Како да веруваш на втора, трета во случајов 50 рака?
На кој поточно случај мислиш кога велиш „50 рака“?
Доколку Бог ти се објави тебе лично, тоа не е верување од прва рака, туку од нулта рака, затоа што ти си личен сведок на Божјото откровение и во тој момент ако во нешто веруваш, тоа би било вера во твоите очи, уши, вера во твојата свесност во тој момент. Доколку ти му кажеш на некој друг, е тогаш тој би верувал од прва рака, а таа рака ќе му бидеш ти.
Не ли се сведува на верување на луѓе, а не на Бог лично?
Тоа е делумно точно. Христијанската вера се сведува на верба во луѓе на кои што Бог им се објавил лично, но не се тоа луѓе од типот на Мухамед на кого муслиманите му веруваат на „жими мајка“. Тоа се луѓе кои Бог ги потврдил (како Негови пророци, Негови апостоли) со одредени знаци кои се лесно препознатливи за искрениот трагач на вистината за Бог.
На пример, додека во Кyранот немате ниту едно изречено и исполнето пророштво, во Библијата имате илјадници такви кои се исполниле во најситни детали иако биле проречени стотици години порано.
Додека Кyранот е приватна и таинствена објава до само еден човек (без ниту еден сведок) кој со ништо не покажал и докажал дека Бог стои зад него (освен со извесни освоени воени битки) во краток период од 23 години, Библијата била јавна објава, со многу сведоци, во период од 1600 години попратена со знаци и чуда на Божјите пророци и апостоли, а најмногу Христос нели.
Кај апостолите, меѓу другото, не гледаме никакви задни мотиви, никакви причини зошто би лажеле за она што го виделе и чуле, затоа што речиси ситу до еден (и не само тие), со крв го завериле своето сведоштво бидејќи биле прогонети и умреле за својата вера.
Но не биле само апостолите очевидци на воскреснатиот Христос. Стотици други луѓе го виделе воскреснатиот Христос и многумина од нив исто така маченички биле убиени, но не се одрекле од она што со своите очи го виделе и со своите уши го чуле.
Кај Мухамед, пак ќе го земам него за пример, ситуацијата е дијаметрално спротивна. Неговата веродостојност и кредибилитет не бил прочистен низ оган и крв (ако можам така да се изразам). На него не му бил ставен нож под грло за да го проверат дали навистина е спремен да умре за својата приватна објава или не. Тој не жртвувал ништо, па ни својот живот. Тој не се откажал од никакви уживанции во овој свет, туку имал големо богатство, власт, многу жени и сл.
Значи да, христијаните веруваат на вера што не е од нулта рака, туку е од прва рака, но во „рака“ што е од Бог потврдена, рака која има силен кредибилитет и Божји авторитет.
А ако бидеме искрени и размислиме подлабоко ќе видиме дека премногу други работи ние ги веруваме од прва, втора, трета итн. рака и често пати не ги ставаме ни под знак прашалник. На пример, многу луѓе им веруваат на новинарите кои често ги добиваат информациите и од трета, четврта рака. Луѓето им веруваат на новинарите и покрај тоа што знаат дека тие редовно имаат за цел да ја „напумпаат“ информацијата за таа да изгледа по бомбастично, по интересно, за и нивната статија да биде почитана. И често пати тие истите луѓе приговараат дека христијаните се лековерни кога веруваат во извештаите на апостолите. Ма дај ти се молам
