Македонија на ОИ ќе биде претставена под уставно име
Кина не планира да ја промени одлуката македонските спортисти во Пекинг да бидат најавувани и претставувани со уставното име.
Протестот што утрово го упатиле грчката Влада и грчкиот Олимписки комитет до Организациониот комитет на игрите се однесува на употребата на зборовите Македонија и Македонци за време на официјалното претставување на спортистите, како и на официјалните публикации на Пекинг 2008.
Грција барала кинеските власти да ја користат референцата ФИРОМ, под која Македонија е зачленета во ОН и под која фигурираше на претходните игри во Сиднеј. За Грците проблем е и користењето на кратенката МКД, којашто е согласна со правилата на МОК, а која според Атина треба да биде замената со ФИРОМ.
Македонските репрезентативци не го чувствуваат политичкиот притисок, вели Сашо Поповски, генералниот секретар на МОК.
„Во договор со Кинескиот олимписки комитет и Организациониот комитет од Олимписките игри во Пекинг 2008 договорено е Македонија да биде претставена под уставното име - Република Македонија. Немаме никаква информација дека сето тоа ќе биде променето“, рече Сашо Поповски, генерален секретар на МОК.
„Последниот состанок заврши пред пет минути, каде што воопшто не се разговараше на таа тема. Ние сме сигурни дека така и ќе остане. Кинезите за ова кратко време добро ги запознавме, тие тешко одлучуваат, меѓутоа кога ќе одлучат, тешко дека тоа може да се промени“, додаде Поповски.
Поплаките на Атина се однесуваат и на редоследот под кои ќе настапат екипите на свеченото отворање. Се бара Македонија да биде во групата земји што почнуваат на „Т“ заедно со Турција, Тунис и други земји, поради тоа што во официјалната листа на Обединете нации Македонија е под името The Yugoslavian Republic of Macedonia.
Иако во неформалните контакти пред Олимпијадата, кинеските власти најавиле дека Кина ќе го почитува уставното име на Македонија, грчката Влада очекува пропустите на организаторот да бидат надминати.
Ниту еден претставник на македонскиот државен врв не е најавен да
присуствува на свеченото отворање на Олимпијадата, закажано за утре.
Извор