Летаат "глави" за Македонија - Канада
*Настрада бугарскиот судија Антон Генов, кој е тргнат од листата, а требаше вечерва да го води дуелот Динамо Киев - Барселона од Лигата на шампионите. УЕФА ќе ни забрани да ангажираме судии од соседството за тест средбите
Под истрага на "Интерпол", а во соработка со УЕФА е пријателскиот натпревар Македонија - Канада (3:0), одигран на 14 ноември, во Струмица. Сомнение за нова "местенка" по пријава на азиските обложувалници кои во надлежните институции го пријавиле ненормалниот проток на пари. Загуба од неколку милиони и веднаш акција на инспекторите. Прва жртва од новата афера која е повторно нов удар за фудбалот во Македонија е бугарскиот арбитар Антон Генов. Тој на скандалозниот натпревар покажа дури 4 удари од белата точка. По анализите и по неколкуте состаноци во Нион донесена е одлука. Антон Генов е симнат од листата и нема да го води денешниот меч од Лигата на шампионите меѓу Динамо Киев и Барселона. И веднаш шок во Бугарија. Денешниот ден требаше да биде врв на судиската кариера на Генов, а Бугарија по 10 години ќе имаше арбитар кој ќе води натпревар од групите во Лигата на шампионите. Одлуката на УЕФА е донесена па така место Генов за главен судија е делегиран Англичанецот Веб.
Дознавме дека Генов бил повикан на сослушување во Нион и каде одговарал пред инспекторите на УЕФА. Со тоа е даден јасен сигнал дека службите кои се во војна со фудбалската мафија веќе сериозно се вклучени во пронаоѓањето докази за "местенката" на натпреварот Македонија - Канада. Нашиот националенм тим победи, но некои претерале со парите и сакале за 90 минути да стигнат до милионски заработувачки.
За овој скандал веќе неколку дена знае и фудбалскиоот врв во земјава кој исто така е во паника. Како и пред неколку месеци околу скандалот со Победа така и сега ФФМ на Хаџи-Ристески преку своите инсталираат лажни приказни и тревоги само за да ја насочат водата на друга брана и да се спасат од притисоците. Кој ако не ФФМ треба да одговара по најновите обвиненија (не е случајна аферата на Јонуз со СМС). Приказните се крајно неаргументирани и без важност. Велат дека луѓе од Македонија го пријавиле Генов во УЕФА дека бил пијан во Струмица на ден пред средбата. Каква срамота...! Некои луѓе с$ уште како да не разбират каква моќна институција е УЕФА и што тоа значи зборот "Интерпол". Си кажуваат приказни за мали деца и што е најтрагично, и самите не веруваат во истите иако на сите треба да им биде јасно дека никој никого не може да осуди без докази. КРАЈ НА ПРИКАЗНАТА!
Што сега!? Ете ви нов срам и нови скандали. Без разлика на тоа како било и кој бил. Македонија во наредниве денови повторно ќе биде на удар од сите светски медиуми, а скандалот вчера беше топ тема кај нашиот источен сосед. Повторно сме пример за истрага околу "местенки" за интерес од обложувалниците. Катастрофа! Сега не станува збор за нечии приватни или локални клубови туку за националната гордост - репрезентацијата.
Дознавме дека на натпреварот Македонија - Канада биле огромни уплатите за наша победа, повеќе од 3 гола и триумф на домаќинот со повеќе од два гола. Тие што имале "дојава" за натпреварот во Струмица се обложувале во живо, а најголемата уплата ја направиле во 30. минута од средбата.
Натпреварот Македонија - Канада е нов случај во досието "Македонија", кое е најголемо во УЕФА затоа што постојат уште десетина клупски и репрезентативни натпревари за кои службите во Нион вршат истрага. Има ли крај на ваквите лудории поврзани со Македонија. Ние сме црна дупка во системот на УЕФА и жариште на "фудбалски" експерти кои се занимават со лажирање и "местење" натпреварии. Не дека другите не "местат" туку само овие нашиве ги фаќаат. Не ги бива ниту во најцрните бизниси во фудбалот.
Ако се докаже дека натпреварот Македонија - Канада бил "наместен" е дури тогаш каде ќе им одат душите на оние кои се осудиле да го оцрнат националниот тим и повторно да ја срамотат државата.
И. Д. Ивановски
Генов барал помош од ФФМ
Како што неофицијално дознавме, Антон Генов бил на сослушување во Нион. Веднаш по дознавањето на скандалот и при враќањето за Софија им се јавил на своите пријатели во Македонија. Им кажал за проблемите и од нив побарал помош. ФФМ требало да прати допис до УЕФА со кој ќе го штити Генов, но дали е тоа направено немаме никаква информација затоа што во ФФМ владее хаос затоа што "куѓата на фудбалот" е "бомбардирана" од проблеми по серијата скандали за финансиското работење на федерацијата и злоупотребата на донациите од ФИФА и УЕФА. Дали и и какво писмо прати ФФМ во УЕФА? Како ли го спасуваше Генов од обвинението?
Победа за мандат и договор...!?
Канада во Македонија дојде во турбулентните денови на нашиот фудбал. Неуспех против составот од Северна Америка ќе беше лоша увертира за Харалампие Хаџи-Ристески на Собранието на ФФМ кое се одржа една недела по оваа средба. Истото важи и за Мирсад Јонуз. Ако не го победеше некомплетниот гостин тоа ќе значеше и несигурност околу неговото продолжување на договорот како селектор на Македонија. Нашиот национален тим за општа радост успеа да победи, и тоа убедливо и лесно, со 3:0. Гол на Седлоски и два на Пандев од белата точка.
Кој би можел да игра на обложувалница и да знае дека ние така сигурно ќе победиме...!? Од каде толку храброст и да се жртвуваат милионските уплати...!? Кој имал интерес оваа средба да заврши со наша победа...!? Некои работи постојано се повторуваат...
МАКЕДОНИЈА Ѓ.П И СЛОГА ЈУГОМАГНАТ СО ПРИЈАВА
МВР да ги реши "местенките"
Пријава до Министерството за внатрешни работи за "местенките" во Македонија. Тоа го направија двата клуба кои со бојкот одат против режимот на Харалампие Хаџи-Ристески. МВР ја доби пријавата од екипите во петокот каде институциите веќе го имаат потребниот доказ за кривично гонење и истрага на натпревар од домашниот шампионат меѓу Победа и Вардар. Како доказ се приложува видеоснимката на судијата Сеља Илир од Струга, кој кажува како и кој врз него вршел притисок да суди во корист на Победа.
Покрај пријавите за "местенките" постојат и докази до органите за прогон за финансиските скандали кои се случуваат во федерацијата и безаконскиот одлив на илјадници евра од касата на ФФМ. Според најавите, во текот на деновите кои следат и надлежните институции ќе тргнат во акција околу криминалот кој владее во домашниот фудбал. Без акција не може да се спаси пропастот на овој спорт во земјава кој настанува само поради безредието и диктатурата од страна на Харалампие Хаџи-Ристески.
