Гледачите му се вратија на македонскиот фудбал
Директните преноси на македонските фудбалски натпревари на телевизијата „А1“ во новата сезона бележат речиси идентична гледаност како средбите од Премиер-лигата. Првите три кола од домашниот шампионат го пробудија интересот на јавноста, а потврдата дојде и од реномираната „АГБ Нилсен“, според чиишто испитување натпреварот меѓу Вардар и Тетекс имал рејтинг на гледаност приближно ист како и средбата Челзи - Хал.
Дербито на македонската лига имаше гледаност од 4,5 проценти, а средбата од Премиер-лигата има еден процентуален поен повеќе. Неделниот натпревар меѓу Македонија ЃП и Вардар беше проследен од 3,5 отсто од гледачите, а Манчестер јунајтед и Бирмингам беа на малите екрани кај 4,5 проценти од популацијата. Овие податоци ги разрешија сите дилеми и дадоа одговор на прашањето: „Дали има место за Првата фудбалска лига на малите екрани?“
- Апсолутно го поддржувам потегот на телевизијата „А1“ за преноси на натпреварите од домашното првенство. Тоа сигурно ќе доведе до зголемување на популарноста на фудбалот во нашата земја. Сега секој вљубеник во фудбалот ќе биде во можност да гледа македонски натпревар, ако биде спречен да биде на трибините. Што се однесува до мене, јас предност му давам на македонскиот фудбал. Попрво би ги гледал Вардар, Тетекс, Победа или Пелистер отколку Челзи и Манчестер јунајтед – вели Драги Сетинов, спортски директор на Вардар.
Враќањето на интересот за македонскиот фудбал ја покажува оправданоста на инвестицијата на телевизијата „А1“. Трошоците направени за популаризација на Првата фудбалска лига резултираа со зголемена посетеност на стадионите и со се поголем број гледачи крај телевизиските екрани.
- Се трудам да го следам секој натпревар на мојот тим на домашен терен. Обврските не ми дозволуваат секогаш да бидам на трибините, а директните преноси ми овозможуваат да го гледам и на гостувањата. Овој потег е за пофалба бидејќи мора да почнеме да го цениме македонскиот спорт. Со поддршка на домашниот фудбал, ќе помогнеме да се крене квалитетот – вели Горан Трајковски.
Импресиите на фудбалските работници и на навивачите ги потврдува истражувањето спроведено од „АГБ Нилсен“. Бројките покажуваат дека македонскиот фудбал пополека, но, сигурно, се враќа во мода.
- Ние влеговме во инвестиција во сезоната 2008/2009, со која сакавме да помогнеме македонскиот фудбал да добие препознатливо место во програмската шема. Не ни помислувавме дека по една година и по првите три кола Првата македонска фудбалска лига ќе има гледаност приближна на Премиер-лигата или на Лигата на шампиони – вели Зоран Силјановски, директор за маркетинг на телевизијата „А1“.
Македонска фудбалска лига
Вардар – Тетекс А1 4,5 %
Македонија – Вардар А1 3,5 %
Премиер-лига
Челзи – Хал Сител 5,5 %
Блекбурн – Манчестер С. Сител 5,5 %
Манчестер Ј.- Бирмингам Сител 4,5 %
Сандерленд - Челзи Сител 6.0 %
Лига на шампиони
Селтик – Арсенал Канал 5 5.00 %
сум се изнасмеал многу јако , не оти е вистина тоа али ајде мора нешто да се пиши во весниците
