Појаснувајќи ја ЕСП од 1996 година раководителот на Секторот за ЕСП при Советот на Европа Режи Брилат појасни дека таа е компатибилна со правото на ЕУ, ги проширува некои од основните права што ги регулира како правото на соодветно и достапно домување, здравствена заштита, на бесплатно основно и средно образование, правото на вработување, на социјална и правна заштита и недискриминација по основ на пол, раса, религија или национална припадност, но воведува и нови права.
- Главните придобивки од ревидираната Повелба се четиринеделен платен одмор наместо досегашните две недели, обврската за информирање на сите работници при вработувањето за работните услови и за договорот за вработување, унапредување на здравствената заштита и безбедноста на работното место, и на правата на работниците имигранти и нивните семејства, посочува Брилат. Меѓу новите права се наведуваат правото на работникот против отпуштање, за заштита од малтретирање на работното место вклучувајќи го и сексуалното малтретирање и приоритет на правото на исплата на плати на работници во случај на несоодвентност односно банкрот на компанијата.
ЕСП беше донесена во 1961 година. Документот овозможува воспоставување надзорен механизам со кој се гарантира почитување и заштита на човековите права од страна на земјите - потписнички и ја дополнува Европската конвенција за правата на човекот. Неговата ревидирана форма беше усвоена во 1996 година. И двата договора се применуваат паралелно. Република Македонија, заедно со Хрватска, Австрија, Чешка, Велика Британија и Шпанија, е меѓу 15 земји од Европа кои се уште не ја потпишале нејзината ревидирана верзија. Србија, Црна Гора и БиХ се дел од групата земји меѓу кои и Руската Федерација и Швајцарија, кои воопшто не ја потпишале ЕСП.
