ЕУ ги одлага визите за по одморите
Европската комисија сака да достави конкретен предлог за укинување на визниот режим за земјите од Западен Балкан пред летните одмори, но постојат мали шанси ваквата одлука да биде донесена на состанокот на Советот на министри за надворешни работи на земјите-членки на ЕУ закажан за 15 јуни во Луксембург, јави австриската агенција АПА.
Повикувајќи се на анонимен експерт на Европската комисија, агенцијата наведува дека на средбата во Луксембург шефовите на дипломатиите на членките на ЕУ би можеле само да „постигнат договор за идните чекори за либерализација на визниот режим“.
Белградското радио Б92, повикувајќи се на дипломатски извори во Брисел, јави дека Советот на министри на ЕУ на својот состанок на 15 јуни нема да донесе одлука за укинување на визниот режим за граѓаните на државите од Западен Балкан.
Прашањето за визната либерализација сепак ќе биде разгледувано на состанокот на министрите за внатрешни работи на членките на ЕУ, што ќе се одржи на 4 и 5 јуни во Луксембург. Според најавите од Брисел еврокомесарот за правда Жак Баро на таа средба ќе поднесе извештај за актуелните состојби во врска со ова прашање.
Според АПА, во Брисел се води „активна дискусија“ на темата визна либерализација, но засега нема доволно одговори од земјите-членки на ЕУ на претходниот предлог на Еврокомисијата.
Рен: Наша цел е одлуката да стапи на сила од 1. јануари 2010 година
Комисијата очекува во текот на првата половина на јуни да добие доволно ставови од членките на ЕУ, по што ќе може да даде конкретен предлог, врз основа на кој Советот на министри на Унијата ќе треба да донесе одлука за визната либерализација. - За тоа ќе биде потребно уште малку дополнително време, вели анонимниот извор на АПА.
Еврокомесарот за проширување Оли Рен пред две недели изјави дека Европската комисија има за цел до крајот на јуни до Советот на министри на ЕУ да ги достави предлозите за укинување на визите за државјаните на земјите од Западен Балкан кои ги исполнуваат условите за визна либерализација.
Рен нагласи дека по ова Советот на министри би требало да реши кои земји заслужуваат да се најдат на „белата Шенген листа“.
„Наша цел е одлуката (за визна либерализација) да стапи на сила од 1. јануари 2010 година“, рече Рен.
Во прилог на укинување на визите за државите од Западен Балкан оди и ставот на актуелниот претседавач со ЕУ, Чешка, која инсистира на министерскиот состанок на 15 јуни да биде донесе одлука за натамошните чекори за прашањето за визната либерализација.
Европската комисија во својот неодамнешен извештај оцени дека засега само Македонија ги исполнува сите услови за визна либерализација, па според дипломатски извори во Брисел, останува неизвесно дали ќе се оди на индивидуални одлуки или пак ќе биде решено визите да се укинат во пакет во кој покрај земјава би влегле и Србија и Црна Гора.
Според истите извори, Македонија ги има исполнето условите за визна либерализација, Србија и Црна Гора имаат добри резултати, но и одредени недостатоци, додека Албанија и Босна и Херцеговина немаат речиси никакви шанси за укинување на визите во скора иднина.
http://www.a1.com.mk/vesti/default.aspx?VestID=109310
ftopic:
