И странци тврдеа дека ОНА е обучувана од Американци и од Британци
VO TRENINZITE на припадниците на УЧК и на ОНА учествуваа и поранешни офицери на американската армија и го правеа она што војниците не можеа да го прават, бидејќи е нелегално, пишуваше аналитичарот Дејвид Галанд
Не се само „Википедија“ и македонските весници единствените што тврдат дека во конфликтот во 2001 година во Македонија и на Косово директно биле замешани и странски државјани, Американци, Британци, Германци, Хрвати на страната на УЧК и на ОНА како обучувачи и даватели на разни други услуги. На таа тема пишувале и сериозни неделници и месечници, како и аналитичари на случувањата на Балканот. Само едно мало истражување на интернет-мрежата дава многубројни резултати на таа тема.
Се разбира, дел од тие материјали некој во меѓувреме грижливо отстранил од интернет-страниците, но очигледно не може да се отстрани сé.
Обуки за ОНА
Од САД за ова пишуваше угледниот „Џејн Дифенс“, врвно списание за одбрана и вооружување. Британскиот пандан на ова списание е „Дифенс уач“. И во двете списанија експлицитно пишуваше дека ОНА во Македонија директно или индиректно е обучувана од нивни сограѓани. Ваквите анализи на овие угледни стручни списанија никогаш не биле демантирани!
Во Македонската енциклопедија на МАНУ, во одредницата за ОНА, пишува дека нивните војници биле обучувани од британски и американски офицери и специјалци. Авторката на оваа одредница, д-р Татјана Петрушевска, како извори за ова ги наведе „Дневник“, „Утрински весник“, Интернет-енциклопедијата „Википедија“, како и книгата „Војната во Македонија 2001“, на пензионираните генерали Митре Арсовски, Стојан Кузев и Ристо Дамјановски.
Што се однесува до странските ненаведени извори, да го земеме за пример и аналитичарот Гари Вилсон, кој цитира многу релевантен извор како што е најпознатиот светски магазин за безбедност и одбрана „Џејнс Дифенс Викли“. Тој во својата статија под наслов: „Германски документот ја открива тајната улога на ЦИА“ од 20 април 1999 година напиша: „Што навистина стои зад ОВК? Специјални единици од Велика Британија, САД, Франција и други НАТО групи прикриено работат во Косово“.
Дејвид Галанд, заменик-главен уредник на најпознатиот британски магазин за одбрана „Дифенс уач“ во текст, објавен и во московска „Правда“, пишува:
„САД, Велика Британија и другите, помалку значајни членки на НАТО, ги создадоа, обучуваа, вооружија и насочуваа т.н. албански бунтовнички сили. Само пред извесен период, многу од албанските бунтовници беа на платен список на НАТО на Косово, каде што беа обучувани од американските зелени баретки и британските специјалци. Тие беа снабдувани со оружје, претежно од американско производство и се наоѓаа под туторство на војници од специјалните сили. Од нив тие учеа како да спроведуваат неконвенционални борбени операции. Во тренинзите учествуваа и поранешни офицери на американската армија, кои едноставно беа најмени да работат како инструктори, и да го прават она што војниците не можеа да го прават, бидејќи е нелегално. Многу би ме интересирало колку американски војници служат во „строго доверливи мисии“, или колкумина во моментов се „мотаат“ околу Македонија со документи изработени од ЦИА“.
Ова е само дел од ваквите извештаи. Има уште.
Американци од двете страни на оградата
Канадскиот угледен професор Мишел Чосудовски во 2001 година во напис под наслов „САД ја финансира етничката војна на Балканот“ пишува:
„Со сурова иронија, Вашингтон ги вооружува и советува и напаѓачите на ОВК и македонските бранители според воено разузнавачко овластување со акт одобрен од страна на американскиот конгрес. МПРИ, платеничка фирма на Пентагон под договор, и помага на Македонија - како дел од американскиот пакет за воена помош, за да спречи вооружена агресија и одбрана на македонската територија. Но, МПРИ, исто така, ја советува и опремува ОВК, што е одговорна за терористичките напади. Во оваа војна, американскиот воено-разузнавачки апарат ги влече конците од двете страни на оградата...“.
Чосудовски, ја пренесува и изјавата на сенаторот Џозеф Либерман, цитиран во „Вашингтон пост“, 28 април 1999 година, во која сенаторот индиректно ја открива и врската на САД со Косово:
„САД и Ослободителната војска на Косово поддржуваат исти човечки вредности и принципи...Борбата за ОВК е борба за човековите права и американските вредности“, изјавил Либерман.
Текстот со изјавата на Либерман повеќе го нема на страницата на „Вашингтон пост“. Не функционира ниту линкот до текст на страницата на Британските падобрански сили, каде се наведува дека Гзим Острени, генералот на ОНА, бил обучуван од оваа британска единица, но за потребите на Косовскиот заштитен корпус.
Го нема ниту текстот од 18 април 1999 година на „Лондон сандеј телеграф“ каде пишуваше дека САС, единица на британските специјални сили, води два ОВК кампови за обука во близина на Тирана, албанскиот главен град. Текстот сепак може да се најде на разноразни форуми, но не и на официјалната интернет страница на весникот. Според „Телеграф“, единици на ОВК, обучени од САС, се инфилтрираат на Косово, користејќи сателитски и мобилни телефони како помош за наведување на НАТО бомбардирачките мисии. Во извештајот, исто така се наведува дека ОВК има контакт со МПРИ, чија база е во Вирџинија, која очигледно ја проширува својата улога...
Демантиран само „Катимерини“
Грчки „Катимерини“, кој во 2002 година пишувал дека 17 британски и американски инструктори од фирмата МПРИ биле извлечени од Арачиново во јуни 2001 година, е единствениот медиум што бил демантиран, но индиректно.
„Контроверзната американска компанија МПРИ со дозвола од властите во Вашингтон им дава совети и на македонските сили и на терористите на ОНА. Генералот Ричард Грифитс се движи на релацијата Скопје - Тетово - Приштина, ги брка интересите на МПРИ и им нуди услуги на двете завојувани страни во Македонија. При крајот на јуни Грифитс е виден во поранешен логор на ОВК со офицери на КФОР, потоа е виден во Тетово со Џејмс Пердју, а имаше одлични односи и со Роберт Фровик “, пишува „Катимерини“ на 19 јули 2001 година, а пренесува белградската агенција „Бета“.
„Катимерини“ не бил демантиран од американската амбасада во Атина, но кога истиот извештај бил пренесен од повеќе македонски медиуми, амбасадата на САД во Скопје веднаш демантираше.
На државниот универзитет во Тетово, финансиран од буџетот на Република Македонија, стои оваа спомен-плоча на која пишува за жртвите паднати од „државниот терор на славомакедонците“
Претходно на 10 јуни 2001 година, лондонски „Тајмс“ во текстот „Македонија на работ на војна“, повикувајќи се на западни разузнавачки извори, пишува дека околу 1.300 припадници на ОНА преминуваат од Косово во Македонија. Тие биле претходно тренирани од силите на НАТО.
И овој текст повеќе го нема на официјалната страница на весникот.
„Бунтовниците се снабдиле со модерни американски ракети „Стингер“ и нешто постари руски САМ проектили. За срамота на НАТО алијансата, тие користат мапи издадени од НАТО за потребите на Косовскиот заштитен корпус (КЗК). Стотици резервисти на КЗК беа повикувани од командантот Агим Чеку, уште во март. Тие постепено исчезнуваа од тренинг-камповите на УЧК (сега се на КЗК), а потоа наеднаш се појавуваа на борилиштата во Македонија“, пишува „Тајмс“.
Нема податоци дека овие информации на „Тајмс“ се некаде демантирани, како што не е демантиран ниту текстот на лондонски „Гардијан“ од 29 март 2001 година во кој се наведува дека НАТО-трупите во Косово уапсиле 22 Албанци поради убивање српски цивили, а кои „тргнале да се борат во Македонија. Уапсените биле тренирани од британските специјалци САС.
Ова е голема срамота за Алијансата“ пишуваше „Гардијан“.
По објавувањето на Македонската енциклопедија, и британската амбасада и американската амбасада во Скопје испратија официјална реакции до МАНУ во кои бараат МАНУ да го коригира тој дел од одредницата и да го поправи својот кредибилитет. Обвинувањата дека американски офицери ги обучувале поранешните војници на ОНА немаат никаква основа и се бесрамни, реагираше амбасадата на САД во Македонија.
Ахмети во 2001 напаѓаше славомакедонци
Лидерот на ДУИ и поранешен командант на ОНА, кој сега жестоко реагира на употребата на терминот Албанци во „Македонската енциклопедија“, во почетокот од воениот конфликт во 2001 година ги нарекуваше Македонците славомакедонци.
На 22 јануари 2001 година ОНА изврши нова акција врз полициската станица во Теарце, на патот Тетово-Јажинце, во која загина еден полицаец, а уште тројца беа тешкоранети. По оваа акција јавноста беше информирана со коминике бр. 4, потпишано од Генералниот штаб на ОНА. Во него се вели:
„Вчера, на 22 јануари 2001 година, во Теарце, Тетовско, една единица на специјалниот оддел на ОНА, поддржана од една група набљудувачи, ја нападна, со ракети и автоматско оружје, славомакедонската полициска станица. За време на нападот спротивните сили не пружиле отпор, додека други славомакедонски сили, од други правци, не се доближиле навреме на местото на настанот. Нападот беше ограничен и имаше предупредувачки карактер, за славомакедонските освојувачи и нивните албански говорници. Униформата на славомакедонскиот освојувач ќе биде напаѓана додека не се ослободи албанскиот народ. Ги повикаме сите полицајци да се вратат кај нивните фамилии за да не ги загубат животите, служејќи им на славомакедонските планови за доминација над албанското мнозинство“.
ОНА е банда на убијци и криминалци
Контроверзиите врзани со ОНА и најмоќните НАТО членки не се од вчера. Всушност, контроверзиите започнаа со позната изјава на тогашниот генерален секретар на НАТО, лордот Џорџ Робертсон од 15 март 2001 година дека „ОНА е банда на убијци и криминалци“.
„Џејн Дифенс“ и „Дифенс уач“: ОНА во Македонија директно или индиректно е обучувана од нивни сограѓани
Гари Вилсон во „Џејнс Дифенс Викли“, 20 април 1999 година: „Што навистина стои зад ОВК? Специјални единици од Велика Британија, САД, Франција и други НАТО групи прикриено работат во Косово“
Дејвид Галанд во „Дифенс уач“: „САД, Велика Британија и останатите, помалку значајни членки на НАТО, ги создадоа, обучуваа, вооружија и насочуваа т.н. албански бунтовнички сили
„Лондон сандеј телеграф“, 18 април 1999 година: САС, единица на британските специјални сили, води два ОВК кампови за обука во близина на Тирана, албанскиот главен град
„Тајмс“: „Бунтовниците се снабдиле со модерни американски ракети „Стингер“ и нешто постари руски САМ проектили. За срамота на НАТО алијансата, тие користат мапи издадени од НАТО за потребите на Косовскиот заштитен корпус (КЗК). Стотици резервисти на КЗК беа повикувани од командантот Агим Чеку, уште во март. Тие постепено исчезнуваа од тренинг камповите на УЧК (сега се на КЗК), а потоа наеднаш се појавуваа на борилиштата во Македонија“
Мишел Чосудовски: „Со сурова иронија, Вашингтон ги вооружува и советува и напаѓачите на ОВК и македонските бранители според воено разузнавачко овластување со акт одобрен од страна на американскиот конгрес. МПРИ, платеничка фирма на Пентагон под договор, и помага на Македонија...но, МПРИ, исто така, ја советува и опремува ОВК, што е одговорна за терористичките напади
IZVOR-
http://novamakedonija.com.mk/NewsDetal.asp?vest=9309955166&id=9&setIzdanie=21800