Унијата во поларни, Балканот во пролетни услови
Додека интегрираната Европа сплотено се справува со поларни температури од минус 20 Целзиусови степени и со сите премрежиња што тие ги носат - од нарушена сообраќајна комуникација до смртни случаи од смрзнување, неинтегрираниот Балкан живее предбожиќна пролет со температури од 20 степени во позитива. Како климата ги препознава политичките граници на Унијата?
Европа повторно поделена - со луда клима
Поделбата на европскиот континент што досега ја создаваа политичките предуслови деновиве се чувствува и - температурно.
Додека интегрираната Европа сплотено се справува со поларни температури од минус 20 Целзиусови степени, со нарушена сообраќајна комуникација, откажани авионски летови, снежни наноси и смртни случаи од смрзнување, неинтегрираниот Балкан живее предбожиќна пролет со температури од 20 степени во позитива.
Како климата ги препознава политичките граници на Унијата?
- Северниот дел на Европа и дел од Балканот се под влијание на северни ветрови и затоа температурата таму е ниска и проследена со снег, додека, пак, нашата и околните земји Албанија и Грција се под влијание на јужните ветрови што носат топло време - вели Лена Јовановска, синоптичар при Управата за хидрометеоролошки работи.
Влијанието на топлиот воздушен бран од Медитеранот, кој десетина дена ја грее нашата земја, придонесе за ова невообичаено топло и сончево време и за максимална дневна температура до 22 Целзиусови степени, која ќе се задржи и во текот на денешниот ден. Во западните делови се можни почести врнежи од дожд. Најтопол град според синоптичарите ќе биде Гевгелија.
И во Скопје ќе биде релативно сончево со можни краткотрајни дождови и температура од 18 Целзиусови степени.
- Нашата земја е под влијание на јужно струење на топла и влажна воздушна маса од Медитеранот, кое ја покачува температурата на воздухот и придонесува за ова убаво и сончево време - ги објаснува Јовановска речиси необјаснивите временски разлики од онаа, европската и од оваа, неинтегрираната страна на континентот.
Убавата слика ќе се смени
Веќе од викендов синоптичарите најавуваат промена на оваа убава временска слика, особено од утре попладне, кога се очекуваат опаѓање на температурата, зголемување на облачноста и пообилни врнежи, кои на повисоките места ќе преминуваат во снег. Снежната покривка ќе донесе намалување на дневните и на ноќните температури и во текот на следната недела.
Ова не е прв пат кај нас да се измерат невообичаено високи температури за декември. Според податоците на УХМР, највисока максимална декемвриска температура во земјава е измерена минатата година во Битола, на 31 декември. Термометрите тогаш регистрирале 23 степени, како резултат на топлиот бран што го зафати јужниот дел од нашата земја.
Невообичаено високи температури во Скопје се забележани на 15 декември 1952 година, кога живата се искачи до 21,2 Целзиусов степен и на 27 декември 1995 година, кога се измерени 21,3 степен.
И анализите што ги прават стручњаците на Министерството за животна средина и просторно планирање го потврдуваат порастот на температурите во сите климатски области во земјава. Мерењата направени од 1971 до 2000 година покажуваат дека најтопла била 1994 година, кога температурните просеци се повисоки за 2 Целзиусови степени во Скопје, Демир Капија и во Битола. Највисоките вредности на средните годишни отстапување на температурата се регистрирани во регионот на субмедитеранската клима, како што е Овчеполието. Невообичаено е тоа што се забележува пораст на температурите во зимските и во летните месеци и нивно намалување во пролетните и во есенските, велат од Министерството за животна средина.
Временски промени
На што се должат ваквите драматични временски промени?
- Порастот на температурите во нашата земја е резултат на глобалното затоплување што, пак, е резултат на повеќе фактори. Индустријализацијата, емисијата на стакленички гасови, сечењето на шумите, последните години направија да се зголеми концентрацијата на гасовите во атмосферата, со што се нарушува рамнотежата на Земјата - објасни м-р Теодора Обрадовиќ-Грнчаровска, државна советничка при Министерството за животна средина и просторно планирање.
И годишното количество врнежи е намалено во сите метеоролошки станици во земјава, а најизразено е во Маврови Анови и на Попова Шапка, додава нашата соговорничка.
- За сметка на облачноста, пак, се зголемуваат сончевите денови и во субмедитеранското и во субалпското планинско подрачје на Македонија - вели Обрадовиќ-Грнчаровска.
Во текот на вчерашниот ден највисока температура од 23 Целзиусови степени е измерена во Кавадарци, потоа следи Демир Капија со 22, а во Скопје, Гевгелија и во Битола е регистриран 21 Целзиусов степен. Најсвежо беше во Лазарополе со 9 степени, на Маврово беше 10, на Попова Шапка 14, додека во Охрид беа регистрирани 13 Целзиусови степени.
Се излеа Радика
Реката Радика се излеа од своето корито, а сите водотеци во мавровскиот регион се зголемени. Поради поплавите, предизвикани од поројните дождови и силните ветрови, се оштетени мостови и стопански објекти во реканскиот регион.
- Радика е излеана по добар дел од текот - изјави градоначалникот на општината Маврово-Ростуше, Мукрем Мемеди, кој ги алармирал институциите за состојбата во регионот.
А.С.
Автор: П.Т.
http://www.novamakedonija.com.mk/NewsDetal.asp?vest=12310956471&id=9&prilog=0&setIzdanie=22149