Поранешниот министер за внатрешни работи, Љубе Бошкоски, пред неколку часа пристигна на аеродромот “Александар Велики“, каде го пречека премиерот Никола Грувески, но и голем број пријатели и познаници.
Неколку илјади граѓани се собрани на скопскиот аеродром “Александар Велики“. Голем дел од насобраните се облечени во црвени маици со ликот на Љубе Бошкоски. Со нив е и “Фалангата“, чии војници се облечени во оклопи и носат штитови. На пречекот има и еден трубачки оркестар.
Во моментот на пристигнувањето на Бошковски во земјата, во ист час одекнаа 2.000 Светиклиментови камбани, во сите епархии на Македонската православна црква во Македонија, во САД, Канада, Австралија, Нов Зеланд и во европските земји, како израз на радост.
Според програмата на Координативното тело за пречек, предвидена е и кратка благодарствена молитва во Соборниот храм “Свети Климент Охридски“ во Скопје, по што Бошкоски ќе има средба со поглаварот на Македонската православна црква г.г. Стефан.
Вечерва во 19 часот на скопскиот плоштад “Пела“ Бошкоски ќе биде дочекан со специјална програма, во организација на Ансамблот за македонски песни и ора “Гоце Делчев“ и фестивалот на нови родољубиви и патриотски македонски песни “Гоце фест“, чиј претседател е Љубе Бошкоски.
Вчера во Меѓународниот суд за воени злосторства за поранешна Југославија во Хаг, на поранешниот министер за внатрешни работи му беше изречена ослободителна пресуда за случајот “Љуботен“. По завршувањето на процедурата тој беше пуштен од затворот во Шевенинген.
