Грција во битката за името се фати и за спортската химна „Македонија навива за вас“, која ја отпеа трагично загинатиот Тоше Проески, затоа што во неа се спомнува името на Александар (Македонски).
Дипломатски извори за „Дневник“ изјавија дека амбасадорката на Грција во Македонија, Александра Пападопулу, на неколку средби со странски амбасадори во Македонија им се пожалила дека по преименувањето на скопскиот аеродром во „Александар Велики“, сега Александар е вметнат и во спортска химна на земјата.
„Нека знае сега светот за нас Македонците, едно сонце на Александар нас ни свети в градите“, е стихот од химната во кој се спомнува Александар.
Авторот на песната „Македонија навива за вас“, Александар Митевски, е изненаден од ваквите реакции.
- Во новонастанатата ситуација, најмалку што очекував како автор е ваква реакција. Кога ја пишував песната се водев од чиста инспирација и ниту во еден момент не помислив на политика или на нешто слично, а најмалку да провоцирам некого. Ме инспирира тоа што секојдневно го гледам на спортските терени. Морам да споменам дека на Тоше Проески особено му се допадна делот во кој се споменува Александар - изјави за „Дневник“ Митевски.
Дипломатите, кои инсистираа на анонимност, оценуваат дека Атина колку повеќе врши притисок, толку повеќе ја подгрева атмосферата. Според нив, ако продолжи да се однесува нерационално, Грција ќе придонесе Александар Велики да нема конкуренција во земјава.
- Го прават Александар „забрането овошје“ - велат нашите извори.
Прашањето за името беше една од темите и на вчерашната средба на министерот Антонио Милошоски со гостинот од Луксембург Николас Шмит.
Според Милошоски, пожелно е да се најде решение за билатералниот спор за името со Грција пред самитот на НАТО во април в година.
- Македонија во овој процес ја користи силата на аргументите, а, за жал, Грција во одредени моменти го користи аргументот на силата за да изврши притисок врз Македонија. Ние како држава со аргументи ќе го браниме нашето право на уставно национално име и на сопствен идентитет. Очекуваме од Грција како најстара членка на ЕУ и на НАТО во регионот да покаже зрелост и да ја даде својата поддршка за заедничките цели што ги имаат и НАТО и ЕУ овој регион да влезе во зоната на стабилност, да ја постигнеме таа заедничка цел и со интегрирањето во НАТО да си помогнеме едни на други - изјави македонскиот шеф на дипломатијата.
Неофицијално, Шмит на средбата рекол дека нема ниту дипломат ниту политичар во Европа што не знае за овој спор, но грчките аргументи биле неразбирливи. Според неофицијални информации, грчки дипломати повеќепати контактирале со него и се обиделе да го убедат дека во Грција има многу луѓе што се сметале за Македонци.
Што се однесува до евентуалното користење на името како пречка за ЕУ и за НАТО, алијансата проценила дека влезот на земјите од Јадранската група е неспоредливо поважен од билатерални спорови.
Дипломатите уште проценуваат дека иако во Грција е жестока реториката за ставање вето за членство на Македонија во НАТО, грчките власти работат на можноста воопшто да нема покана за Македонија. Грчките дипломати ги користат сите контакти за да ги пренесат најцрните вести од Македонија со препорака во НАТО да се покани само Хрватска, а Македонија „која и така досега чекала, да почека уште малку за Албанија да не биде сама“.
i pregovorite se izlisni . evropa e nasata kurva vavilonska
ama i taa ke mora da se sooci so relanosta narecena MAKEDONIJA.
