Бугарија и Грција се наелектризираа од изјавите на македонскиот премиер
Изјавите на премиерот на Македонија, Никола Груевски, дадени за време на неговата посета на Австралија, дека Македонците од Егејска, Пиринска и Вардарска Македонија, кои живеат и работат таму, се обединети предизвикаа голем бран на жестоки рекации во Бугарија и во Грција.
Груевски во Сиднеј, на средба со македонската заедница, рече дека Македонците во Австралија имаат уникатна можност да живеат заедно со своите сонародници од Егејска и Пиринска Македонија, што не е случај во нивната родна земја. Македонскиот премиер додаде дека нема вардарски, егејски или пирински Македонци, туку дека има само Македонци.
Вчера на овие изјави жестоко реагираше претседателот на Бугарија, Георги Прванов.
“Со недоумие ја примам изразената позиција на премиерот на соседна Македонија. Ја примам како недопустлива, како израз на територијални претензии. Тоа е недопустливо, уште повеќе што Македонија има амбиции да биде членка на ЕУ и тука сакам да споменам уште по силно она што го кажав пред девет – десет месеци, на почетокот на годинава, дека Македонија треба строго да ги исполнува сите критериуми за членство, оние кои се врзани со добрососедски односи и да не се дозволи спорни прашања да се внесуваат во рамките на ЕУ. Така бугарската поддршка за македонското членство во Евросојузот, повторно ќе кажам – не е безусловна. Тоа ќе зависи во голема мера до тоа какво ќе биде однесувањето на нашите соседи и дали ќе бидат навистина добри кандидати“, рече Прванов.
По него се огласи и премиерот на Бугарија, Бојко Борисов, според кого, “македонските политичари не треба да забораваат кон какви заеднички вредности сакаат да се присоединат, како што декларираа дека сакаат да влезат во ЕУ и во НАТО“. Вчера при пристигнување во Брисел тој изјавил дека со албанскиот премеир, кој побарал средба со него, ќе ги разгеда изјавите на Груевски. Борисов додал дека во Европа без граници, кон која Македонија аспирира, конфликтите не се решаваат такви изјави.
Реагираше и заменик министерот за надворешни работи на Бугарија Марин Рајков, кој изјавата на македонскиот премиер ја оцени како неумесна и дека тоа е обид за повлекување етнички линии меѓу граѓаните на Бугариј и граѓаните на Македонија.
Поддршка на позициите на бугарските власти им даде и контроверзниот Божидар Димитров, министер без ресор.
“Лично знам, од свои анализи и од многубројни неформални средби со македонски политичари, дека сегашната гарнитура на власт во Македонија, не сака земјата да стане член на ЕУ и на НАТО“, рекол Димитров.
Според бугарскиот европратеник Евгени Кирилов изјавие на Груевски не се случајни, туку се доказ за тенденција на ескалација на политиката на краен национализам, која од лани ја води лично премиерот на Македонија.
“Никаде во Европа, а и во светот, веќе не се збоува за територијални претензии“, додал Кирилов.
Реакции имаше и од Грција.
“Нема да влегуваме во никаков дијалог со господинот Груевски, со Скопје, за непостоечки прашања“, рекол Друцас, како коментар за изјавите на македонскиот премиер Никола Грувески.
Друцас посочил дека останува на својата стара позиција.
“Атина гледа отворено на односите со Скопје, и навистина сака да биде конструктивна... Мислам дека лидерите во Скопје треба да сфатат дека во нивни раце е изборот меѓу познатата агресивна, националистичка и иредентистичка реторика и конструктивниот и искрен дијалог за разрешување на спорот за името“, рекол тој.
Според Друцас има само едно решение.
“Сме го кажале многупати досега, а ќе ја искористам можноста да го повторам: име со географска одредница, кое ќе биде користено од сите и во секакви ситуации. Тоа е решението, кое ќе ј отвори евроатлантската перспектива на нашиот северен сосед, кого сакаме да го видиме во нашето европско семејство, колку што е можно побргу. Сметам дека тоа решение ќе придонесе и за стабилноста во регионот“, рекол грчкиот заменик министер за надворешни работи.
“Македонскиот премиер Никола Груевски направи иредентистички претендзии кон Грција и кон Бугарија во својот говор пред македонската заедница во Австралија, објави грчки “Неоскозмос“.
Грчката заедница во САД, вчера, изрази протест во врска со “антигрчката настроеност во Македонија и на македонската дијаспора“ во отворено писмо на организацијат на американците со грчко потекло - Панмакедонска асоцијација, публикувано од изданието на “Хеленик њус оф Америка“.
“Националисти од бившата југословенска република и нејзината дијапсора во своите изјави искажуваат омраза кон Грците“, било наведено во писмото, кое било пратено и до раководството на Универзитетот во Јута, каде на почетокот на ноември, годинава, треба да се одржи конференција посветена на истражувања за Македонија.
“И покрај тоа што голем дел од учесниците на конференцијата се занимаваат стриктно со проблемите на Поранешната југословенска република Македонија, сепак има и политички лектори, кои атакуваат и го оцрнуваат народот на Грција, и ги искривуваат историските факти во своите вознемирувачки презентации. Официјални владини и академски извори во ФИРОМ, го негираат грчкиот суверенитет врз целата територија на државата Грција и северната грчка област Македонија ја нарекуваат ‘Егејска Македонија’ или ‘македонски регион пдо грчка јурисдикција’. Тоа се гледа и од последните изјави на македонскиот премиер, Никола Груевски, дадени пред македонската дијаспора во Австралија, но и од содржината на новоиздадената Македонска енциклопедија, издадена од Македонската академија на науките и умтеностите“, наведено е во протестното писмо.
Критички текст во врска со изјавите на премиерот на Македонија објави весникот “Навтемборики“, во кој се вели дека говорот на Никола Груевски е иредентистички, и дека предизвикал жестоки реакции од Бугарија.
