И ние имаме нилски комарци, ама кулираат
Комарците од родот кулекс, кои се преносители на смртоносниот вирус „западен нил“ се присутни на македонското поднебје. Оваа потврда ја добивме од професор Станислава Лазаревска од Земјоделскиот факултет, која објаснува дека ваквиот податоке загрижувачки доколку се појави и вирусот.
- Комарците се хранат така што смукаат крв. Доколку се хранат од инфициран човек, тогаш може да дојде до понатамошно пренесување на вирусот - објаснува таа, додавајќи дека никој не оспорува оти ги има на ова поднебје.
Во неколкуте аптеки, пак, во кои се јавивме вчера ни рекоа дека интересот кај граѓаните за средства за заштита од убоди на комарци е во вообичаените граници.
Засега во земјава не е регистриран ниту еден случај на заболен од опасниот вирус, но последното деноноќие во Грција даде две жртви и 16 инфицирани, од кои седум со запаление на мозокот. Во најтешките клинички форми, вирусот предизвикува смрт откако претходно го напаѓа централниот нервен систем.
- При зафаќање на централниот нервен систем, се јавува парализа на екстремитетите. Во рок од три до седум дена настанува оштетување на дишењето и пациентите завршуваат на апарати. Многу често, по овие
седум дена настанува откажување на
системот и центарот за дишење и работата на срцето и има смртен исход - потенцира Жарко Караџовски од Институтот за јавно здравје.
Со најновите истражувања се алармира дека трансфузијата на крв од заболен на здрав човек може да ја пренесе инфекцијата. Од Институтот за јавно здравје смируваат и тврдат дека македонските клиники се подготвени да го откријат вирусот преку анализа на крвната слика за што веќе има обезбедени агенси.
Лекарите апелираат, посебно внимание да обрнат лицата со малигни заболувања, дијабетес и со слаб имунитет и да не ги игнорираат првичните симптоми, како што се омалаксаност, гадење, губење апетит, зголемени лимфни жлезди и појава на црвенило по телото.
Вирусот „западен нил“ предизвика големи епидемии со стотици жртви низ целиот свет откако првпат се појави по течението на оваа река. Повеќе од 20 смртни исходи во изминатата деценија се регистрирани во Русија, југоисточна Романија, а вирусот е проширен и во САД.
Мирослава Симоновска Извор:
„Шпиц“
Џанам ебола вирусот нападнал.
во Грција
