Полицијата приведе 13 лица што учествувале во нередите во скопската населба Аеродром во текот на кошаркарскиот натпревар МЗТ ФОН - Фершпед Работнички. Според информациите од МВР, во саботата околу 19 часот, од страна на група навивачи на КК Фершпед Работнички скршена е влезна врата и прозорец од стан сопственост на Е.Г. (1949) на улицата Владимир Комаров, а оштетено е и службено полициско возило „дефендер“. Во непосредна околина на местото на нередите пронајдени се метални прачки, дрвени палки и делови од молотов коктел.
УАПСЕНИ САМО ОД „СИТИ ПАРК БОЈС“
Во Фершпед Работнички велат оти имало тепачка помеѓу две навивачки групи. Од тоа што го имам како информација, инцидентот се случил на 10 минути пред почетокот на мечот. Имало тепачка помеѓу навивачките групи што завршила по интервенцијата на полицијата. Симптоматично е што сите уапсени се членови на навивачката група „Сити парк бојс“, која го бодри нашиот клуб. Тоа се моите сознанија, верувам оти во следните денови ќе знаеме подетаљно што се случило и дека вакви работи нема да се повторуваат. Ова фрла темна дамка на дербито што го имаме и што треба да го зачуваме.
Собирањето на нашите навивачи било спонтано, тие најмногу беа револтирани што не можеа да најдат влезници. Ние како клуб не можевме да им обезбедиме бидејќи управата на МЗТ не ни даде ниту 150 билети колку што ние им обезбедивме на претходниот меч кога навивачите на МЗТ одбија да влезат во салата. Би апелирал да не се повторат ваквите сцени. Би сакал да ги гледам салите полни, а навивачите со коректно однесување да придонесат за разубавување на дербито и на спортски начин да му помагаат на својот тим - вели спортскиот директор на Ф. Работнички, Горан Костовски.
УКРАДЕНИ ЗНАМИЊА ОД САЛАТА НА МЗТ
Во МЗТ се оградуваат од инцидентот кој се случи во населбата Аеродром. Според нив, 99 отсто од нивните навивачи биле во салата за време на нередите. - Се оградуваме од инцидентот во кој не знаеме кој учествувал бидејќи 99 отсто од нашите фанови беа во салата во која немаше никаков проблем. Мечот мина во најдобар ред. Кога имало проблеми, сме ги критикувале нашите навивачи, но оваа полусезона немаме проблеми, тие се придржуваат до договорот, сме немале прекини. За пофалба е нивното однесување. И делегатот на средбата потврди дека организацијата била одлична. Ние уште во четвртокот најавивме дека навивачи на Работнички се подготвуваат да тргнат кон нашата сала иако немаа влезници. Полицијата беше известена за тоа - додава Панковски.
Проблемите почнаа уште во саботата наутро кога беше забележано оти во текот на ноќта непоканети гости ја посетиле салата. Две големи знамиња се украдени од салата „Јане Сандански“ ноќта помеѓу петокот и саботата. Спортскиот директор на клубот, Драган Панковски, вели оти станува збор за класична провална кражба која е пријавена во полиција. - Случајот се води како класична провална кражба, разбиени се две врати во салата. Целта на провалниците им била само знамињата, тие не влегле во клупските канцеларии. Украдени се две големи навивачки знамиња. Вредноста на знамињата е околу 400-500 евра. Пријавено е во полиција, денеска треба да се утврди вредноста на украдените знамиња - вели Панковски.
СТАВ
Што стана со кошарката?
Кошарката се' поретко е главна тема на разговори кога се во прашање дерби-дуелите помеѓу МЗТ и Работнички. Наместо да се раскажува за потезите на актерите на паркетот, колку интересен или квалитетен бил дуелот помеѓу двете скопски екипи што досега одиграле многу финалиња во првенството и во купот, тема број 1 е насилството и тоа во последно време се' почесто надвор од салите „Јане Сандански“ и „Градски парк“. Вистинските навивачи се натпреваруваат на стадион и во сала со тоа кој е погласен или кој има подобра кореографија. Кршењето излози, провалувањето во сала и тепачките се дела на хулигани. Некои од нив на натпревар доаѓаат само неколкупати годишно и тоа само кога играат овие два тима еден против друг и често не ги интересира ни резултатот. Додека е така, најголемото кошаркарско дерби ќе предизвикува се' помало внимание кај вистинските љубители на овој спорт. Одамна е ризично на овие мечеви во сала да се оди со мало дете. Инаетот и кавгите кој прв почна и кој е виновен нема да доведат до решение на проблемот. Клубовите и навивачите треба да имаат здраво ривалство што ќе се негува, но само со спортски методи.
