Најава: Вардар - Куманово (сабота, 18.00)
Со повеќе звучни засилувања и со веќе еден успешно реализиран официјален настап на меѓународна сцена, Куманово гостува во Скопје на најмладиот тим кој сезонава ќе настапува во Првата лига. Од Вардар порачуваат: „Знаеме против кого играме, но никогаш нема да влеземе со бело знаме“.
Со Дарко Костески како највозрасен играч на 25 годишна возраст и просечна старост на тимот од нецели 20 години, Вардар ја почнува новата сезона во Првата лига со фокус на својата веќе добро позната концепција - развој на млади играчи, усовршување на специфичната брза игра и резултатски, секако, опстанок меѓу најдобрите. Прв кој гостува на „Кале“, во меч кој ќе го отвори новото Првенство е сериозно засилениот Куманово, кој веќе го оствари својот прв официјален настап сезонава, со победата над Морнар во премиерната рунда од БИБЛ лигата.
Речиси комплетно е променет тимот на Вардар во однос на минатата сезона, а како единствено странско засилување е доведен 23-годишниот српски центар, Драган Керкез. Новиот тренер на сениорскиот тим, Бранко Андриевски, во составот предвиден за сезоната го вклучи речиси целиот младински тим кој засега успешно настапува во највозрасните младински лиги на Македонија. Куманово, од друга страна, со доведувањето на Ивица Димчевски, Владимир Георгиевски и Мико Голубовиќ, кои се придодаваат на Александар Костоски, Урош Луковиќ, Дејан Микиќ, Дарко Станимировиќ и Марјан Јаневски меѓу другите, креираше исклучително квалитетна екипа, сериозна во намерите за пласман во самата завршница од шампионатот.
Бранко Андриевски, тренер на КК Вардар:
„Имавме доста долги и навистина интензивни подготовки пред стартот на сезоната, многу се работеше на физикалиите на младите играчи, кои се особено важни во оваа силна конкуренција во која ќе настапиме. Задоволен сум од текот на подготовките, одигравме и доста пријателски натпревари меѓу кои и неколку надвор од Македонија и на тие средби сите 12 играчи што ги планирам во тимот добија еднаква шанса. Истите тие ќе бидат и во еднаква конкуренција за петте места на паркетот во текот на сезоната. Како убедливо најмлад тим во Првата лига, нашите амбиции не се сконцентрирани на којзнае какви резултати, за нас најважно е да ги воиграме, да ги изградиме правилно овие играчи. Составот е во голема мера променет од лани, како засилување го доведовме и Драган Керкез, кој до овој момент одлично се вклопи во нашата игра и изгледа дека е токму тоа што на овој тим му треба. Нема да згрешам ако кажам дека Лигата сезонава е можеби и најсилна досега, што не значи дека ние ќе влегуваме во натпреварите против екипите кои реално се фаворити со бело знаме. Напротив, против секоја екипа, тоа за нас како млад тим е дополнителна мотивација и во секој натпревар ќе ја бараме нашата шанса за изненадување. Опстанокот во лигата е нашата главна цел на резултатски план, од тоа што досега успеав да го видам, Пелистер треба да ни биде главниот конкурент. Што се однесува до првиот натпревар против Куманово, имав можност подетално да ја разгледам нивната игра на мечот со Морнар и не е ништо ново ако кажам дека станува збор за исклучително силен состав, кој против нас влегува како изразит фаворит. Но ние ќе се фокусираме на нашата игра, брзо, со многу контри и многу трчање и ќе видиме што ќе биде. Едно сум сигурен, а тоа е дека со секој нареден натпревар и со секое ново искуство во сениорска конкуренција, нашите млади играчи ќе бидат се подобри и подобри“.
Љубислав Луковиќ, тренер на КК Куманово:
„Претпоставувам како и сите останати тимови во лигата, така и ние едвај го чекавме овој почеток. Прв меч, дополнително сме мотивирани, сакаме да се докажеме, односно да покажеме дека добро сме работеле во минатиот навистина густ подготвителен период. Напорно се работеше да ги воиграме нашите нови играчи и ќе продолжиме да работиме на тоа. Амбициите се големи, се надеваме на добра сезона и мило ми е што годинава има повеќе силни тимови со слични амбиции како и нашите. Тоа значи дека нема сигурни бодови против никого, автоматски значи дека мора да се покаже силен карактер и максимален пристап за да се стигне до секоја победа. Истото важи и за првиот меч против Вардар, тие се млади момци, но знаат да играат одлична кошарка и ќе мора сериозно да се потрудиме за да стигнеме до победата која ја посакуваме. Во планот за креирање на тимот оставивме доста простор и за младите играчи на кои ќе им дадеме сериозна шанса и оваа година и јас верувам дека оваа екипа е кадарна за одлични резултати. Ќе одиме чекор по чекор, од натпревар во натпревар и целта е една - добра игра и борба за победа во секој меч“.
КК Вардар:
Кошаркари: Андреј Билјановски, Војче Лефкоски, Владимир Готиќ, Владимир Петровски, Мартин Давитков, Дејан Лазаревски, Предраг Пајиќ, Игор Ивановиќ, Александар Костадинов, Бојан Крстевски, Марко Огњановски, Давид Манасиевски, Илија Ристевски, Денис Ампов, Филип Јанковски, Дарко Костески, Драган Керкез
Тренер: Бранко Андриевски
КК Куманово:Кошаркари: Марјан Јанески, Марјан Младеновиќ, Ивица Димчевски, Владимир Георгиевски, Милош Нинковиќ, Александар Костоски, Петар Виларов, Мирослав Петровски, Наум Јакимовски, Кристијан Маневиќ, Дарко Станимировиќ, Филип Диневски, Ненад Стојановски, Дејан Микиќ, Урош Луковиќ, Мико Голубовиќ
Тренер: Љубислав Луковиќ
,гледам Вардар сс деца не знам кој ке га чува само Уроша 
