http://sport.com.mk/?ItemID=6E4C4508554B6943838B6735E0CFD3D6
Станува збор за 17-годишен фудбалер од средниот ред кој ќе конкурира за настап сениорската екипа на „црвено-црните“, а ќе „помага“ и во младинскиот тим на шампионот.
Иако преодниот рок е веќе завршен, шампионот Вардар доби ново име во своите редови. Практично со неговиот ангажман првакот добива „две во едно“, односно на него покрај сениорите, ќе можат да сметаат и младинците на „црвено-црните“. Станува збор за Филип Стојчевски, 17-годишен играч кој пред само неколку дена пристапи на Вардар, а веднаш доби шанса покрај да тренира, и да игра во сениорите откако дебитираше на натпреварот со Раднички Ниш, на пријателскиот дуел одигран во неделата.
Стојчевски игра во средината на теренот, односно како последен играч за врска, „плејмејкер“ а може и како десно крило, што значи поливалентен фудбалер од средниот ред.
ПОТЕКНУВА ОД МЕТАЛУРГ
Филип Стојчевски е само еден од талентите од екипата на Металург која во последно време „вади“ добри млади играчи. Меѓутоа, „хаосот“ со испаѓањето и нестабилната финансиска ситуација придонесе талентите да си одат, а Вардар за Стојчевски е средина во која може да напредува. Поточно доколку не добива шанса во сениорскиот тим, ќе ја добива во младинците, а згора на тоа првиот тим на Вардар има проблем и со играчи под 21 година, кои се задолжителни. Досега се останати само Петар Петковски и Дарко Велковски, а тука конкурираат и Есмин Личина и Ердон Даци, но и тие главно повеќе шанса добиваат во младинската екипа.
ДЕБИТИРАШЕ СО РАДНИЧКИ
Инаку, Стојчевски веќе го имаше своето деби во дресот на Вардар. Играше на средбата со Раднички Ниш која беше од пријателски карактер во неделата каде што доби шанса во второто полувреме. И веднаш покажа дека станува збор за надежен играч во кој „црвено-црните“ ќе можат да сметаат во иднина.
Стојчевски веќе има искуство со настапи во сениорска конкуренција. Тој на неколку меча беше дел од Металург во минатиот шампионат во Првата лига. Иако овој тим испадна, сепак, беше еден од најдобрите од таборот на „Железарците“, а еднаш се запиша и во листата на стрелците. Згора на тоа е и репрезентативец на селекцијата до 17 години на Македонија.
Нов играч сме имале
