Секоја држава во дипломатските односи поаѓа пред се од сопствените политички и економски, државни интереси. Така е и со Русија и со сите нејзини интервенции на Балканот. Ако Македонија влегува во рамките на руската сфера на интереси, има можности за разновидна соработка. Сепак за Русија отсекогаш поважни биле Србија, Бугарија и Грција (географската поставеност, воената и економската моќ, излезот на море на Бугарија и Србија и сл.). Со оглед на тоа што најголемиот проблем на Македонија претставуваат односите со овие држави, тешко дека Русите би помогнале тие да се решат во наша корист, односно на штета на нејзините долгогодишни, побогати, поголеми, побројни и повлијателни сојузници.
Политиката на Русија кон нас од 1991 па натаму е главно позитивна (не признаа), но би рекол мошне воздржана, што не е секогаш по наша заслуга, односно вина. Сепак имаме некои пропусти, главно поврзани со економската соработка. Русија е извонреден, незаситен и огромен пазар, на кој може да му понудиме многу и мислам дека најмногу треба да се инвестира токму во трговијата и пласманот на нашите работи таму. Во таа смисла посетата на Медведев е добра шанса да се направи нешто. Во политиката тешко дека во Русија ќе најдеме спасител, посебно кога се работи за недоразбирањата со Србите, Бугарите или Грците.