Медот “тартуф” ќе биде познат како македонски бренд
“Нашиот мед не е мед туку е тартуф во форма на мед. Тој има и дополнителни карактеристики што ги немаат ниту тартуфот, а ни медот, како што е калиумот во големи количини, витаминот Ц во многу поголеми количини од останатите медови, железото и т.н. Она што е најбитно исто така медот има и аминокиселински состав исто како тартуфот” вели Андев. Тој додава дека според анализите кои ги правел МАНУ, медот бил единствен не само кај нас туку и во светот. Досега набавиле 140 пчелни семејства и овие пчели се сместени на Кожуф. За почеток толку можеле да набават бидејќи банките не сакале да им одобрат кредит иако гарантирале со целиот имот. На Кожуф сега имаат 100 илјади квадратни метри земјиште, а во Радишани направиле погон каде што ќе го чуваат медот. Нивните планови се во наредиот период да имаат 7.000 пчелни семејства кои ќе даваат мед “тартуф”, а и да развијат планински туризам. А за тие што нема да веруваат дека медот е од тартуф, бидејќи оваа печурка расте под земја, од компанијата објаснуваат: “Овој мед го даваат само одредени пчели кои можат да го собираат. Пчелите се насочени да го бараат тартуфот, иако тоа изгледа нелогично бидејќи тој е под земја. Тартуфот е паразитно растение кое расте на корењата на дабот, леската и други растенија. Пчелите го собираат тартуфот преку медовината на листовите”, објаснува Андев.
Медот го вадат на Кожуф, таму го центрифугираат и во инокосни ѓумови го префрлаат во резервоарите во погонот и потоа го пакуваат. Од летниот период па досега имаат произведено четири тони мед, а нивните проценки за во наредниот период се многу поголеми. Според предвидувањето на Андев, само за во странство ќе им биде потребна огромна количина на мед.
За производство на медот им била потребна инвестиција од 200 илјади евра, која постепено ја обезбедувале од акумулираните средства од основната дејност на компанијата односно продажба на производите на “Кенди” во Македонија.
На домашниот пазар се продава во 400 грамски теглички, кои чинат 800 денари за тегла. Андев објаснува дека тоа можеби ќе изгледа скапо за една тегла мед, но бидејќи има такви лековите својства тој е релативно евтин. Според цената која ја има медот тој ќе биде достапен само за луѓето кои имаат подлабоки џебови. А за извоз медот ќе се извезува во теракоти од 330 милиграми и голема од 750 милиграми. Цената за извоз на медот ќе биде многу повисока. Во наредниот период тие планираат и проширување на палетата на нови производи. “Планираме да произведуваме одредени масти, лосионии сл. Во иднина ќе произведуваме пијалак кој ќе биде нешто како “мастика” и “узо”, веќе му дадовме име “Лопез”. Погонот за ова производство е лоциран исто така во Радишани. Сега ги правиме испитувањата и некаде на пролет би требало производот да излезе на пазарот, а понатаму откако ќе го развиеме тој производ планираме да подигнеме и винарија” вели Славе Андев.
