„Елефтеротипија“: Во Грција има околу 50.000 славомакедонци
Грција направи голема грешка со неподвижните имоти на славомакедонците, рекол во интервју за грчкиот весник „Елефтеротипија“, Пандио Ал. Ираклидис, професор по меѓународни односи на државниот универзитет.
На прашање што би се случило ако проблемот стигне до судот во Стразбур, Ираклидис рекол дека „во тој случај Грција би се нашла во незавидна положба, оти во 1949/50 година им ги конфискувала спорните имоти дури и без судско решение, поради што ќе и' биде наредено да плаќа обесштетување. Според него, Грција треба да престане да ја „забива главата во песок“ и да тврди дека славомакедонците не постојат.
„Нивниот број во Грција е меѓу 40.000 и 50.000 лица. Некои од нив имаат македонско етничко потекло, други пак се интегрирани целосно со грчкиот етнос, со што всушност нема никаква опасност по територијалната целина на Грција“, изјавил професорот Ираклидис.
Тој додал дека настојувањата на Атина дека такво малцинство или етничка група нема, не е правен проблем, туку практичен, исто како што решил Меѓународниот суд во 1930 година, спрема соодветните тогашни заедници во Грција и во Бугарија.
Ираклидис во интервјуто рекол дека тој гледна реално решение во спорот за името и тоа Грција да прифати едно составно име: Нова Македонија, Горна Македонија или Северна Македонија, за билатерална употреба со Скопје, но не и за меѓународна употреба. (Нетпрес)
