Генерално кога се зборува за играчи и се зборува за преценетост/преголем хајп, не се прави разлика помеѓу квалитетите на самиот играч и цената која треба да се плати/ја бара неговиот матичен клуб, односно колку тој е проценет на пазарот.
Енцо Фернандез не е преценет фудбалер, напротив. Во моментов е еден од најдобрите средњаци на негови години со сериозен потенцијал да биде играч ипол.
Ова го кажувам во ситуација кога Челзи ги загуби сите шанси за негово доведување. Го мислев и претходно, го мислам и сега. Дали Енцо Фернандез е прескап? О, да. И тоа ми создаваше непријатност ептен, иако нели не се наши парите и пазарот е таков. Кога веќе се појавија навидум посериозни шпекулации, ме фати некоја мини-возбуда, бидејќи и на 21 година и недоволен број натпревари за да се афирмира на клупско и репрезентативно ниво, Енцо ќе беше statement signing, без никакви сомнежи.
Околу неговата позиција, уште еднаш. Не е Енцо или Рајс, туку е Енцо и Рајс/било кој DMC на светот, затоа што тој не е првиот играч пред одбраната во тимот. Дали Енцо ќе го подобреше инстантно тимот? Верувам минимално. Дали Енцо со aсален DMC ќе го трансформираше и средниот ред и целата екипа? Верувам дека да.
Туку, откако прописно се посрамотивме уште еднаш, вредно е уште еднаш да се издвојат неколку работи. Прво, не верувајте (и за мене важи, ако просеравам овде) во тоа што се пишува на интернет, особено не на „Тwitter“. Eден куп новинарчичи во обид, еден куп ITK акаунти, особено сега за сагава со Фернандез. Од Аргентина, од Англија, насекаде. Почнувајќи од Романо, Енцо е договорен, па Енцо е при крај, па сака во Челзи, па договорени биле личните услови, па Челзи бил подготвен да плати 120 милиони клаузула, па само ситни детали останале, па еве го уште лекарски, за да на крај...
Челзи воопшто не ни пуштил официјална понуда до Бенфика, а имал намера да плати максимум 85 милиони. И од сите лаги и глупости што се шират, единствено верувам во изјавата на тренерот на Бенфика, Роџер Шмит, кој предмалку изјави дека (следејќи и други информации, а знаејќи го и газдата и неговиот мизерен начин на преговарање) Челзи дискутирал со Бенфика и ВЕРБАЛНО му соопштил на клубот дека е подготвен да плати 120 милиони откупна клаузула (не е ни важно дали на повеќе рати или директно), за да после неколку денови, Тод и овој другиот дебил Егбали, бараат од Руи Коста преговори. Значи, му го поматиле умот на Енцо, тој се запалил за трансфер во Челзи (што не е во ред, доколку немаш прво договор со клубот, манипулативно и бедно во секој случај) и на крај рекле „епа ние само 85 можеме да понудиме“.
Ем не го добиваш играчот, ем ги расипуваш можеби и трајно односите со Бенфика, ем се срамиш пред цел свет. Овие методи на преговори околу трансфери врескаат аматеризам, шарлатанство и несериозност. Непочитување кон другата страна. Следен пат, кога ќе тропнат на врата кај било кој друг клуб, ќе бидат ставени на чекање, или па нема да добијат повратен одговор. Заслужено.
Баш ме потсети прееска некој по интернетов, дека слична работа се случи и летово со Кунде. Мончи зборуваше дека Тод начелно го договорил трансферот за Французинов, вербално во суштина, документите скоро и да биле потпишани, а потоа се повлекол. Не знам која му е поентата, веројатно не знае ни сам. Да го сврти играчот против клубот, за да добие помала цена? Да извади добар ПР, ете, ги бараме најјаките фудбалери во светот, ама нешто во меѓувреме излезе и не успеавме да се договориме? Апсолутно немам поим што се случува, а нема поим ниту еден фан на Челзи, исто така.
И сега, се истроши време околу Енцо, ќе се копрцаат уште некој ден, ќе помине половина јануарски преоден рок и ќе останеме со куси ракави, повторно. Панично ќе се бара некој Фофана, Закарија и Обамејанг. Дај шта даш. Наместо да направиш стратегија, да имаш во секое време алтернатива, рационално да искористиш средства и пополниш позиции, ти избираш да бидеш кловн и да ти се потсмеваат сите.
