Владата како гаталец - оптимист, индустријата паталец - песимист
Дали наскоро ќе се спречи тонењето на економијата
Владата и официјално ја потврди рецесијата во земјава, во моментот кога стопанствата на повеќе развиени држави излегоа од неа. Ако е оваа лоша вест сама по себе, добрата, соопштена истовремено со објавувањето на рецесијата, е тоа дека истата таа Влада, во последниот квартал од годинава очекува пресврт.Тоа значи, пред се, запирање на трендот на рапидно опаѓање на индустриското производство, но и други позитивни движења во македонската економија.Меѓутоа, стопанствениците, конкретно тие од областа на преработувачката индустрија, не го делат владиниот оптимизам. Имено, што се однесува до очекуваниот обем на производството, тие прогнозираат благо опаѓање до крајот на годинава. Ако се има предвид дека нивната продукција е стрмоглавена во еден подолг временски период, тогаш ситуацијата на тој план ќе се искомпликува уште повеќе.
Во анкетата спроведена од Државниот завод за статистика во август годинава, менаџерите на преработувачките фирми се изјаснија дека состојбата е подобрена за извесен степен во споредба со претходните два месеца, потенцирајќи дека таа е загрижувачка во однос на истиот минатогодишен период. Но, поголем дел од нив се, сепак, оптимисти дека порачките ќе се зголемат, со што ќе се создаде поголем фронт за работа.
Потврда плус за нивното дереџе е тоа што залихите на суровини и на репроматеријали, како и на тековни набавки, се под нормалното ниво. Од друга страна, се зголемуваат залихите на готови производи, од проста причина што се потешко се наоѓаат купувачи за нив, како на домашниот, така и на странскиот пазар. Инаку, капацитетите на преработувачката индустрија во Македонија, во текот на претходниот месец беа искористени само 56,3 проценти.
Менаџерите, како фактор број еден, кој влијае најмногу негативно врз актуелната состојба, ја наведуваат недоволната побарувачка однадвор. Тоа, според нив, „партиципира“ со 25 индексни поени во причините воопшто. Натаму, на редуцираната домашна побарувачка отпаѓаат 17 индексни поени, а на неизвесното економско опкружување - 13,5.
Дополнителен проблем претставува тешката, а во некои случаи речиси и невозможна наплата на побарувањата. Тоа, пак, уште повеќе ја влошува состојбата на планот на ликвидноста, предизвикувајќи проблеми со исплатата на платите на вработените, со набавката на суровини и репроматеријали, со враќање на кредитите кон банките и други.
Со еден збор, готовите пари (и) во индустријата се најбараното нешто. Проблематиката е драматично усложнета во ситуација кога е речиси неможно да се добие кредит, а каматите на тие што се искористени се значително зголемени.
Конечно, менаџерите на фирмите од преработувачката индустрија се изјаснија во анкетата дека факторот „зголемени финансиски трошоци“ влијае со 11 индексни поени врз нивната незавидна состојба.
http://www.time.mk/read/NONE/7465f0e0c4/index.html
