Пред почетокот на парискиот Гренд Слем, Роџер Федерер најави:"Оваа година одам до крај". По четиригодишната доминација на Надал и најлошиот почеток на една сезона во кариерата...
ретко кој го сваќаше сериозно. Но во очи на четврфиналниот двобој, Федерер е најголем фаворит за освојување на Роланд Гарос. Тоа би му бил 14 Гренд Слем во кариерата со што би се изедначил со големиот Пит Сампрас и би станал само втор тенисер заедно со Андре Агаси кој ги освоил сите четири Гренд Слема на три различни подлоги.
Статистичарите пресметаа дека раното испаѓање на Надал, на Федерер му овозможува враќање на светскиот трон, но ќе треба да ги освои и Роланд Гарос и Вимблдон. Ова не е неостварливо ако се анализирааат противниците кои преостанаа на Роланд Гарос.
Освен Енди Мареј, Федерер против останатите шесторица има неверојатен скор од 42 победи и само еден, единствен пораз. Тоа не мора ништо да значи затоа што париската земја секогаш била кобна за фаворитите а тоа се виде и на дуелот на Федерер со Томи Хас.
Откако го преживеа тој дуел следи двобојот со домашниот миленик Французинот Гаел Монфилс. Против Монфилс има 4:0, а интересно е дека последниот двобој беше токму на Роланд Гарос, во полуфиналето каде Федерер славеше со 6:2,5:7,6:3,7:5. Во другите три дуела Монфилс не доби ниту еден сет.
Доколку Дел Потро излезе како победник во мечот со Робредо, тогаш Федерер во полуфиналето би имал противник со кого има уште подобар скор. Сите 5 средби во минатите три години Федерер ги доби убедливо без загубен сет. Ако пак би играл со Робредо, Швајцарецот е уште поубедлив. Осум меча, осум лесни победи.
Во другиот дел од ждрепката играат најголемото изненадување Содерлинг и Давиденко, односно Мареј против Гонзалес. Од оваа четворка Федерер најмногу пати го има победувано Давиденко, 12 меча без пораз и со само три изгубени сета. И против Гонзалес има 12 победи но и еден пораз во 2007 година на Мастерсот во Шангај. Од тогаш се сретнаа два пати, минатата година во четвртфиналето на Роланд Гарос и годинава во Индијан Велс. Во двата дуела Федерер славеше релативно лесно. Против Содерлинг има девет чисти победи, без пораз и со само еден изгубен сет што значи дека и таа опција одлично би му одговарала.
На Федерер му преостанува да се надева дека нема да се сретне во финалето со Енди Мареј. По Надал, Мареј му е најнезгодниот противник и еден од ретките против кого има негативен скор. Мареј го победи Федерер дури шест пати, пет пати во последните две години. Иако нивните мечеви секогаш се изедначени, Мареј секогаш слави во одлучувачките сетови.
Нема сомнеж дека пред Федерер е шанса која што мора да ја искористи и прашање е дали повторно ќе добие ваква прилика. Ниту големиот Пит Сампрас не успеа да дојде до титула на суровата париска земја, а кога би го подигнал пехарот на Роланд Гарос, Федерер со право ќе биде наречен најголемиот на сите времиња.
Извор:
www.deportivo.com.mk
lee:
