Мислам дека сега е доцна за враќање назад. Не можеме да бараме враќање на состојби стари еден век па и повеќе.Таму сме каде што сме. Наивно би било исто така, да се очекува дека во догледно време нешто би се сменило на глобално ниво. Имаме население кое е психолошки обработено, кое нема време да мисли, кое не може да мисли или најлошо, не сака да мисли. И зошто би сакало да прави нешто што друг го прави за него? Имаме навики и технологија од кои, такви какви што сме, сме премногу зависни, независно од тоа колку ни се навистина потребни.
Многумина западнале во некакво ескапистичко расположение, оти животов сега е се` само не едноставен и наивен, па годи помислата дека некогаш можело и подобро и поубаво и поедноставно да се живее. Јас не мислам така. Јас верувам дека токму денес, со целиот технолошки прогрес што е остварен имаме шанса нешто да направиме, пред се` со себе, како поединци. Иако ги земам предвид сите фактори, сепак од нас најмногу зависи што, каде и како ќе јадеме, пиеме, живееме. Значи убеден сум дека некаква алтернатива во начинот на живеење сепак е можна, и дека таа зависи од личниот избор на секоја личност. Освен ако некој мисли дека чекањето револуција е попаметна работа. А најчесто не е. Не верувам дека толпата може да прави скокови во своето напредување (иако одлично назадува во одредени сегменти), па еволуцијата некако ми се чини дека е најразумното решение.
