Фаворитот на претстојните претседателски избори во Бугарија, Росен Плевнелиев не му го знае името на шефот на македонската држава. Кандидатот на партијата на премиерот Борисов не знаеше или пропушти да одговори на провокативното прашање од приврзаниците на неговиот противкандидат социјалистот Калфин, кои на телевизискиот дуел се обидоа да ја тестираат неговата информираност.
„Во предизборната кампања посетивте неколку европски престолнини и се сликавте со г-ѓа Меркел, но какви се Вашите трајни меѓународни контакти? Освен тоа, би сакала да ми кажете кои се актуелните претседатели на Македонија, Португалија и на Кина?“, праша Вероника Дерибалтова симпатизер на кандидатот Ивајло Калфин.
„Додека тука во Бугарија извесни политичари говореа дека јас имам црн печат и сум непожелен во Германија, додека за тоа објаснуваа, јас имав средба со канцеларот Меркел, рече Росен Плевнелиев кандидат за претседател на Бугарија.
Тој продолжи да зборува дека на средбата присуствувал и советникот на Обама, Џереми Рифкин, но публиката инсистираше од него да чуе за Иванов, Силва и за Ху Џинтао.
„Јас се обидувам да Ви зборувам за нешто важно... рече Плевнелиев, прекинуван од бучната реакција на публиката која бараше да ги каже имињата.
Водителот на ТВ дуелот Плевнелиев-Калфин, Николај Бараков побара да не биде прекинуван кандидатот додека одговара, но Плевнеливе продолжи во истиот стил па наместо за имињата зборуваше за значењето на соработката со Кина, по што Бараков му го одзема зборот а на публиката и објасни дека кандидатот има право на прашањата да одговори како што тој сака.
Наредната недела, граѓаните на Бугарија ќе го бираат својот нов претседател. Во водство според испитувањата на јавното мнение е токму Плевнелиев, човекот на Борисов, роден во гратчето Гоце Делчев.
Најсериозен противкандидат му е Ивајло Калфин а поранешната еврокомесарка Меглена Кунева е трета на листата на популарност. Со оглед на малата разлика во скорот, се очекува новиот претседател на Бугарија да биде познат дури по вториот изборен круг кој ќе се одржи на 30 октомври.
Среќко Поповски
