Си имам маки.. се заљубив во една девојка, повеќето нејзини другарки се во врска со мој другари од друштвото и цело време ја гледам бидејки излегуваме заедно како друштва.. проблемот е што таа си има дечко/мувач (не знам точно), па секогаш ги гледам заедно, првиот пат ми падна најтешко кога ги видов, 10 минути како парализиран стоев. Најтрагично е тоа што од почетокот нејзините другарки се шегуваа со мене како сум ја сакал и сега таа заедно со нејзиниот дечко/мувач мислат дека тоа е само шега и дека уствари јас неа ја неќам.. кажете решение
Кажи ѝ дека ја сакаш. Директно, во очи.
Најголем ефект би имало следново: да сте собрани цело друштво, вклучувајќи ја и неа (без разлика дали со неа е дечкото/мувачот). Стани и пред сите кажи ѝ дека ја сакаш. И потоа, без да има време за одговор од кого и да е, оди си од друштвото. Ако ја свртат работата на смеа, супер, но ти сеедно оди си.
И не само од таа средба - оди си од целото друштво. Остави ги сите тие другари/другарки, бидејќи таму се наоѓа онаа што ја сакаш и не можеш да ја имаш. Такво друштво не ти е потребно, што ќе ти предизвикува болка.
И биди цврст - не прифаќај да се вратиш во тоа друштво без таа да ти биде девојка. Зашто другарите и пријателите се бираат и нема потреба да бираш другари и пријатели коишто ти нанесуваат болка, макар и индиректно, макар и не по нивна вина.
Ефектот од тоа ќе биде следниот: ќе видиш колку им значиш на твоите другари/другарки, односно колку им значи таа, т.е. мувачот со којшто е. Веднаш ќе почнат муабети од стилот „Абе вреди ли да го изгубиме другаров заради неа? А особено заради дечкото/мувачот со којшто е во моментов?“ и ќе дојдат до заклучок. Тој може да биде дека таа или дечкото/мувачот им се поважни и нема повеќе да те бараат или ќе увидат дека ти си им поважен и ќе се обидат да те вратат меѓу нив. Ако си цврст на своето стојалиште дека ќе се вратиш во тоа друштво само ако таа ти биде девојка, ќе бараат начини таа да раскине со дечкото/мувачот за ти да се вратиш (другарките во ова ќе имаат најголема улога).
Истото тоа ќе го видиш и ти самиот: колку им значиш на другарите/другарките во период на криза, кога страдаш. Ќе видиш кој ќе остане покрај тебе, а кој не, т.е. нема да се тревожи дека страдаш со таа е со дечкото/мувачот. И ќе ги запознаеш луѓето подобро и ќе видиш на кого ќе треба да трошиш повеќе време, а на кого не.
Во овие моменти, одлучуваш дали е поважна твојата сопствена душевна состојба или друштвото. Јас сум бил на твое место и секогаш сум напуштал друштва коишто не биле добро поставени кон мене. Тоа траеше долго и беше болно, но знам дека на крајот останав само со оние луѓе на коишто вистински им значам, колку и да се малубројни. И доволно е да ги видам или чујам и да се почувствувам убаво.
Велат, не е страшно да си сам; страшно е да си меѓу луѓе коишто прават да се чувствуваш сам. Затоа, искажи го она што го имаш на душата пред оние коишто треба и одбери да бидеш сам. Ако луѓето те остават да бидеш сам, тоа е подобро отколку да се обидуваат да ти докажат дека твоите чувства не се такви какви што знаеш дека се. Лажни пријатели не ти се потребни.
Твоето чувство кон таа девојка е вистинско, но само за тебе. Велат, ако имаш некоја желба, Универзимот прави заговор да ти се оствари. Она што *не* е кажано во таа мисла е дека својата желба мора јасно да ја ставиш до знаење на Универзумот, односно неговите активни единки, односно луѓето. Бидејќи тие не знаат да читаат мисли, за жал не знае ниту Универзумот. Затоа мора да се фрлиш во оган и својата суштина да ја изложиш пред сите засегнати, колку и тоа да те прави ранлив и можеби ранет после тоа. Верувај, многу е полошо да те боли цел живот по малку (знаејќи дека си имал шанса да направиш нешто, што и да е, а не си го направил), отколку да те боли еднаш и многу (кога ќе ги искажеш своите чувства), но да знаеш дека си го направил вистинскиот чекор во вистинско време (ова од лично искуство).
Со лесно.
