Македонската кошарка слави, два наши клуба на Фајнал Фор на Еурохолд БИБЛ
ЛЕВСКИ “ИЗГОРЕН“ ВО ПЕКОЛОТ НА ЈАСМИН
Фени Индустри во незаборавен натпревар го совлада Левски со 81-62, надополнувајќи ја негативата од 16 поени. Македонија покрај Фени Индустри и Фершпед Работнички, на Фајнал Форот од Еурохолд БИБЛ ќе го има и Александар Тодоров, како тренер на Рилски Самоков.
Кавадарци и кошаркарска Македонија имаат уште една вечер за долго паметење. Фени Индустри уште еднаш на своите гледачи им овозможи вистинско уживање, во натпревар полн со драматика, тензија, емоции.. Левски падна во пеколот на салата “Јасмин“, четириесет минути беспоштедна борба со бугарскиот тим во кои паднаа навидум недостижните -16 од Софија.
Уште еден херојски настап на Златко Гоцевски и Доналд Кол, но и на одбраната на целата домашна екипа, која го натера противникот да направи дури 19 грешки, на крајот помалку чудната статистика токму тука го дава одговорот за убедливата победа на Фени Индустри.
Уште од самиот старт домашните, носени од триилјадната публика во кавадаречкиот кошаркарски храм “Јасмин“, покажаа дека се подготвени да одат до крај. Доналд Кол беше расположен за поентирање, Талик Браун и Милан Прековиќ за разигрување и асистенции. Гостите не можеа да се доближат многу блиску до водството на Фени, кое Емил Рајковиќ мудро го одржуваше на околу +10 во првите 20 минути.
Во вториот дел се разбуди Гоцевски, а повторно одбраната беше клучна, само 62 примени кошеви против тим со одлични индивидуалци како што е Левски, доволно говори за дефанзивниот квалитет. Разликата од 16 поени беше достигната во средината на последната четвртина, а до крајот со 200% борбеност и пожртвуваност, херојски но и среќно, поен по поен, Фени Индустри стигна до конечните +19.
Статистички, Златко Гоцевски со 27 поени (61%), 5 скока и 4 блокади беше играч на мечот, но и затоа што со две едноподруго тројки го фрли Левски во нокдаун во самиот финиш. Веднаш до него Доналд Кол со 24 поени за само 28 минути, но и без настап во финишот заради 5-та лична грешка. Милан Прековиќ одигра за екипата, 5 скока и одлични 10 асистенции, Самарџиев и Ѓуров погодија кога требаше, а Талик Браун беше вистински диригент.
Кај гостите, Хол постигна 17 поени (но и 8 загубени топки), 12 имаше Џонс, додека центарот Стефан Георгиев на 10-те поени додаде 9 скока.
Статистиката многу пати е чудна во кошарката, како на пример на овој меч. Гостите имаа дури 11 скока повеќе, 25% подобро изведуваа слободни фрлања, имаа 5 лични грешки помалку, а тренерот Папазов користеше повеќе играчи и дури 9 од нив реализираа поени (наспроти 7-те на Фени). И на крајот загубија, и тоа со 19 разлика.
Славјето веќе започна, не само за кавадарчани, туку и за цела кошаркарска Македонија која слави со Фени Индустри и Фершпед Работнички. Кошаркарска Македонија се радува и за Александар Тодоров, кој многу доминантно се прошета до Фајнал Форот со својот Рилски Самоков. Без оглед на тоа кој ќе ја освои лигата во првата нејзина година, македонската кошарка е морален победник. Тројца наши тренери, два клуба и голем број македонски кошаркари ќе продефилираат на завршницата во Самоков или Вршац, сеедно. Финалист сигурно имаме, одиме на титула!
Наскоро Фото-галерија од натпреварот!
Комплетна статистика