http://www.total.com.mk/default.aspx?mId=16&eventId=15455
Владата призна дека има грешки во концептот бруто-плата
Министерството за финансии ќе подготви измени на Законот за придонеси од задолжително социјално осигурување со кои како пресметковна величина во текот на целата година ќе се користи просечната бруто плата која Државниот завод за статистика ќе ја утврди за последниот месец од претходната година, односно бруто платата утврдена за декември 2008 година ќе се применува во пресметките во текот на целата 2009 година., соопштија денеска од Министерството за финансии
Измени ќе се направат и во насока на промена на начинот на пресметка на придонесите за категории самовработени лица вршители на економска дејност и вршители на интелектуална и друга професионална услуга.
За подготовка на измените Владата го задолжи ресорното министерство, откако на вчерашната седница ја усвои Информацијата за исплата на јануарска плата на вработените согласно новата концепција на договарање, пресметка и исплата на бруто-плата.
Измените на Законот ги опфаќаат занаетчиите, таксистите, земјоделците и други субјекти регистрирани како трговец поединец, како и адвокатите, сметководителите и други субјекти регистрирани како трговец поединец. Според измените, основицата од која што овие субјекти ќе ги плаќаат придонесите ќе биде нето приходот кој што го остваруваат, при што максимална основица за плаќање придонеси ќе се утврди на ниво од четири просечни плати, како што е и за останатите вработени. Минимална основица за вршителите на економска дејност како што се занаетчии, таксисти, земјоделци ќе биде 50 отсто од една просечна бруто плата исплатена во државата, додека пак за вршителите на интелектуална и друга професионална услуга како адвокати, сметководители минималната основица ќе изнесува една просечна бруто плата. За делот што се однесува на адвокатите ќе се донесе закон за адвокатска маркичка, со што оние кои заработуваат над една просечна плата, нивната основица ќе се утврдува согласно висината на платата, што ќе се констатира преку вредносната маркичка.
Во соопштението од Министерството за финансии се наведува дека со овие планирани измени на Законот за придонеси од задолжително социјално осигурување, Владата покажува разбирање за барањата на овие категории субјекти, а со цел поддршка и поттикнување на самовработувањето во различните дејности и поддршка на традиционални занаети.
На вчерашната седница, Владата го задолжи Министерството за финансии да пристапи кон подготовка на специјално законско решение со кое ќе се решаваат проблемите на такси превозниците, а кои го отежнуваат нивното работење повеќе од десеттина години. При тоа главен фокус треба да биде изнаоѓање начин за решавање на огромните износи на неплатени придонеси и други јавни давачки кои таксистите ги имаат кон државата, а со цел нивно натамошно нормално функционирање во рамки на системот. Земјоделците кои се регистрирани како трговци поединци (околу 1.500 луѓе), кои имаат натрупани долгови од околу седум години, како и таксистите кои, исто така, имаат натрупани долгови од над 10 години, ќе се решаваат со специјален закон.
Овие законски измени во наредниот месец Владата ќе ги предложи до Парламентот на усвојување
