Заклучно со првиот квартал од годинава Бруто Надворешниот долг на Македонија (вкупен долг во кој освен јавниот се вбројува и долгот на фирмите, осигурителни друштва, банки…) изнесува 6,1 милијарда евра, покажуваат новите податоци на Народната Банка. Во однос на состојбата на крајот од декември, 2014 та година, заклучно со март,
долгот е зголемен за 230,8 милиони евра.
Со сегашните позиции, Бруто надворешниот долг на Македонија изнесува 68,68% и според овој параметар, земјава е во групата на високо задолжени економии.
Ако се анализира стуруктурата на бруто надворешната задолженост, најголем дел од долгот или 2 милијарди евра се на име на државата, следуваат компаниите, осигурителните компании, домаќинствата кои должат 1,9 милијарди евра, зад нив според висината на задолженоста кон странство се банките со долг од 602 милиони евра и на крајот е Народната Банка со долг од 336,7 милиони евра.
Ако пак се анализира надворешниот долг според рочноста на кредитите, тогаш најголем дел од долгот или 4,6 милијарди евра се долгорочни задолжувања а 1,5 милијарди евра се краткорочен долг.
Според податоците на НБМ, на крајот од првото тромесечје Јавниот долг изнесувал 3 милијарди евра и во однос на крајот од ланската година
се зголемил за 178 милиони евра.
Според податоците на Министерството за финансии пак, Јавниот долг изнесува 3,9 милијарди евра или на крајот од првиот квартал од годинава тој изнесувал 43,6%, што по ланската година ( кога долгот изнесуваше 46% од БДП), претставува едно од највисоките нивоа на задолженост измерени во последните 11 години.
