Бериша тргувал со оружје
Актуелниот албански премиер Сали Бериша бил еден од главните трговци со оружје за Ослободителната војска на Косово (ОВК) за време на војната на Косово. Тој во 2008 година се сретнал со поранешниот косовски премиер Рамуш Харадинај поради уништување на документацијата во врска со трговијата со човечки органи, пишува белградскиот весник „Политика“.
Во предметот „33-08“ на Обвинителството за воени злосторства на Србија се вели дека центарот за купување оружје се наоѓал во куќата на Бериша во селото Прифч кај Тропоја, северна Албанија. Во тоа време Бериша беше политичар од опозицијата и поранешен претседател на Албанија во чијшто мандат се ограбени воените касарни од кои исчезнаа стотици илјади парчиња пешадиско оружје и муниција. Најголем дел од ова оружје заврши кај ОВК.
Четворицата Албанци што го обвинуваат Бериша за трговија со оружје се поранешни припадници на ОВК уапсени од страна на српските сили за време на конфликтот на Косово. Првото сведочење го дал извесен Албанец од Ѓаковица, член на група во ОВК предводена од Рамуш Харадинај. Овој сведок кажал дека по наредба на Харадинај во март 1998 година отишол илегално во Албанија по набавка на оружје.
- Границата ја поминавме кај граничниот камен С-7, а во селото Прифч кај Тропоја, во куќата на Бериша стигнавме околу три часот наутро. Таму останавме осум дена... Секој од нас, а бевме 30 луѓе, доби по две полуавтоматски пушки и една автоматска пушка со 300 куршуми - изјавил поранешниот член на ОВК. Тој додава дека по 15 дена за Албанија по набавка на оружје тргнала уште една група од 35 луѓе. Во истата куќа биле седум дена бидејќи чекале пратка од јужниот дел на Албанија. Овој пат им биле дадени по две полуавтоматски пушки, една автоматска пушка и по неколку бомби.
- Како и првиот пат, оружјето го добивме бесплатно бидејќи парите ги обезбеди централниот штаб во Швајцарија преку фондот „Татковината повикува“ - вели сведокот. Вториот сведок од ОВК е од Дечани. Тој тврди дека по обуката од Харадинај, во Албанија по оружје заминала организирана група од десетина луѓе .
- Отидовме до селото Вокша, Дечани, каде што беше собирниот пункт на членови на ОВК што одат во Тропоја по оружје. Ние бевме десет, а во Вокша сретнавме 650 припадници на ОВК од повеќе села од Дечане и од Пеќ. Комплетната група од Вокша ја предводеше извесен Расим. Бевме стационирани во куќата на Бериша во Прифч, каде што не чекаше неговиот брат Дем Бериша со неговиот син Гзим. Таму затековме уште три лица, кои донесоа 130.000 германски марки за оружје. Парите се собрани од гастарбајтери во Швајцарија - раскажува вториот сведок додавајќи дека тогаш од Албанија бил донесен цел арсенал пешадиско оружје од кинеско производство. Слични тврдења даваат и другите двајца сведоци. - Во куќата на Бериша набавиме околу 300 пушки, муниција и рачни бомби. Бидејќи се работеше за лесно пешадиско оружје, потоа беа организирани многу тури во Албанија за набавка на тешко оружје, минофрлачи, рачни фрлачи, митралези, топови - раскажува последниот сведок.
Уништување на документација.
Името на Сали Бериша се споменува во документ на српското Министерство за внатрешни работи, а се однесува на посетата на српскиот обвинител за воени злосторства Владимир Вукчевиќ на Албанија поради соработка во истрагата. Во документот се наведува дека на 15 септември 2008 година во Албанија престојувал Харадинај.
- Харадинај бил во посета на премиерот Сали Бериша без присуство на соработници. Се сретнал и со младиот принц Лек Зогу, кому, според наведеното, му барал да го убеди Бериша да им нареди на безбедносните служби да ја уништат целата документација што ја имаат, а се однесува на киднапирање и на пренесување на територија на Албанија – се вели во дел од документот. Во него се додава дека постојат сознанија дека со иста цел од 15 до 25 септември 2008 година во посета на Бериша пристигнале и Хашим Тачи, Хафер Халити и генералите Сами Љуштаку и Сулејман Селими.
Извор
Што е следно?
uzivaj si
