Сите гафови на охридскиот татко
Охрид пред поплава, Петрески во Австралија
Во март минатата година, во моменти кога на охридското крајбрежје му се закануваше поплава поради високиот водостој на езерото, градоначалникот отпатува меѓу иселениците во Австралија. Опозициската СДСМ се огради од него и потегот на Петрески го оквалификува како недозволива грешка. Петрески се врати во Македонија откако лидерот на социјалдемократите, Бранко Црвенковски, на прес-конференција го пренесе партискиот став дека градоначалникот на Охрид треба под итно да се врати во Македонија и откако македонската заедница во Австралија го прогласи за "персона нон грата".
Бумерангот на Петрески
По враќањето од Австралија Петрески на прес-конференција со бумеранг во рацете, што го донесе од земјата на кенгурите, меѓу другото, најави дека ќе бара одговорност од ЕЛЕМ, затоа што придонел да се покачи нивото на езерото.
- Фашистичките напади на институцијата - градоначалник на креаторите на последните немили случувања во Охрид ќе им се вратат како бумеранг, а против креаторите на нападите на институцијата - градоначалник ќе поднесам кривични пријави, изјави Петрески по враќањето од Австралија.
Братот на Петрески вработен во општина Охрид?!
Владејачката ВМРО-ДПМНЕ го обвини Петрески дека го вработил својот брат во општината и дека тој ќе биде поставен за претседател на комисија која треба да спроведе јавни набавки.
- Здравко Петрески, како брат на Александар Петрески, е вработен во општина Охрид токму кога градоначалник е неговиот роден брат. Врв на непотизмот. Додека илјадници граѓани чекаат единствено вработување, за семејството Петрески е оставен избор за тоа каде сакаат и кога сакаат да се вработуваат на работни места во општина Охрид, обвини ВМРО-ДПМНЕ.
Бесплатни липи за охриѓани
По реакциите во Охрид за преуредувањето на градот кое опфаќа и реконструкција на дел од садниците Петрески пред десетина дена изјави дека ќе им дели бесплатни липи на граѓаните на Охрид кои сакаат да ги засадат во нивните дворови.
- Како локална власт ќе поделиме бесплатно липи за сите кои сакаат да ги засадат во своите дворови или на други парцели кои ги имаат во приватна сопственост. Ова е еден гест кон сите кои го сакаат ова дрво, да може да го имаат на своја земја, изјави Петрески.
Идиоти во општина Охрид?!
"Овде нема идиоти за да читам што ми напишале, а некои не знаат и да прочитаат, а има многу идиоти во салава", е дел од обраќање на Александар Петрески при една од седниците на општина Охрид. По реакциите за навредите на дел од советниците Петрески се оправда, мислел на техниката која некои не знаеле дури ни да ја користат но доколку некој се препознал тоа било нивни проблем.
- Кога реков идиоти и идиотчиња мислев на помагало што служи кога човек не знае да го каже она што го мисли. Му пишуваат текст и читаат од тоа. Значи реков, ве има многу идиоти, а доколку некој се препозна јас не знам, рече Петрески.
Петрески не прска против државни комарци
Локалната самоуправа на Охрид, на чие чело е градоначалникот Александар Петрески, кој е од редовите на СДСМ одбива да прска против комарци дел од крајбрежјето на езерото бидејќи тоа било во државна сопственост.
- Државата не ни дава да стопанисуваме со овој дел од крајбрежјето, па според тоа немаме намера ниту да прскаме, ниту да чистиме, рече Петрески.
Споменикот на Цар Самоил да се пресели во Охрид
Според Петревски, местото на спомен-обележјето на големиот македонски владетел му е во неговата престолнина, Охрид.
- Ете, им нудам решение за несоодветната одлука што ја донесоа тој споменик да биде во Скопје да штрчи, да смета на плоштадот во Скопје. А знаеме дека Охрид е посебно врзан со Цар Самоил, тој споменик да го поставиме на плоштадот кај Чинарот, изјави Петрески.
Ако сте гласале за ВМРО-ДПМНЕ, тие нека ви ги решаваат локалните проблеми
Изреволтиран од победата на ВМРО-ДПМНЕ во дел од населените места кои се дел од општина Охрид, Петрески на жителите им порача дека решение за локалните проблеми, наместо кај него, треба да бараат кај владеачката партија.
Бог да ги прости (Радио Охрид)
"Најпрвин поздрав до слушателите на Радио Охрид, сочувство до фамилијата на Спироски за смртниот случај. Мене, ете, ми е жал што денеска е терминот на нашето обраќање преку Радио Охрид, затоа што денеска е мртва сабота и многу од слушателите се на гробиштата, па бог да ги прости и нив".
Петрески е највисокиот одбојкар?
"Ги играв сите позиции, играв и на мрежа играв и среден играч затоа што тогаш исто така бев висок 185 метри, но имав 75 кила и бев добар одбојкар".
Едно евро за влез во Охрид
Туристите кои сакаат да го посетат нашиот најголем туристички центар за новата давачка ќе треба да платат на трите рампи кои ќе бидат поставени кај Подмолје, Косел и Пештани. Ваква е замислата на охридскиот градоначалник Александар Петрески во борбата со викенд-туристите, кои, според него, уживале во градот, а не биле големи потрошувачи. За оние пак гости кои имаат свои викенд-станови градоначалникот им предвидел годишна такса од 100 до 200 евра, во зависност од квадратурата и местоположбата.
Инспекторите - лоши по здравјето
"Секој ден овде има по тројца инспектори, дали да работиме или да се занимаваме со инспекториве. Ги малтретираат вработените како последни криминалци во оваа држава. Верувајте, неколку луѓе од општината постојано се по болници од тој притисок, денеска ќе апселе, утре ќе апселе. Тоа не е во ред".
