АЈ АИРЛИЈА
500 денари килограм јагнешко за Велигден
Килограм јагнешко месо за Велигден, во месарниците и во супермаркетите низ Македонија ќе достигне цена од 500 денари. Ова е рекордна цена во последните 10 години, која ја најавија трговците и одгледувачите на овци. Лани и пред две години, за велигденските празници јагнешкото се продаваше за 380 денари по килограм.
Вчера во месарниците на Зелен пазар во Скопје, килограм јагнешко чинеше од 330 до 400 денари. Продавачите ни рекоа дека во следните неколку недели очекуваат зголемување на цената за најмалку 100 денари, бидејќи кланиците веќе им најавиле поскапување.
Скок на цената на јагнешкото најавуваат и одгледувачите. Според Тодор Мушевски, претседател на Националниот сојуз на одгледувачи на овци, поскапувањето ќе се движи околу 50 денари. Според него, во моментот килограм јагнешко жива мера се продава по цена од 160 денари. Но оваа ниска цена се очекува за кратко време да се зголеми на најмалку 200 денари по килограм.
"Ако ние како жива мера им го даваме за 200 денари за килограм, најниската цена во малопродажба би била над 400 денари.
Имаме зголемени производствени трошоци, намален број на јагниња, поради студената зима, и зголемена побарувачка за извоз. Сето тоа ќе придонесе за Велигден да поскапи јагнешкото месо во Македонија", објаснува Мушевски.
И годинава, како и претходните, македонското јагнешко за Велигден се извезува во Италија, Грција и во Хрватска.
http://www.vest.com.mk/?ItemID=D30869763C0BED45A36FF0E0D3379FAA&arc=1