешка
Тројна формула за името, „граѓани на РМ“ и нејасна кратенка за македонскиот јазик МЦДС, напишана на англиски.
Ова е дел од пакетот што посредникот на Обединетите нации Метју Нимиц го предложил до македонската и грчката страна во октомври 2005 година, а кој деновиве повторно доби на актуелност во домашната јавност. Повод за „отворање“ на „октомврискиот“ пакет предлози за решавање на спорот со името беше изјавата на заменик-министерот за надворешни работи на Грција, Димитрис Друцас дека „прашањата за идентитетот на македонскиот народ се на преговарачка маса од 2005 година“. Овој предлог, кој, како што изјави Друцас, бил даден од посредникот Нимиц, беше искористен за нови меѓусебни обвинувања на опозицијата кон ВМРО-ДПМНЕ дека е испуштена шансата спорот за името да се добие во наша корист уште пред 4 години. Од ВМРО-ДПМНЕ возвратија дека прашањето за идентитетот на македонскиот народ било поставено во времето на владеењето на СДСМ.
Предлозите на Метју Нимиц тогаш содржеле седум начини на обраќање кон Македонија, од кои за тогашната македонска власт прифатливи биле три. Имено, како што објави „Утрински весник“, Македонија дома ќе го употребува уставното име, а Грција ќе ни се обраќа со името „Република Македонија - Скопје“. Во меѓународните организации до 2008 година ќе се користи името „Република Македонија“ напишано на латиница и во македонска транскрипција, со фуснота дека таа е земјата што некои ја признават под името „Републиц оф Мацедониа“, а која со Грција има дипломатски односи под името „Република Македонија - Скопје“. По 2008 година ќе остане само името „Републиц оф Мацедониа“.
Во предлогот, исто така, во графата националност стоело да нема Македонци туку „граѓани на РМ“, а за јазикот неофицијално стоело македонски, иако во официјалниот документ на англиски јазик стоела нејасната кратенка МЦДС, што од Владата било објаснето како техничка грешка, пишува во текстот на „Утрински весник“ од 13 октомври 2005 година. Со посебна точка во договорот нашата земја се обврзувала во меѓународната комуникација да го употребува целосното уставно име Република Македонија, а не само Македонија, што значело во ОН нашата држава да се води под буквата „Р“, а не под „М“. Во предлогот била ставена обврската на генералниот секретар на ОН во 2021 година да ја преоцени состојбата и да определи дали има потреба од отворање нови преговори околу разликите за името меѓу Македонија и Грција.
Сегашниот лидер на СДСМ и тогашен претседател на Република Македонија Бранко Црвенковски и денеска смета дека предложениот пакет во октомври 2005 година бил „еден од најдобрите што бил ставен на преговарачка маса во целиот овој период“.
- Во него, на сериозен и позитивен начин, беа претставени нашите позиции во однос на клучните прашања. Што се однесува до идентитетските прашања предлогот беше апсолутно коректен, бидејќи за нашиот јазик се предлагаше придавката македонски, а за државјанство, државјанство на Република Македонија - изјави Црвенковски на обвинувањата дека во 2005 година за време на владеењето на СДСМ во преговорите било ставено и прашањето за идентитетот.
Тогаш опозициската ВМРО-ДПМНЕ, Светскиот македонски конгрес и Демократскиот сојуз на Павле Трајанов се изјаснија против предлогот на медијаторот Нимиц. Лидерот на опозицијата во 2005 Никола Груевски, по средбата кај претседателот на државата (Црвенковски) изјавил дека неговата партија „не го отфрла новиот предлог за решавање на спорот околу употребата на уставното име, но не го ни прифаќа“. Груевски сметал дека имало спорни точки што се однесуваат на јазикот, етничката припадност, но и за други битни прашања, за што ја повика Владата „добро да размисли и да не избрзува со одговорот, имајќи предвид дека Грција веќе го одби“.
Како што е познато, официјалните власти од Атина, тогаш експресно го одбија предлогот на Нимиц по само три часа од неговото објавување, со што цврсто ја искажа својата позиција за непостигнување на компромис. Забелешките на Грција се однесуваа на употребата на името на Република Македонија, но и од губењето на ексклузивното право на употребата на зборот Македонија, а доколку сакала да го употребува во рамките на својата држава, да ја користи формата - провинција Македонија.