Искрено, одвај и да може човек некаква позитивност да издвои откако станаа сопственици. Во ред, некоја иницијална желба за трошење пари (што е и нормално, таман работа ако не одврзат ќесе во првите месеци од газдувањето), промената на структурата и начинот на работа (Вивел како технички директор, овој од Брајтон, Стјуарт од Монако итн.), иако од тоа засега нема ефекти, рано е ете и идејата за долгорочност на тренер, а не менување често (ма да, идејата е добрa, а колку е добар Потер како наследник на таа идеја, тоа е навистина прашање за милион долари).
Тод вети спортски директор на есен, ништо. Вети спортски директор до крајот на годинава, по завршувањето на Светското, ништо. Вети спортски директор таман за јануарски преоден рок, ништо. Ги смени сите, од скаутинг служба до хигиеничар, арно ама спортски директор не доведе. Очигледно, комфорен си е со тоа тој да ја извршува таа функција и како говедо неотесано да оди од место до место по светов и да се лигави.
Капак, тој Егбали пред некое време гледам фрла дрва и камења по претходниот режим и Абрамович. Па чекај бе пријателе, фурни и фурни леб треба да изедете за да стигнете до тоа ниво. Со сите маани и предности, Челзи со Роман стана клуб од прв ешалон, ги освоите сите можни трофеи и постави некое високо скалило. Овие шарлатани, би требало да почнат да ги слушаат советите од луѓето кои ги поставија (првенствено Вивел) и да не се мешаат во фудбалски работи. Бидејќи фудбал, не разбираат.
Во однос на Потер, останувам на истиот став. Погубно би било да се промени, особено во овој дел од сезоната. Но, не си помага себеси ликот и не си помага. Од однесувањето на прес-конференции, до однесувањето на терен. Мртав се кише не боји. Па друже, не си уште во Брајтон. Не може бод со Нотингем да е добра работа, не може палец горе да креваш кога ќе ти промашат играчите зицер и кога ќе одиграат добра акција. Едноставно, не може. Не знам, од сите тренери досега што продефилирале во клубов, во последните дваесеттина години, овој единствено никако да се поврзе со фан-базата, со навивачите на стадион. Ништо, табула раса. Клише и досадни изјави, скоро па никаков напредок во играта, никаква визија, замисла. Шуплива приказна. Во ред, некои не манифестираат јавно чувства. Не барам јас да трча како Конте по аут-линија, да се тепа со противнички тренери, што и да е. Само, кога ќе види на пример Закарија, до кое дереџе е Потер и како изгледа, какви му се гестикулациите и фацијалната експресија, ќе се откаже од животот, каков црн фудбал.
Сезонава е пропадната, да не се лажеме. Уште од септември, во моментот кога некој реши да му даде отказ на Тухел. За да нешто се спаси и постави темел за во иднина, треба (освен некој нов играч месецов): да се исфрлат сите играчи од прв тим кои играат на стара слава, а да стартуваат сите кои тоа го заслужиле на тренинг и на натпреварите и да се исфрлат сите играчи чија иднина е неизвесна (Обамејанг, Пулишиќ, Зијеш, Азпиликуета, Жоргињо). Штом немаш потпишано нов договор, или ти виси статусот – ќе седиш на клупа. Не смее да игра Пулишиќ затоа што е Пулишиќ, а некој Омари Хачисон да дреме на клупа.
Од јасни причини, неквалификување во ЛШ ќе биде разочарување, нема збор. Дотолку повеќе што тоа беше некој минимум претходно и дотолку повеќе од финансиски аспект (за нас навивачите поради други причини, нели).
Ама...ама. Нема да е крај на светот, затоа што на овој клуб му треба едно јако потресување на тлото. Неиграње во ЛШ (по можност и во било кое друго натпреварување), ќе значи повеќе време за регрутација, адаптација, помал притисок и можност да се стартува од почеток. А на Челзи му треба еден нов почеток, следствено на тоа дека клубот е во реална транзиција. Арсенал игра во Европа Лига, фокус на Премиер, супер им оди. Ние со Конте освоивме Премиер, токму кога бевме сезона пред тоа десетти и не игравме никаде.
Најважно, играњето во ЛШ следната сезона (како и освојувањето со Тухел), само ќе направи поголема белја. Аха, добри сме, играме ЛШ, ќе се засилиме реда-ради, не мора многу да купуваме, да размислуваме, да се трудиме. Целта првична е исполнета. Тоа не е во ред и неуспех во оваа кампања би требало да го промени тој мајндсет, надежно. Односно, пласман во ЛШ = илузорност = долгорочна штета.
Ние, патем, тука сме, во Премиер или Чемпионшип, еби му мајката. Влегла чивијата.
