Македонија не е единствената држава чија евроинтеграција ја условува Бугарија со договор за пријателство и соработка. Како што изјави денеска шефот на дипломатијата, Кристијан Вигенин, во моментов, покрај со нас, оваа земја води преговори за таков договор и со Србија, надевајќи се дека со нив ќе се постигне ниво на соработка која ќе покаже дека регионот се менува. И денеска, ниту Вигенин ниту министерот Никола Попоски не открија кои се спорните точки во преговорите што ги водат веќе втора година, при што бугарскиот шеф на дипломатијата тврди дека има напредок, а македонскиот дека напредок е самиот факт што почнале отворено да разговараат. И на оваа средба, што се случи вчера во Скопје, бугарскиот министер стави акцент на овој документ, а нашиот на инфраструктурните и економски проекти, бизнис-форуми и првпат на некаков меморандум за размена на простор за градење амбасади, наша во Бугарија и бугарската кај нас, во рамките на новиот тренд за штедење во дипломатијата.
Чекор по чекор да изградиме заемна доверба, па да ги решаваме и тешките прашања, беше главната политичка порака на бугарскиот гостин, со констатација дека дијалогот околу договорот за пријателство и соработка продолжува, но треба да почне да дава и резултати.
„Бугарија го поддржува европскиот пат на Македонија, но отворените прашања со нас и со Грција треба да бидат решени, бидејќи прашањата за добрососедските односи и соработка се клучни при оценувањето на подготвеноста на една земја да и' се приклучи на Унијата“, ни го објасни ветото Вигенин. „Нашите преговори и разговори за договорот за пријателство и соработка продолжуваат и последните месеци постигнавме извесен напредок“, рече тој, додавајќи дека нивна политика е да се развива соработката и во други области и со тоа, и со поддршката на медиумите кои ќе ги покажат и позитивните работи меѓу двете земји, да се изгради доверба која чекор по чекор ќе доведе до решавање на тешките проблеми. „Тие не се многу, но се важни и не треба да бидат избегнувани. Замачкувањето на тие прашања не е опција и треба да се обидеме градејќи ја оваа доверба да стигнеме до можност да зборуваме за тешките проблеми без тие да бидат препрека за развојот на нашите односи“, рече Вигенин, па нагласи дека нема конкретни рокови за договорот и нема да се брзаат.
На директното прашање околу што е постигнат напредок во преговорите со Бугарија, Попоски одговори дека двете страни се запознати со чувствителностите, ние со бугарските, тие со македонските, дека дијалогот е отворен и дека се обидуваат да дојдат до текст со кој ќе бидат задоволни и едните и другите.
Генерално пак Вигенин предупреди на голем ризик од изборите во Европскиот парламент, каде што се очекува дека ќе влезат не мал број претставници на политички партии што се антиевропски, евроскептични и ненаклонети на проширувањето. „Оваа година ќе биде година на предизвици и на промени во ЕУ и во институциите. Изборите нема да бидат стандардни, а ризиците пред ЕП се големи. Досега тоа беше најпроевропската институција и најпозитивната кон проширувањето“, објасни тој, додавајќи дека не се знае ни колку ќе биде посветен на овој процес идниот еврокомесар и колку тој ќе има поддршка од членките. Сепак, според него шанса за регионот е што Грција и Италија ќе ја предводат ЕУ во овој период бидејќи доаѓаат од регионот, го знаат и имаат интерес да напредува, но тоа што проширувањето не се најде меѓу приоритетите на Атина сега била објективна причина.
