И Ванга е Македонка. Нејзиното вистинско име е Вангелија Сурчева. Родена е во Струмица во 1911 година, а во 1923 година, за време на една силна бура, ослепела. Откако поминала две години во Домот за слепи во Земун, повторно се вратила во родниот крај. За првпат како пророчица се јавува во 1941 година, а од тој период познат е случајот кога на тогашниот бугарски цар Борис , кој во тоа време ја посетил Струмица, точно му претскажала кога ќе умре. Во 1942 година се омажила за бугарскиот војник Димитар Гуштеров, кој дошол кај неа да му гледа, а подоцна заено со него се преселиле во Петрич, каде што останува до крајот на својот живот. Почина во 1996 година.
Во Бугарија за Ванга се напишани три книги, а направени се и неколку документарни филмови. Нејзините феноменални способности да ја претскажува судбината на луѓето ниту се објаснети, ниту се аргументирано отфрлени. Како што објаснувала додека била жива, при контактите со луѓето гледала лица и слушала гласови кои очигледно биле невидливи и недофатливи за другите луѓе.
Професор Величко Добријанов, кој има направено едно од најсериозните иследувања на феноменот на Ванга, вели дека таа за време на една сеанса погодувала меѓу 58 и 86 проценти од фактите за посетителите што доаѓале кај неа. Истовремено, за време на тоа истражување тој следел и друго лице кое се занимавало со истата работа, меѓутоа во тој случај коефициентот на погодување на фактите кај нив не изнесувал повеќе од 20 отсто. Врз основа на истражувањето, тој доаѓа до сознание дека Ванга имала извонредно силна телепатска способност со чија помош ги читала мислите на луѓето.
