03.12.2012, 17:15, Утрински весник
Зошто да се работи за минималец!?
„Подобро ќе биде да не работам отколку да робувам некому по цел ден за 8.000 денари месечно“. Вака се изјаснила извесна битолчанка анкетирана за истражувањето „Мапирање на сиромаштијата и социјалната исклученост во Македонија“.
Ова не е несреќна изјава, туку, за жал, реалност во која живеат најголем дел од младите во градот под Пелистер, но и пошироко во Македонија. Старата поговорка - џабе не седи, џабе работи по се' изгледа веќе не поминува. Младите не сакаат да работат за минимална плата. Бараат работа според своето образование и во областа за која се школувале. Не сакаат да работат што и да е.
Од друга страна, пак, парадоксално е што најголем дел од младите се задоволни и со едно евро на ден. Ако според критериумите на Светска банка е сиромашен секој што има на располагање 250 денари во текот на денот, на младите во Македонија им се доволно само 60 или 80 денари дневно за да испијат едно кафе, да облечат облека од најновите колекции, да видат и да бидат видени.
Младите како се' помалку да ги интересира социјалната ситуација во државата. Во Битола, на пример, незаинтересираноста а можеби и разчараноста навлегла толку длабоко што младите се единствено заинтересирани да шетаат низ Широк сокак. Кога момците од „Аман“ со мегафони ги повикуваа да се приклучат на нивните протести, ниту еден од нив не се „осуди“ да стане од масите кои ги зафатија во уличните кафулиња.
Ако веќе сте помислиле дека за оваа состојба се виновни повозрасните, тука сте во право. Колку и зошто ги разгаливме нашите деца не е прашање за милион долари, оти лесно се одговара иако постојат милион одговори.
Но, голата вистина е таа дека во Македонија младите имаат многу примери како да заработат и без да се испотат. Секако, тука се вработувањата во јавниот сектор со партиски филтер. Кога може со малку работа да се зема висока плата, да се биде слободен за викенди и празници, тогаш зошто да се работи за минимална плата!
