Сите кои размислуваат за протести, треба да земат во предвид дека живееме во Вајмарската Република, но истовремено транзитираме кон Нацистичка Германија, со разликата што фирерот сеуште не се самопрогласил за извршител и уживател на претседателските и премиерските права и обврски истовремено, а денешните нацисти барем засега не етикетираат жртвени јагниња како што германските нацисти ги етикетирале Евреите како нелуѓе.
Или како што кажал германскиот лутерански пастир Мартин Ниемолер:
Прво дојдоа по комунистите,
а јас молчев бидејќи не бев комунист;
Потоа дојдоа по социјалистите,
а јас молчев бидејќи не бев социјалист;
Потоа дојдоа по синдикалците,
а јас молчев бидејќи не бев синдикалец;
Потоа дојдоа по мене,
а немаше кој да се побуни во мое име.
На овие строфи може да се додадат и строфите:
Потоа дојдоа по болните и инвалидизираните,
а јас молчев бидејќи не бев ниту болен ниту инвалидизиран;
Потоа дојдоа по Евреите,
а јас молчев бидејќи не бев Евреин;
и ред други.
Во јуни 2011 беше извршено убиство врз млад дечко на плоштад Македонија, на истата вечер кога политичката коалиција која победи на тогашните вонредни парламентарни избори во Република Македонија, славеше на истиот плоштад. Следуваа протести против полициското насилство, но истите беа забрзано и лесно прекинати поради внатрешна поделеност и етикетирање на припадници на едни и на други политички партии и невладини организации.
Кристално истото се случува постојано кога се организираат протести поради било што, спротивната страна веднаш ги бара виновниците во организаторите и во учесниците во протестите, наместо во самите проблеми поради кои се организирани протестите и вистинските виновници за истите тие проблеми.
Ова е исто како во Руската Империја, селаните се потчинети, работниците можат да бираат помеѓу некаква заработувачка, па макар и во нечовечки услови, или потчинетост исто како селаните, а буржоазијата и црквата се придружници на царот.
Февруарската буржоаско-демократска револуција во Русија во 1917 година ставила крај на царизмот и на Руската Империја, но дури откако војската, која се сочинувала претежно од селани, наместо да ја задушува револуцијата, застанала на страната на незадоволните работници и селаните, а на буржоазијата и станало јасно дека мора да бира - или ќе пропадне заедно со царот, или ќе мора да му го сврти грбот и нормално, за да си ги спасат сопствените задници, богаташите му го свртиле грбот на царот.
Кристално истото важи и денес, од една страна лесно може да се поделуваат луѓето на патриоти и предавници, а од друга страна многу е тешко да се убедат луѓето од сите слоеви на општеството да ги остават своите хирови, својата горделивост и своите политички убедувања настрана и да се обединат за заедничка цел - поголемо добро за сите граѓани.
Кристално истата љубов која ориѓани и битолчани ја имаат за скопјанчишчата, е еднаква со непостоечката обединетост помеѓу граѓаните кога треба да излезат и да протестираат против нешто.