Io Sono Interista
The original, one and only IoSono.
- Член од
- 21 декември 2007
- Мислења
- 28.619
- Поени од реакции
- 59.432
Во недела, 14 ноември, очите на вљубениците во фудбалот ширум светот ќе бидат вперени на фудбалската „Скала“ во Милано. „Џузепе Меаца“ или „Сан Сиро“, кој како сака да го нарече фудбалскиот храм во овој град, ќе биде сведок на 175-тата лигашка фудбалска пресметка помеѓу големите градски ривали, ФЦ Интернационале и АЦ Милан.
Темите поврзани со „Дербито на Мадонина“ обично содржат многу историја но овој пат ќе го прескокнам тоа затоа што сите знаеме од какво значење е овој натпревар за навивачите на двата клуба насекаде низ светот. Дербито кое изобилува со одлична кореографија, хумор, страсно навивање и жар на теренот ќе биде топ тема деновиве, а долго по натпреварот ќе биде пресмет на остри дискусии помеѓу „завојуваните страни“.
Минатата сезона помина во доминација на Неразурите. Интер славеше убедливо на стартот на сезоната со 4-0, со головите на Тиаго Мота, Ето, Маикон и Станковиќ. Во вториот дел од сезоната пак Милито и Пандев погодија за 2-0 и потврдување на надмоќта. Беше тоа еден победнички, моќен Интер кој на чело со Мурињо освои се што можеше да освои, и еден Милан кој предводен од неискусниот Леонардо и критикуван поради составот во поодминати години, не можеше да ја издржи трката.
Оваа година како и да е, работите се сменија. Од Интер замина „Специјалниот“, а на негово место дојде Рафаел Бенитез. Освен младите Кутињо и Биабиани, раководството на Интер не донесе засилувања за тимот, а во меѓувреме си замина и Марио Балотели. Кај Росонерите пак на тренерската функција дојде Алегри, но дури пред крајот на преодниот рок кога Берлускони ги доведе Златан Ибрахимовиќ и Робињо, се подигна оптимизмот кај навивачите дека Милан конечно има состав кој може да го симне Интер од тронот. Доаѓањето на швеѓанецот предизвика секакви реакции од страна на навивачите на Интер и токму неговиот настап на дербито во дресот на ривалот ќе придонесе за посебна атмосфера на трибините.
Дербито во недела Милан ќе го дочека од првата позиција. Тимот собра 23 бода и се чини лесно победува против помалите екипи, што е предуслов за освојување на Скудетото. Офанзивниот состав на Милан во главно има проблеми со одбраната, нивната слабост се бековските позиции и тоа посилните екипи се обидуваат да го искористат. Од друга страна, нападот предводен од Ибрахимовиќ е најсилното оружје на Росонерите, кои вечерва можеби го загубија Пато за дербито. Но и покрај тоа, Милан сеуште ги има Робињо и посебно Пипо Инзаги кој е во својата втора или трета младост.
Навивачите на Милан со право очекуваат победа гледајќи го составот (или тоа што преостана од него) на Рафа Бенитез. Серија на бизарни повреди ги зафатија Неразурите по што дербито ќе го пропуштат Самуел, Маикон, Тиаго Мота, Жулио Цезар, Марига, Мунтари и Камбиасо. Се вратија предходно повредените Пандев, Милито и Станковиќ, кои ќе се обидат да ја задржат серијата на непоразеност на Интер на домашен терен, а можеби и да покажат дека Европскиот шампион е кадарен и покрај проблемите, да слави на дербито. Интер во моментов заостанува три бода зад Милан.
Во недела е празник на фудбалот. Нека победи подобриот!
)
