Светската првенка во трката на 800 метри од неодамнешниот шампионатот во Берлин, Јужноафриканката Кастер Семенја е хермафродит, има и женски и машки полови органи - објави денеска австралиски „дејли телеграф“.
Прејудицирајќи ги официјалните резултати од тестирањата на полот за кои Светската атлетска федерација најави дека ќе ги објави дури по два месеца.
Повикувајќи се на сигурни извори од Светската аматерска атлетска федерација, таблоидот од петтиот континент тврди дека испитувањата покажале оти освен што има три пати повеќе тестостерон отколку просечната жена, 18-годишната Семенја има внатрешни тестиси наместо јајници, а воопшто нема матка. Тоа значи дека иако растела како девојче, а сега живее како жена, има и машки и женски полови особини.
Врвното тело на светската атлетика допрва ќе бара начин како да се справи со контроверзната ситуација.
Засега не ги демантира објавените резултати за кои се уште не е известена ниту Семенја, но вели дека случајот ќе го реши во ноември.
Водечките светски медиуми сепак уште сега тврдат дека, без разлика на се, најверојатно златниот медал од мундијалот во Берлин нема да и биде одземен, но постои можност во иднина да не и биде дозволено да се натпреварува во конкуренција на атлетичарки.
Јужноафрикански атлетски официјални лица веднаш реагираа дека жестоко ќе се противстават на секаков начин на дискриминација на тинејџерката која преку ноќ се проби на елитната атлетска сцена.