S
Shellshock nam67
Гостин
Меѓу невработените магистри најмногубројни се оние по правни науки - 163 лица, а по нив се нивните колеги-магистри по економски науки, кои се вкупно 63 лица
ПОДОБРО ДОМА ОТКОЛКУ НА РАБОТА
„Моите родители даваа по 1.200 евра годишно само за школарината што требаше да ја платам на Факултетот за стоматологија. Магистерските студии и одбраната на магистерскиот труд чинеа дополнителни 2.000 евра. И како, по толку вложени пари во моето образование, да работам за 12.000 денари плата во некоја ординација“.
Ова е ставот на Никола Глигоров, магистер по стоматолошки науки. Тој е само еден од евидентираните 531 невработен магистер на науки во Агенцијата за вработување. Бројот на невработени високообразовани кадри расте, а тоа го покажуваат извештаите на Агенцијата за вработување.
Според последниот извештај, имаме и 26 доктори на науки што чекаат работа.
- Не потценувам никого, но не може да ме плаќаат колку што го плаќаат келнерот во кафуле.
Размислувам да специјализирам на орална хирургија или протетика, па да си отворам ординација.
Специјализацијата би ме чинела 12.000 евра, без разлика дали ќе се одлучам за ваква наобразба во земјава или во странство. Кога веќе цената е иста, размислувам да одам во Италија. Само така ќе ми се исплатат дипломата и знаењето – вели Глигоров.
Најмногубројни - правници и економисти
Во последниот извештај за невработеноста на Агенцијата за вработување има најголем број евидентирани дипломци, магистри и доктори на науки во споредба со сите претходни извештаи. Така, без работа се 21.473 дипломци, 531 магистер и 26 доктори на науки. Само пред пет години имало 18.600 дипломирани лица без работа, 150 магистри и само шест доктори на науки.
Бројките покажуваат дека меѓу невработените магистри најмногубројни се магистрите по правни науки, 163 лица, а по нив магистри по економски науки – 63 невработени лица. Без работа се 20 невработени магистри по политички науки, 19 се магистри на педагогија, а 11 се магистри на науки за јавна администрација. Освен нив, има четворица доктори на ветеринарни науки, тројца доктори по филозофија, еден доктор на економски науки, доктор на правни науки.
Според експертите, менталитетски се определуваме за студирање на правните и на економските науки.
- Атрактивноста на општествените науки е присутна веќе подолго време. Помалку ги избираме техничките науки, што е резултат на значајната трансформација на македонската економија, кога многу индустриски капацитети се затворија, а со тоа и техничките профили се намалија. Можностите за студирање економија и право се многу поголеми во однос на другите, поради бројноста на факултетите што ги има. Ги избираат овие студии и оти можат и сами да работат како економисти, да имаат свој бизнис, да станат адвокати, судии – смета Томе Неновски, професор по економија на „Американ колеџ“.
Но, додава тој, луѓето полека сфаќаат дека треба да се студираат и технички науки.
- И економијата покажува потреба за такви профили, а и странците што инвестираат кај нас се заинтересирани за т.н. технолози од општ вид. Полека се придвижува менувањето на структурата на завршените кадри, но сепак ќе доминираат оние на општествените науки – додава Неновски.
Сосила ги туркаат правниците на мастер-студии
Бројот на магистрирани правници без работа е голем зашто студентите сосила се туркаат да се запишат на мастер-студии, оти дипломата со тригодишно образование не им вреди ништо посебно, сметаат универзитетски професори.
- Конкретно, за студентите на правни студии не е добар моделот 3+2 (три години додипломски и две години мастер-студии). Мислам дека избравме лошо решение. Со тригодишни додипломски студии студентот не може да полага правосуден испит, а може да работи единствено некои административни работи во некоја адвокатска канцеларија. Сметам дека моделот 4+1, односно четири години дипломски и една година мастер беше модел што функционира и би требало да се врати – вели професорката Тања Каракамишева.
Дека е спорен моделот 3+2 тврди и професорката Гордана Силјановска, според која три години се премалку за добар профил на правник.
- Некако сосила ги туркаме студентите на мастер-студии, а веројатно кога тие би нашле работа со четири години не би оделе таму каде што не постои предизвик за нив – вели таа.
Невработени во февруари 2012:
- 21.473 лица со високо образование
- 531 магистер на науки
- 26 доктори на науки
- 18.600 лица со високо образование
- 150 магистри на науки
- 6 доктори на науки
Автор: Антонија Поповска Христов
